Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Badha oreng suku Benyamin nyamana Kis. Oreng jareya sogi ban ehormadi sarta ekatako’e oreng; sabala’anna Bekhorat, iya areya bagiyanna kaomma Afiyah. Nyamana eppa’na Abiyel ban nyamana Zeror.

² Kis jareya andhi’ ana’ lalake’, nyamana Saul; Saul jareya gi’ ngodha, badanna soga’, robana gantheng. Sanagara Isra’il tadha’ oreng se ganthengnga padha ban Saul jareya. Bariya keya badanna atenggiyan dhari sakabbinna oreng Isra’il laenna. Mon eokor, tenggina reng-oreng Isra’il laenna ta-rata pera’ sampe’ gan bauna.

³ E settong are Kis kaelangan mar-hemarra. Daddi Kis ngoca’ ka Saul, "Kassa’ ngajak bareng kasorang, sare tang mar-hemar se elang jareya."

⁴ Saul ban barengnga pas mangkat ajalan e sabalattrana dhaera pagunongan Efraim ban tana Salisa, tape keban andhi’na eppa’na jareya tadha’ se etemmowa settonga balakka’. Saul ban barengnga gella’ pas entar nyare ka tana Sahalim, tape mar-hemarra tadha’ e jadhiya; daddi Saul pas entar ka dhaerana Benyamin, tape ta’ ahasel keya.

⁵ Saellana napa’ ka tana Zuf, Saul ngoca’ ka barengnga, "Mara, ka, ja’ moleya bai, dhaggi’ eppa’ pas ker-pekkeran polana aberra’an mekkere ba’na ban sengko’ etembang ban mar-hemarra se elang."

⁶ Saodda barengnga gella’, "Mangken dhimen! E kottha paneka badha abdina Allah. Oreng gapaneka ehormadi oreng polana ponapa’a saos se edhabuwagi masthe kalakon onggu. Ngereng ja’ meyosa ka ka’dhissa’, pola oreng ganeka me’ oneng badha e ka’dhimma mar-hemar se elang ka’dhissa’."

⁷ Ca’na Saul, "Mon entar ka oreng jareya, aberri’a apa dhaggi’? Tang sango la tadha’, sengko’ ta’ andhi’ pa-apa se ekennenga bagi ka abdina Allah jareya, ta’ iya?"

⁸ Barengnga Saul gella’ nyaot, "Kalerressan kaula gi’ gadhuwan pesse salaka settong. Diggal pesse ganeka bi’ kaula eatorragiya ka abdina Allah ganeka, me’ olle kasokan malae kaula sareng sampeyan badha e ka’imma mar-hemar se elang ka’issa’."

⁹ Ca’na Saul, "Iya mara ja’ entara." Oreng se kadhuwa jareya pas entar ka kottha ka kennengnganna abdina Allah gella’. E bakto se kadhuwa jareya ongga gumo’ se nojju ka kottha gella’, pas atemmo ban kana’ babine’an se nemba’a aeng ka somor. Se kadhuwa jareya atanya ka babine’an jareya, "Apa tokang tennong rowa badha e kottha?" (E jaman jareya nabbi bi’ oreng ekoca’ tokang tennong, daddi mon badha oreng anya’-tanya’a ka Allah, oreng jareya ngoca’ kantha reya, "Mara ja’ entara ka tokang tennong.")

¹⁰ (9:9)

¹¹ (9:9)

¹² "Enggi, badha," ca’na na’-kana’ babine’an gella’. "Gi’ buru se lebat. Mon sampeyan ajalan epaceppet, tanto ecapo’. Tokang tennong ganeka meyos ka kottha polana ngatorragiya kurbanna ra’yat e attassa mezba e gumo’. Reng-oreng se eonjang ta’ kera adha’ar kurban mon tokang tennong ganeka gi’ ta’ rabu, sabab kurban ganeka gi’ kodu eberkadi dhimen. Mon sampeyan duli mangkat samangken, tanto tapanggi sabellunna tokang tennong ganeka ongga ka gumo’ adha’ara kurban."

¹³ (9:12)

¹⁴ Daddi Saul ban barengnga gella’ mangkat ka kottha, ban sanapa’na ka labang sakethengnga kottha jareya, pas tatemmo bi’ Samuwel se parappa’na alomampa meyosa ka kennengnganna kabakteyan e gumo’.

¹⁵ Saare sabellunna jareya PANGERAN adhabu kantha reya ka Samuwel,

¹⁶ "Lagguna, baja teya, Sengko’ nyorowa oreng suku Benyamin entar ka ba’na. Ba’na kodu alanti’ oreng jareya ngangguy opacara parmennya’an kaangguy epadaddi rato se marenta’a Tang ommat Isra’il. Oreng jareya se masalamedda Tang ommat dhari oreng Filistin. Sengko’ la nangale’e kasangsara’anna Tang ommat ban ngedhing tangessa se menta tolong ka Sengko’."

¹⁷ E bakto Samuwel ngoladi Saul, PANGERAN adhabu, "Jareya oreng se ekoca’agi Sengko’ ba’ari’ rowa. Oreng jareya se marenta’a Tang ommat."

¹⁸ Sabatara jareya Saul ajalan ka seddi’anna Samuwel e seddi’anna labang sakethengnga kottha, pas atanya, "Ta’ langkong, Pa’, e ka’dhimma compo’epon tokang tennong ka’dhissa’?"

¹⁹ Saodda Samuwel, "Sengko’ tokang tennong se esare ba’na jareya. Kassa’ ba’na mangkat kaadha’ ka kennengnganna kabakteyan e gumo’ rowa. E are teya ba’na ngakana abareng ban sengko’. Lagguna gu-laggu partanya’anna ba’na bi’ sengko’ ejawaba kabbi, saellana jareya ba’na olle mole.

²⁰ Parkara mar-hemarra ba’na se elang tello are se kapongkor rowa, ta’ osa kobater, sabab la etemmo kabbi. Ban pole, ba’na ban sabalana eppa’na bakal narema’a papareng se paleng aji sanagara Isra’il."

²¹ Saodda Saul, "Abdina ka’dhinto dhari suku Benyamin, suku se paleng kene’ neng e Isra’il, sarengngan pole sabala’an abdina tamaso’ se paleng ta’ aji e dhalem suku gapaneka. Daddi, aponapa panjennengngan me’ adhabu sapaneka?"

²² Saellana jareya Samuwel ngajak Saul ban barengnga maso’ ka dhalem kennengngan se raja; se kadhuwa jareya eparenge kennengngan e dha’-adha’ e antarana jang-onjangan se bannya’na ra-kera tello polo oreng.

²³ Samuwel pas adhabu ka tokang massa’, "Mara pakalowar daging se bi’ sengko’ epatoro’ ka ba’na gella’ rowa."

²⁴ Tokang massa’ gella’ makalowar daging peleyan se epalaen dhari bagiyanna pokang, pas eangka’agi ka Saul. Samuwel adhabu, "Areya’ ba’na emalaennagi bi’ sengko’ me’ olle ekenneng kakan ba’na abareng ban moy-tamoy laenna. Mara, kakan." Ban Saul pas ekakan. Daddi e are jareya Saul ngakan abareng ban Samuwel.

²⁵ Saellana jareya reng-oreng se badha e jadhiya pas padha toron dhari kennengnganna kabakteyan maso’ ka kottha. Saul eberri’i katedhungan e attassa bengko,

²⁶ pas tedhung sampe’ ngeddha. E bakto pajjar buru moncar, Samuwel adikane Saul se badha e ata’na bengko jareya; dhabuna, "Mara jaga, ba’na eaterragiya bi’ sengko’ se moleya." Saul jaga, pas mangkat abareng Samuwel.

²⁷ Sanapa’na ka penggirra kottha, Samuwel adhabu ka Saul, "Barengnga ba’na jareya soro ajalan kaadha’." Barengnga jareya mangkat kaadha’, Samuwel pas adhabu pole, "Mara ambu gallu sakejja’ e dhinna’, sengko’ manapa’a dhabuna Allah ka ba’na."

1 Samuel

Video 1 Samuel 9

Ikuti Kami:

KONTAK | PARTISIPASI | DONASI