Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ipepulung bangsa Pilisti kerina tenterana i Apek, sedangken bangsa Israel erkemah deher ulu lau i bas Baluren Jesreel.

² Lima kalak raja-raja bangsa Pilisti maju ras pasuken-pasuken tenterana, lit 100, lit 1.000 kalak sada pasuken; Daud ras teman-temanna ngikut arah pudi ras Raja Akis.

³ Puanglima-puanglima tentera bangsa Pilisti ngidah ia, jenari nungkun, "Kai dahin kalak Heber enda i jenda?" Ngaloi Akis, "Enda kap Daud; ia sekalak pegawai Saul, raja Israel. Ia nggo ndekah ras aku. La lit si nggo ibahanna si banci erbahanca aku curiga kidekah ia ras aku."

⁴ Tapi merawa puanglima-puanglima bangsa Pilisti man Akis janah nina man bana, "Suruhlah ia mulih ku kuta si nggo iberekenndu man bana. Ula bere ia lawes erperang ras kita; banci jadi erkusur kari ukurna ngelawan kita sanga erperang e. Lit kin dalan si terulin man bana muat ukur tuanna mulihken seakatan arah kematen tenteranta?

⁵ Lang kin pe, enda kap Daud si ipuji diberu-diberu arah ende-enden janahna landek-landek, 'Ibunuh Saul meribu-ribu, tapi ibunuh Daud erpuluh-puluh ribu.'"

⁶ Emaka idilo Akis me Daud jenari nina man bana, "Ersumpah aku i bas gelar Dibata Israel si nggeluh maka gelgel nari bujur kam man bangku; janah meriah nge min ukurku mere kam lawes ras aku i bas perang enda. La lit kai pe kesalahen si dat aku i bas kam kidekah kam reh ndahi aku. Tapi raja-raja si deban la kam iberena ikut.

⁷ Emaka mulihlah kam alu dame, janah ula ibahanndu kai pe si erbahanca nembeh ate raja-raja e."

⁸ Erjabap Daud nina, "Kai kin salah si nggo kubahan, Bapa? Bagi nggo ikatekenndu, adi labo lit idatndu salah i bas aku kidekah aku erdahin ras kam, ngkai maka la banci aku lawes ras kam, o Tuanku ras Rajangku, jenari erperang ngelawan musuh-musuhndu?"

⁹ "Kuakui nge katandu e," nina Akis ngaloi. "Kuakui maka kam bali bujurna ras sekalak Malekat Dibata. Tapi nggo ikataken raja-raja si deban maka kam la banci ikut ras kami erperang.

¹⁰ Emaka erpagi-pagi e pagi, kerina kam ras pengikutndu si nggo nadingken Saul janah reh ndahi aku, la banci la lampas keke jenari minter berkat kenca terang."

¹¹ Emaka pepagina lampas berkat Daud ras teman-temanna mulih ku taneh Pilisti, janah bangsa Pilisti terus erdalan ku Jesreel.

1 Samuel

Video 1 Samuel 29

Ikuti Kami:

KONTAK | PARTISIPASI | DONASI