Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Lompat Daud i bas kota Gat nari, ku bas sada gua deherken kuta Adulam. Kenca ibegi senina-senina ras keluargana kerina maka i nggo i je, idahina ia.
2 Kalak si itindas ntah kalak si lit utangna ntah pe kalak si ermenek ate lawes ndahi ia, lit kira-kira 400 kalak kerina, janah Daud jadi peminpinna.
3 I jenari lawes ka Daud ku Mispa i taneh Moap janah ikatakenna man raja Moap nina, "Ngarap aku maka iberendu min bapangku ras nandengku ringan ras kam lebe seh tereteh man bangku kai ate Dibata IbahanNa man bangku."
4 Emaka itadingken Daud orang tuana ras raja Moap janah i je me ia ringan kidekah Daud cebuni i bas gua e.
5 Kenca bage reh nabi Gat ndahi Daud, janah ikatakenna man bana nina, "Ulanai kam ringan i jenda, minterlah kam lawes ku taneh Juda." Emaka berkat minter Daud ku kerangen Heret.
6 I bas sada wari Saul sangana i Gibea kundul i teruh batang kayu tamariska i das sada uruk; i bas tanna lit sada lembing janah kerina pegawaina tedis isekelewetna. Man bana iberitaken maka Daud ras temanna nggo teridah.
7 Emaka nina man pegawaina, "Begikenlah o kam kerina kalak Benyamin! Nggit kin iakapndu Daud mereken juma ras kebun anggur man bandu kerina, janah ngangkat kam jadi komendan i bas tenterana?
8 E kin sabapna maka kam erpekat ras ngelawan aku? La lit sekalak pe kam ngatakenca maka anakku jine nggo mpersada arihna ras Daud. La lit sekalak pe si erkuah ate man bangku ntah pe ngatakenca man bangku maka Daud sekalak i bas suruh-suruhenku nari ndarami kesempaten munuh aku, janah i bas si e iajuk-ajuk anakku ia!"
9 Doek sangana tedis i je ras pegawai-pegawai Saul emaka nina, "Kuidah Daud ndahi Ahimelek anak Ahitup i kuta Nop.
10 Ahimelek nungkun man TUHAN kai arus ibahan Daud, janah kenca e iberekenna man Daud nakan ras pedang Goliat kalak Pilisti e."
11 Emaka isuruh Raja Saul ngelegi Imam Ahimelek ras kerina kade-kadena si jadi imam i kota Nop, emaka reh ia kerina ndahi Saul.
12 Ngerana Saul man Ahimelek nina, "Begiken Ahimelek!" "Ue Raja," nina ngaloi.
13 Nungkun Saul man bana, "Ngkai maka kam ras Daud erpekat ngelawan aku? Ngkai maka iberekenndu man bana nakan ras pedang, janah isungkunndu Dibata guna ia? Genduari nggo ia erkusur ngelawan aku janah itimaina kesempaten lako munuh aku!"
14 Ngaloi Ahimelek nina, "Daud kap pegawaindu si setia! Ia kelandu, kepala pasuken pengawalndu, janah kerina kalak i bas istanandu mujiken ia.
15 Ue, payo tuhu kusungkuni Dibata kerna ia, janah labo e si pemenana. Adi kerna erpekat ngelawan kam, la patut ituduhndu aku ntah ise pe i bas keluargangku, o Raja. Sitik pe la lit kuteh kerna si e!"
16 Nina raja, "O, Ahimelek, kam ras kerina kade-kadendu la banci lang mate."
17 Jenari iperentahkenna man pengawal-pengawal si tedis deherken ia nina, "Bunuhlah imam-imam TUHAN e! Erpekat ia ras Daud janah la iturikenna man bangku maka ia nggo kiam lawes, aminna gia ietehna si e gelgel." Tapi la nggit pengawal-pengawal e nehken tanna munuh imam-imam TUHAN.
18 Emaka nina Saul man Doek, "Kam munuhsa!" Jenari ibunuh Doek ia kerina. I bas wari e ibunuhna waluh pulu lima imam si banci atan maba epod.
19 Kerina anak kota Nop pe, kota imam-imam e, iperentahken Saul gelah ibunuh, dilaki ras diberu, danak-danak ras si mbaru tubuh, lembu, kalde, ras biri-biri kerina ibunuh.
20 Tapi Abiatar, sekalak i bas anak-anak Ahimelek sempat luah jenari lawes ia ersada ras Daud.
21 Iturikenna man bana uga Saul nggo munuh imam-imam TUHAN.
22 Nina Daud man bana, "Asum kuidah Doek i je i bas wari e, kuteh nge ugapa pe ikatakenna nge man Saul. Emaka aku nge si ertanggung jawab kerna kematen kerina kade-kadendu.
23 Raslah kita janah ula kam mbiar. Ibunuh Saul atena kita duana, tapi kam la banci la terkawal ras aku."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA