Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Oreng Filistin makompol sakabbinna tantarana e Afek, dineng oreng Isra’il akemah e seddi’na somber e Cora Yizre’el.

² Rato Filistin se kalema maju abaris ban kasatuwan-kasatuwan se bannya’na bang-sebangnga saratos ban saebu oreng; Daud ban pangerengnga abaris e budhi abareng ban Rato Akhis.

³ Para panglimana oreng Filistin nangale’e Daud ban reng-oreng Isra’il jareya, laju atanya, "Reng-oreng Ibrani rowa arapa’a me’ badha e dhiya?" Saodda Akhis, "Paneka Daud, bekkas ponggabana Rato Saul dhari Isra’il. Daud paneka ampon abak abit apolong sareng kaula. Molae badha e ka’dhinto, kaula gi’ ta’ oneng manggi’i salana oreng paneka."

⁴ Tape para panglimana Filistin jareya peggel ka Akhis, laju ngoca’ kantha reya, "Pakon paleman saos oreng gapaneka ka kottha se eparenge junandalem. Daud gapaneka ta’ kengeng aperrang asareng oreng Filistin; tako’ me’-ame’ teppa’na perrang laju abalik akiyanat ka junandalem sareng abdidalem sadaja. Samangken ka’dhinto kasempadan se paleng sae ka oreng gapaneka manabi ngala’a atena ratona kalaban jalan mate’e tantara Filistin.

⁵ Ka’dhinto gu ta’ Daud, ta’ enggi? Gu ta’ Daud ka’dhinto se eamba’ babine’an sambi atari sareng anyanye kadi ka’dhinto, ‘Saul mate’e moso abun-ebun, tape Daud mate’e apolowan ebu.’"

⁶ Akhis adikane Daud pas adhabu, "Demi Allahna Isra’il se odhi’ sengko’ parcaja ja’ ba’na reya esto ka sengko’. Sengko’ perak mon ebarengnge ba’na e dhalem paperrangan reya. Sabab sajjegga ba’na apolong ban sengko’ sampe’ sateya, sengko’ ta’ tao nemmone ba’na agabay kasala’an pa-apa. Tape to-rato laenna ta’ lebur ka ba’na.

⁷ Daddi kassa’ sateya mole bai, mandar salamedda e parjalanan ban ja’ ngalakone pa-apa se mapeggella to-rato se laen rowa."

⁸ Dhabuna Daud, "Ponapa sala abdidalem, guste? Junandalem ta’ manggi’i abdina abadhi kasala’an pa-ponapa ngabidi abdidalem aladine junandalem kantos samangken ka’dhinto, aponapa abdidalem me’ ta’ eparengngagi noro’ aperrang sareng junandalem?"

⁹ Dhabuna Akhis, "Iya, bendher. Sengko’ la tao ja’ ba’na reya bi’ sengko’ eanggep esto akantha malaekadda Allah. Tape ca’na para panglima rowa ba’na ta’ ebagi noro’ aperrang ban sengko’ sarta oreng Filistin laenna.

¹⁰ Daddi Daud, lagguna gu-laggu, ba’na kabbi se padha buru dhari Saul sarta entar dha’ enna’, kodu jaga gi’ petteng sarta pas duli ondur dhari dhinna’ mon la moncar are."

¹¹ Daddi kalagguwanna gu-laggu, Daud ban reng-orengnga mangkat abali ka nagara Filistin, dineng tantara Filistin padha mangkat ka Yizre’el.

1 Samuel

Video 1 Samuel 29

Ikuti Kami:

KONTAK | PARTISIPASI | DONASI