Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ E settong are badha se abala ka Daud ja’ oreng Filistin nyerrang kottha Kehila ban arampas gandum se gi’ buru eanye.

² Daud laju nyo’on petodu ka PANGERAN, "Ponapa abdidalem kodu nyerrang oreng Filistin?" "Iya," dhabuna PANGERAN, "kassa’ serrang ban pasalamet reng-oreng kottha Kehila."

³ Tape reng-orengnga Daud mator, "E Yehuda ka’dhinto saos sadaja padha katako’an; ponapa pole manabi kodu nyerrang tantara Filistin e Kehila."

⁴ Daddi Daud nyo’on petodu ka PANGERAN aggi’, ban PANGERAN adhabu, "Ta’ osa kobater. Kassa’ serrang kottha Kehila, sabab tantara Filistin jareya bi’ Sengko’ epassra’agiya ka ba’na."

⁵ Daddi Daud ban reng-orengnga padha mangkat ka Kehila, terros alorok kottha jareya; bannya’ oreng Filistin se epate’e, bariya keya ebinna se erampas. Daddi oreng kottha jareya la epabebas bi’ Daud.

⁶ E bakto Abyatar pottrana Ahimelekh buru ka Daud, sarta noro’ Daud ka Kehila, Abyatar jareya nyambi efod keya.

⁷ E bakto Saul narema kabar ja’ Daud badha e Kehila, ca’na panggaliyanna, "Bi’ Allah Daud reya la eparengngagi ka sengko’. Sateya Daud jareya la tajebbak sabab maso’ ka dhalem kottha se badha pagar alassa ban ngangguy labang saketheng."

⁸ Saul laju meyos ka Kehila abakta tantarana, ngepponga Daud ban reng-orengnga.

⁹ Tape Daud la ngagali ja’ Saul aneyat jahat ka salerana. Daddi laju adhabu ka Imam Abyatar, "Kanna’ efod jareya giba dha’ enna’."

¹⁰ Saellana jareya Daud laju adu’a, "Adhu, Guste PANGERAN, Allahna Isra’il, abdidalem mereng ja’ Saul aneyat meyosa ka Kehila ngancora kottha ka’dhinto lantaran abdidalem, abdiepon Junandalem.

¹¹ Ponapa reng-oreng Kehila badhi massra’agiya abdidalem ka Saul? Ba’ lerressa kabar gapaneka, Guste? Guste PANGERAN, Allahna Isra’il, kasokana Junandalem apareng oneng ka abdidalem." Dhabuna PANGERAN, "Iya, Saul entara ka jadhiya."

¹² Daud laju adhabu pole, "Ponapa reng-oreng Kehila badhi massra’agiya abdidalem sareng reng-oreng abdidalem sadajana ka Saul?" Dhabuna PANGERAN, "Iya."

¹³ Daddi Daud ban reng-orengnga se bannya’na ra-kera nem atos oreng laju padha ondur dhari Kehila pas le-ngalle dhari kennengngan se settong ka settonganna. E bakto Saul meyarsa ja’ Daud la ondur dhari Kehila, pas burung se nyerrangnga ka jadhiya.

¹⁴ Saellana jareya Daud alenggi e pangetegganna e wa-guwa e pagunongan e sagara beddhi Zif. Bi’ Saul eserser terros, tape Allah ta’ kasokan massra’agi Daud ka rato jareya.

¹⁵ Maske bariya Daud tako’ keya, sabab Saul amaksod mateyana salerana. E settong bakto Daud badha e Hores, e sagara beddhi Zif.

¹⁶ Yonatan meyos ka jadhiya makokowa kaparcaja’anna Daud ja’ salerana bakal elindhungana Allah.

¹⁷ Dhabuna Yonatan, "Ampon, ta’ osa tako’. Sampeyan ta’ kera gaggar ka tanangnga rama. Rama ampon ngagali onggu ja’ sampeyan se badhi jumenneng rato Isra’il, jugan kaula badhi kengenga pangkat e baba’anna sampeyan."

¹⁸ Saellana jareya Daud ban Yonatan mabadha parjanjiyan parsahabadan e ajunanna PANGERAN. Yonatan pas gubar ka dalemma, dineng Daud paggun alenggi e Hores.

¹⁹ Saellana jareya badha reng-oreng dhari Zif se padha ngadhep ka Saul e Gibeya laju mator kantha reya, "Daud ngetek e dhaera abdidalem e dhalem wa-guwa e seddi’na Hores, e attassa Gumo’ Hakhila e lao’anna sagara beddhi Yehuda.

²⁰ Abdidalem oneng, ja’ junandalem ce’ terrona se mega’a Daud; daddi, ngereng meyos ka dhaera abdidalem. Tanggung masthe junandalem ahasel mega’ Daud gapaneka."

²¹ Dhabuna Saul, "Moga-moga ba’na eberkadana bi’ PANGERAN lantaran aberri’ kabecce’an ka sengko’!

²² Kassa’ tenggu pole me’ olle ta’ kalero; talektegi pagu-onggu badha e dhimma Daud jareya ban sapa se nangale’e Daud jareya e jadhiya. Sengko’ ngedhing ja’ Daud jareya ce’ salenterra.

²³ Daddi pareksa patete wa-guwa se tao ekennengnge pangetegganna, pas abali dha’ enna’ ka sengko’. Saellana jareya sengko’ pas entara ka jadhiya abarengnga ban ba’na, ban mon Daud gi’ badha e jadhiya, bi’ sengko’ esareya, maske sengko’ kodu nyaloksak saanterona nagara Yehuda!"

²⁴ Daddi reng-oreng jareya laju mangkat abali ka Zif ajangadha’i Saul. E bakto jareya Daud ban reng-orengnga badha e ra-ara beddhi Ma’on, e cora se seppe e dhaera bagiyan lao’na ra-ara beddhi Yehuda.

²⁵ Saul ban tantarana rabu nyare’e Daud, tape la badha oreng se malae Daud, daddi Daud la buru ka gunong bato e ra-ara beddhi Ma’on terros alenggi e jadhiya. Saellana ngaonenge parkara jareya, Saul laju nyerser Daud.

²⁶ Saul ban tantarana lebat e penggirra gunong se bagiyan dhinna’ dineng Daud ban reng-orengnga lebat e penggir dhissa’na. Daud duli buru dhari Saul se la molae ngeppong mega’a salerana ban reng-orengnga.

²⁷ Tape o-tao laju badha otosan se ngadhep ka Saul laju mator, "Ngereng junandalem duli abali, guste! Nagaraepon junandalem sareng abdidalem eserrang oreng Filistin!"

²⁸ Saul pas ambu se nyerser Daud, sarta laju terros aperrang bi’ oreng Filistin. Lantaran jareya kennengngan jareya enyamae Gunong Pamesa’an.

²⁹ (24-1) Dhari jadhiya Daud meyos ka dhaera En-Gedi, pas ngetek e wa-guwa.

1 Samuel

Video 1 Samuel 23

Ikuti Kami:

KONTAK | PARTISIPASI | DONASI