Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Piga-piga kalak dilaki i Sip nari reh ndahi Saul i Gibea jenari iturikenna man bana maka Daud sangana cebuni i Deleng Hakila i tepi taneh mesawang Juda.
2 Minter berkat Saul ras 3.000 tentera pilihen si mbisana i Israel ku taneh si mesawang Sip ndarami Daud.
3 Jenari erkemah ia i tepi dalan i Deleng Hakila. Daud sangana i bas taneh mesawang e, janah kenca nggo tereteh man bana maka Saul reh ndarami ia,
4 isuruhna piga-piga kalak mata-mata janah payo me maka Saul tuhu-tuhu i je.
5 Minter ia berkat jenari idaramina i ja kin si payona kal ingan medem Saul ras Abner anak Ner, puanglima tentera Saul. Saul medem i bas kemah janah tenterana erkemah i sekelewetna.
6 Jenari nungkun Daud man Ahimelek, kalak Heti, ras man Abisai senina Joap (nande Abisai ras Joap eme Seruya) nina, "Ise i bas kam nari duana lawes ras aku ku kemah Saul?" "Aku," nina Abisai ngaloi.
7 Emaka i bas berngi e Daud ras Abisai bengket ku bas perkemahen Saul janah idapetina Saul sangana medem i tengah-tengah perkemahen e; lembingna pajek i bas taneh deherken takalna. Abner ras tentera e sangana medem i sekelewet Saul.
8 Nina Abisai man Daud, "I bas berngi enda nggo itamaken Dibata musuhndu i bas kuasandu. Genduari berelah maka kupantem ia seh telpus ku taneh alu lembingna e jine; sekali pantem saja, la perlu dua kali!"
9 Tapi nina Daud, "La banci isakitindu ia! Ugapa pe iukum TUHAN ise gia si nakiti raja PilihenNa.
10 Erkite-kiteken TUHAN si nggeluh," nina Daud tole, "kuteh nge maka TUHAN jine pagi si munuh Saul, ntah pe mate perban nggo seh paksana, ntah ia mate i bas perang.
11 TUHANlah si ngambati aku ncubaken erbahan si jahat man kalak si nggo itangkuhken TUHAN jadi raja! Marilah sibuat lembingna ras tambe ingan launa, jenari lawes kita."
12 Emaka ibuat Daud lembing ras tambe ingan lau ndai si rembak kal ras takal Saul, jenari lawes ia ras Abisai. La lit ise pe si ngidah ntah pe si metehsa kai si nggo jadi, si keke pe la lit -- kerina ia ntabeh pertunduhna, erkite-kiteken ntabeh iakapna kerina medem ibahan TUHAN.
13 Jenari ikepari Daud baluren ndai ku das sada uruk si nggo cukup ndauh.
14 Emaka erlebuh ia man tentera Saul ras man Abner nina, "Abner! Begindu kang aku?" "Ise kin si erlebuh e, si ngingeti raja?" nina Abner nungkun.
15 Ngaloi Daud, "Abner, la kin kam dilaki si meganjangna pangkatna i bas Israel? Jadi ngkai maka la ikawalindu tuanndu raja? Ndai lit mengketi perkemahen, atena munuh tuanndu.
16 Kam nggo gagal i bas tugasndu Abner! Ersumpah aku i bas gelar TUHAN si nggeluh maka kerina kam nggo patut mate, sabap la ikawalindu tuanndu, si nggo iangkat TUHAN jadi raja. Nehenlah! I ja lembing raja? I ja tambe ingan lau si ndai arah takalna?"
17 Itandai Saul sora Daud jenari nungkun ia, "Daud, kam kin e anakku?" "Aku," nina Daud ngaloi.
18 Jenari nina tole, "O Bapangku ngkai maka aku suruh-suruhenndu, iayak-ayakndu denga? Kai kin si nggo kuban? Kai kin kejahaten si nggo kulakoken?
19 O Raja begikenlah kai si ateku kukataken man bandu. Adi TUHAN kin si nggo ngajuk-ngajuk kam ngelawan aku, arah sada persembahen man BaNa nggo banci erkusur UkurNa; tapi adi manusia kin si erbahanca idabuhken TUHANlah cilaka man bana. Sabap nggo ipaksana aku lawes i bas taneh pusaka TUHAN nari ku sada negeri i ja dibata-dibata si deban ngenca banci kusembah.
20 Ula min ipelepasndu aku mate i bas taneh kalak, ndauh i bas TUHAN nari. Ngkai maka raja Israel reh munuh sada kutu biang bagi aku enda? Ngkai maka ipeburuina aku desken sada manuk rimba?"
21 Ngaloi Saul nina, "Aku nggo ersalah. Mulihlah Daud, anakku! Ndigan pe lanai aku nggit erbahan si jahat man bandu, sabap la kam nggit munuh aku i bas berngi enda. Motu kal aku gelgel nari! Nggo papak kal perbahanenku!"
22 Erjabap Daud, "Enda lembingndu ndai, Raja. Suruh sekalak tenterandu e ngelegisa.
23 TUHAN mereken BalasenNa man kalak si setia dingen benar. Sendah ItamakenNa kam i bas kuasangku, tapi la kusakiti kam, si nggo iangkat TUHAN jadi raja.
24 Bagi sendah nggo kukelengi kesahndu, bage ka lah perbahanen TUHAN man bangku janah IpulahiNa aku i bas kerina kesusahen nari!"
25 Nina Saul man Daud, "Dibata si masu-masu kam, anakku! La banci la seh bagi sura-surandu i bas kerina si ilakokenndu!" Emaka iterusken Daud perdalanenna, janah Saul mulih ku rumahna.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA