Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Lit sekalak bayak dingen erpengaruh, Kis gelarna. Ia i bas suku Benyamin nari. Ia anak Abiel, kempu Seror, i bas keluarga Bekorat, bagin i bas terpuk Apia nari.

² Lit sekalak anakna dilaki Saul gelarna, rupana mejile kal janah megegeh tuhu-tuhu. Saul gedangen sada takal asa kerina kalak si deban i Israel, ia ka pe si mejilena.

³ Piga-piga kalde Kis nggo papak, emaka ikatakenna man Saul nina, "Buatlah sekalak suruh-suruhen ras kam jenari laweslah kam ndarami kalde e."

⁴ Isiar-siarina taneh deleng-deleng Eperaim ras daerah Salisa, tapi la ia jumpa; emaka terus ka isiarina daerah Salim, tapi kalde e la lit i je. Kenca bage isiarina ka daerah Benyamin, tapi langa ka bo jumpa.

⁵ Kenca ia seh i bas daerah Sup nina Saul man suruh-suruhenna, "Otalah mulih kita, sabap nggit me kari lanai inget bapa pe kalde e, janah aru atena kerna kita."

⁶ Nina suruh-suruhen ndai ngaloi, "Timai lebe! I bas kuta enda lit sekalak si tutus ku Dibata si ihamati kalak tuhu-tuhu sabap kai si ikatakenna jadi kerina. Otalah sidahi ia, janah banci jadi ngasup ia nurikenca man banta i ja ingan kalde e."

⁷ "Adi sidahi ia, kai si ibereken man bana?" nina Saul nungkun, "Pangan sitik pe lanai lit i bas tasta; ma lanai lit kai pe terbereken man bana?"

⁸ Nina suruh-suruhen ndai, "I bas aku lit duit pirak si kitik. Banci kubereken e man bana, jenari kari tentu iturikenna man banta i ja ingan kalde e."

⁹ Ngaloi Saul nina, "Mehuli katandu e! Ota dage." Emaka lawes ia duana ku kuta ingan kalak si tutus ku Dibata e. Asum ia nangkeng ku uruk-uruk kuta e, jumpa ia ras piga-piga kalak singuda-nguda si lawes muat lau. Isungkunina singuda-nguda ndai nina, "I jenda kang 'Kalak si lit pengenehenenna' e?" (Sanga si e sekalak nabi igelari "Kalak si lit pengenehenenna". Emaka adi isungkun kalak kenca atena Dibata nina, "Ota sidahi kalak si lit pengenehenenna e.")

¹⁰ (1Sam 9:9)

¹¹ (1Sam 9:9)

¹² "I jenda," nina singuda-nguda ndai ngaloi. "Situhuna sitik kal ia leben asa kam. Adi pedas-pedas kam erdalan, tentu itundukndu ia. Kenca kam bengket ku bas kuta, tentu jumpa kam ras ia. Sendah denga nge ia seh i kuta, sabap anak kuta e erbahan persembahen i babo batar-batar si i das uruk ah. Kalak si iundang la banci ibenakenna man adi lenga ia seh i je, sabap la banci la ipasu-pasuna lebe persembahen e. Adi genduari kam lawes, jumpa denga kam ras ia ope denga ia lawes man ku das uruk e."

¹³ (1Sam 9:12)

¹⁴ Emaka Saul ras suruh-suruhenna minter lawes ku kuta e, janah asum ia bengket, idahna Samuel reh ndarat kempak ia muatna lawes ku ingan ersembah e.

¹⁵ Sada wari ope denga si e nggo ikataken TUHAN man Samuel nina,

¹⁶ "Pagi, kira-kira genduari ka, Kusuruh njumpai kam sekalak dilaki i bas suku Benyamin nari; tangkuhken ia jadi raja bangsangKu Israel alu namaken minak ku takalna, gelah ikelinina bangsangKu i bas bangsa Pilisti nari. Nggo Kuidah kiniseran bangsangKu janah nggo Kubegi sorana nderkuh mindo penampat."

¹⁷ Asum Samuel ngidah Saul, ikataken TUHAN man bana nina, "Enda me kalakna si Kukataken man bandu e. Ia me pagi si merentah bangsangKu."

¹⁸ Kenca bage lawes Saul njumpai Samuel, si sangana deherken gerbang, jenari isungkunina nina, "Banci nge ikatakenndu man bangku, i ja ingan kalak si lit pengenehenenna e?"

¹⁹ Ngaloi Samuel nina, "Aku kap e. To leben kam ku ingan ersembah. Duana kam la banci la ras aku man sendah. Pagi erpagi-pagi kerina penungkunenndu banci kujabap jenari kusuruh kam mulih.

²⁰ Kerna kalde si bene telu wari si nggo lepas, ula atendu aru; nggo me idat kerina. Tapi ise kin si ngenana kal ate bangsa Israel? Kam kap e, kam ras isi jabu bapandu."

²¹ Erjabap Saul nina, "Aku i bas suku Benyamin nari, suku si kitikna i Israel, janah keluargangku kap si medunguna i bas suku e. Ngkai maka bage nindu ngerana man bangku?"

²² Kenca bage ibabai Samuel me Saul ras suruh-suruhenna ku bas kamar si galang jenari iberekenna man bana sada ingan i bas takal meja ingan temue-temue kundul, si teremna lit kira-kira telu puluh kalak.

²³ Ikataken Samuel man si erdakan nina, "Baba ku jenda daging si kubereken man bandu, si kusuruh gelah iserapkenndu."

²⁴ Emaka ibaba si erdakan ndai daging paha pilihen jenari itamakenna i lebe-lebe Saul. Nina Samuel, "Daging enda nggo iserapken man bandu. Panlah. Kuserapken e gelah ipanndu genduari ras kalak si kuundang." Emaka man me Saul ras Samuel i bas wari e.

²⁵ Asum ia ngincuah i bas ingan ersembah e nari ku bas kuta, ibahan kalak ndai ingan medem man Saul i das tarum,

²⁶ emaka medem ia i je. Kenca nggo siang erpagi-pagi, idilo Samuel me Saul ku das tarum nina, "Kekeken, gelah kupeberkat kam mulih." Keke Saul, jenari ndarat ia ku pasar ras Samuel.

²⁷ Kenca ia nggo seh i tepi-tepi kuta e nina Samuel kempak Saul, "Katakenlah man suruh-suruhen e gelah leben ia lawes asa kita." Lawes suruh-suruhen ndai, jenari iterusken Samuel ngerana nina, "I jenda kam kentisik, maka kuturiken man bandu kai si nggo ikataken Dibata."

1 Samuel

Video 1 Samuel 9

Ikuti Kami:

KONTAK | PARTISIPASI | DONASI