Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ri wattunna beru ammotere’ Saul battu ri pa’bundukanga angngewai tu Filistin, anggappami kabara’ angkanaya niaki Daud ri parang lompoa ri ampi’na En-Gedi.
2 Akkaro-karomi Saul ammile tallussa’bu tantara kaminang baji’ battu ri sikontu Israel, nampa a’lampa mange amboyai Daud siagang ana’ buana irayanganna Moncong Batu Bembe Romang.
3 Anrapi’mi Saul ri ampi’na siapa area bara gimbala’ ri biring aganga. Anjoreng nia’ todong se’re kali’bong, nampa antama’mo Saul untu’ a’jambang. Kabutulang sikali Daud siagang ana’ buana niaki accokko lalang anjoreng ri kali’bonga, mingka la’bi bageang lalangngangi pole.
4 Nampa nakanamo ana’ buana Daud ri ia, "Iaminne kasampatanta bapa’! Sai le’baki Nakana Batara ri katte angkanaya, ‘LaKupassareangi musunnu mae ri kau, gaukammi apa nukaerokia mae ri ia!’" Nampa a’lampa cokko-cokkomo Daud mange ri tampa’na Saul nampa nakere’ cokko-cokko sike’de’ biring jubana.
5 Mingka le’baki anjo salami nasa’ring kalenna Daud anggaukangi anjo kammaya.
6 Nakanamo ri ana’ buana, "Tapporo Nakatutuia’ Batara sollanna tena ku’gau’ ja’dala’ mae ri karaengku ia le’baka Napile Batara. Manna pole sike’de’ takkullei kupa’risi, lanri iami karaeng Napilea Batara!"
7 Kammaminjo nanapakasannammo ana’ buana, siagang tena nakellai ke’nanga mange ambunduki Saul. Ammentemmi Saul nampa nabokoi anjo kali’bonga ero’ ampatulusuki lampana.
8 Assulu’mi Daud battu ri anjo kali’bonga nampa akkio’ ri bokona Saul angkana, "Karaeng!"
9 Assailemi Saul mae ri boko. Su’ju’mi Daud ampakala’biriki Saul na nakana, "Angngapa nakipilangngeri kananna taua angkana erokka’ ancilakaiki’ Karaeng?
10 Kamma-kamma anne kalenta angkasiaki angkanaya ilalang ri kali’bonga sumpaeng, Napassareammi Batara kalenta mae ri atanta. Nia’mo tau anynyonyoka’ sollanna kubunoki’, mingka tena nakuero’. Appiali atanta angkanaya taerokai atanta ampa’risi karaenna atanta le’baka Napile Batara.
11 Ciniki Bapa’! Ciniki anne polonna jubata anne nata’galaka atanta. Sitojenna akkullei atanta ambunoki’, mingka poro napolonji bawang sike’de’ atanta anjo biring jubata. Jari a’nassami angkanaya tena pikkirang ja’dala’na yareka dorakana atanta mae ri katte. Kiondang mange-mangei atanta lanri erotta ambunoi, manna natena kasalanna atanta mae ri katte manna sike’de’ dudu.
12 Tapporo Batara antappuki angkana inai ri katte sipa’rua sala. Poro Batara ambalasaki panggaukanna karaenga mae ri atanta, mingka manna sike’de’ tania’ ero’na atanta untu’ ampa’risiki’.
13 Kiassengi anne paruntu’ kana salloa angkanaya, ‘Ia kaja’dallanga tau ja’dalakaji bawang anggaukangi.’ Lanri kammana anjo, taerokai atanta ampa’risiki’.
14 Kiparhatikangi anne atanta eroka nibuno ri karaenna Israel! Kiciniki anne atanta tuli niondanga! Anne atanta sanrapanji kongkong matea, sanrapangi sikayu kutu bawang.
15 Batara la’jari haking mae ri katte sipa’rua, ikatte karaeng siagang anne atanta. Tapporo Naparessai anne parkaraya, na Nabantu atanta siagang Napasalama’ atanta battu ri karaeng."
16 Le’ba’na Daud akkana kamma anjo, nakanamo Saul, "Ikauka antu Daud, anakku?" Nampa angngarru’mi Saul.
17 Nampa nakanamo ri Daud, "Ikau annaba, na inakke sala.
18 Kaja’dallangku ri kau nubalasaki siagang kabajikang. Anne alloa nupappicinikammi angkanaya bajikko mae ri nakke, nasaba’ tena nanubunoa’, manna na Napassareamma’ Batara mae ri kau.
19 Langkara’ sikali nia’ tau assibuntulu’ siagang musunna nampa naboli’ attallasa’ anjo musunna! Jari, tapporo Nabarakkakiko Batara lanri anjo panggaukang baji’nu anne alloa mae ri nakke!
20 Kamma-kamma anne tappa’ma’ angkanaya ikau la’jari karaeng ri Israel, siagang angkanaya lakassaki kakaraenganna Israel irawangang parentanu.
21 Kamma-kamma anne a’janji mako ri nakke lanri Batara, angkanaya tena nalanubuno turungangku, siagang tena todong nalanuapusu’ arenna kaluargaku!"
22 Nampa assumpamo Daud lanagaukang anjo passalaka. Nampa ammotere’mo Saul mange ri balla’na, kammayatompa Daud siagang ana’ buana ammotere’ tommi battu ri paccokkoanna.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA