Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ E settong are reng-oreng dhari Zif entar ka Saul e Gibeya, abala ja’ Daud ngetek e Gunong Hakhila e penggirra ra-ara beddhi Yehuda.

² Daddi Saul laju duli mangkat eereng parjurit se paleng bagus e Isra’il se bannya’na tello ebu oreng, entar ka ra-ara beddhi Zif nyareya Daud.

³ Saul akemah e penggir lorong e seddi’na Gunong Hakhila jareya. Daud se badha e ra-ara beddhi jareya meyarsa ja’ Saul nyare’e salerana sampe’ gan ra-ara beddhi jareya.

⁴ Daud laju ngerem ta-mata, daddi pas ngagali onggu ja’ Saul bendher badha e jadhiya.

⁵ Daud duli meyos ka parkemahanna Saul; e jadhiya Saul etemmo teppa’na asaren e seddi’na Abner ana’na Ner, panglimana tantarana Saul. Kemahna Saul badha e nga’-tengnga’an, ekalenglenge kemahna para tantarana.

⁶ Daud pas adhabu ka Ahimelekh oreng Het rowa, ban ka Abisai taretanna Yowab (ebuna reng-oreng jareya iya areya Zeruya), "Sapa se bangal noro’ sengko’ maso’ ka kemahna Saul?" Saodda Abisai, "Abdina!"

⁷ E malem jareya keya Daud ban Abisai kalaban tek-ngetek maso’ ka parkemahanna Saul; e jadhiya Saul etemmo teppa’na asaren e nga’-tengnga’anna parkemahan, tombagga naccek e tana e seddi’anna serana. Abner ban pasukanna tedhung e sakalenglengnga.

⁸ Abisai laju mator ka Daud, "Samangken Allah ampon massra’agi mosona panjennengngan ka panjennengngan. Abdina nyo’ona edi nyoddu’agiya tombagga dibi’ ka badanna epaterbasa kantos ka tana, sareng abdina epateyana namong kalaban esoddu’ sakaleyan, ta’ mabi kantos dhu kale!"

⁹ Tape Daud adhabu, "Ella, panneng! PANGERAN tanto ngokom oreng se alako jahat ka rato peleyanna.

¹⁰ Kalaban asmana Allah se odhi’, sengko’ tao ja’ PANGERAN dibi’ se bakal mateyana Saul, mon la napa’ ka ajalla, otabana mon mate e paperrangan.

¹¹ PANGERAN ta’ ngedine sengko’ mate’e rato peleyanna! Kala’ bai tombagga ban gendhina, pas ondur."

¹² Daud laju mondhut tombak ban gendhina Saul jareya dhari seddi’na serana Saul, saellana laju nyengla. Tadha’ oreng settonga se nangale’e otaba se tao ka kadaddiyan jareya, bariya keya tadha’ oreng settonga se ngedhing, sabab bi’ PANGERAN reng-oreng jareya epangeddha kabbi.

¹³ Daud laju meyos lebat e cora jareya sampe’ ka penggir salajanna terros sampe’ gan konco’na gunong, sampe’ jau dhari parkemahanna Saul.

¹⁴ Sanapa’na ka jadhiya Daud aera’ ka Abner ban ka tantarana Saul, dhabuna, "Abner! Ba’na ba’ ngedhinga tang sowara?" Abner aera’ keya, "Sapa ba’na se ra’-era’an jareya?"

¹⁵ Dhabuna Daud, "Abner, ba’na reya gu ta’ oreng se paleng hebat e Isra’il, ta’ iya? Arapa lorana ba’na, guste ratona, me’ ta’ ejaga bi’ ba’na? Gi’ buru reya badha se maso’ ka parkemahanna ratona ba’na mateyana lorana ba’na jareya.

¹⁶ Ba’na ta’ sanggup ajalannagi kawajibanna, Abner! Demi Allah se odhi’, ba’na kabbi pantessa mate, sabab ba’na ta’ ajaga lorana, rato peleyanna PANGERAN. Kodda’ abas! Badha e dhimma tombagga ratona? Badha e dhimma gendhina se esaba’ e seddi’anna serana gella’?"

¹⁷ Saul ngagali ka sowarana Daud, laju mareksane, "Daud, se acaca jareya ba’na, ya, na’?" Saodda Daud, "Dalem, guste."

¹⁸ Saellana jareya Daud laju adhabu pole, "Aponapa junandalem me’ gi’ ser-nyerser abdidalem? Ponapa kasala’an abdidalem?

¹⁹ Guste, ngereng peyarsa’agi ator abdidalem ka’dhinto. Ja’ sakenga PANGERAN se makon junandalem ngamoso abdidalem, dukana ka abdidalem masthe terep manabi eatore kurban. Namong manabi se makon junandalem ka’dhinto manossa, moga-moga reng-oreng gapaneka ebastowa sareng PANGERAN! Sabab lantaran lalakonna reng-oreng gapaneka, abdidalem eojuk dhari tana kaagunganna PANGERAN sareng tapaksa kodu entar ka nagara laen; ban e nagara laen ka’dhinto abdidalem kodu abakte ka ba-dibana oreng manca.

²⁰ Abdidalem ja’ dinggal mate e nagara manca, jau dhari PANGERAN. Ponapa gunana rato Isra’il meyos ka ka’dhinto namong mateyana koto akadi abdidalem ka’dhinto? Ponapa gunana rato aburu abdidalem akadi oreng aburu ajam alas?"

²¹ Saodda Saul, "Sengko’ sala. Mara abali Daud, ba’na tang ana! Sengko’ ta’ alakowa juba’ pole ka ba’na sabab bi’ ba’na sengko’ eehlassagi odhi’ malemma. Sengko’ budhu onggu. Sengko’ la ce’ kalerona onggu!"

²² Tape Daud nyaot, "Ka’dhinto tombakkepon junandalem. Ngereng pakon ka ka’dhinto sala settong dhari parjuridda junandalem pakon mondhut tombak ka’dhinto.

²³ PANGERAN badhi aberkadi sadajana oreng se esto sareng jujur. Sabab sanare e are mangken PANGERAN massra’agi junandalem ka abdidalem, namong abdidalem ta’ poron alako jahat ka junandalem, rato peleyannepon PANGERAN.

²⁴ Daddi, akadi junandalem se are mangken sareng abdidalem eehlassagi odhi’, sapaneka jugan moga-moga abdidalem elindhungana sareng PANGERAN, sareng epalopoda dhari sadajana babaja!"

²⁵ Dhabuna Saul ka Daud, "Pangeran aberkadi ba’na, na’! Ba’na bakal ahasela e dhalem sabarang se elakone!" Daud laju nerrossagi parjalananna, ban Saul laju abali ka kalenggiyanna.

1 Samuel

Video 1 Samuel 26

Ikuti Kami:

KONTAK | PARTISIPASI | DONASI