Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Jari larimi Daud battu ri ampi’na Rama nampa a’lampa mange angngagangi Yonatan sibuntulu’. Nampa akkuta’nang angkana, "Apa kasalangku. Kaja’dallang apa le’ba’ kugaukang siagang apa dosaku mae ri manggenu sa’genna ero’ ambunoa’?"
2 Appialimi Yonatan angkana, "Teako akkana kammai! Lanri Batara, tena nulanibuno. Sikontu apa eroka nagaukang manggeku baji’ naparallu yareka tena naparallu, tuli napauanga’. Jari tena olona nacokkoanga’ apa eroka nagaukang mae ri kau. Lanri kammana anjo, tena natojeng anjo nupaua!"
3 Appialimi Daud angkana, "Baji’ naassenna manggenu angkanaya nungaia’. Jari tantu tena naero’ ampauangko anjo passalaka sollanna tena nusi’na. Manna pole antekamma, lanri Batara attallasaka, sikontutojenna tallasakku sanrapangi bayao ta’dongkoka ri cappa’ tanru’!"
4 Nampa nakanamo Yonatan, "Manna apa nupala’ lakugaukangi."
5 Appialimi Daud, angkana, "Kamma anne. Ammuko allo Passua’-suarrang Bulang Beru, nampa mustina sipangnganreanga’ siagang karaenga. Mingka punna situjuko, la’lampa’ mange accokko ri paranga sa’genna ammembara’ ri bangngia.
6 Punna akkuta’nang manggenu angkanaya angngapa nakutena hadere’, pauammi angkana, le’ba’ma’ appala’ ising battu ri kau untu’ ammotere’ linta’ mange ri Betlehem, lanri anjoreng nia’ pa’gaukang koro’bang taung-taung nagaukanga sikontu kaluargaku.
7 Punna nakana karaenga, ‘Baji’mi,’ laamammi kusa’ring. Mingka punna larroi, assemmi angkanaya le’ba’mi napattantu ma’nassa erokka’ nacilakai.
8 Appala’ tulunga’ ri kau, nasaba’ le’ba’ maki’ assijanji ri dallekanNa Batara. Mingka punna nia’ salangku, bunoma’, mingka teako passareangia’ mae ri manggenu."
9 Appialimi Yonatan angkana, "Teako batai! Punna kuasseng angkana ma’nassa ero’ tojengi manggeku ancilakaiko, tantu lakupauangko."
10 Akkuta’nammi Daud angkana, "Inai lampauanga’ punna appiali sanna’ larrona manggenu mae ri kau?"
11 Nakanamo Yonatan, "Umba ki’lampa mange ri paranga." Jari a’lampami ke’nanga siagang mange ri paranga.
12 Nampa nakana Yonatan ri Daud, "Tapporo Batara, Allata’alana Israel a’jari sa’bi mae ri katte! Ammuko bari’basa’ yareka ammembara’, ri wattu kamma-kammaya anne, lakuusahakangi angngassengi bone atinna manggeku. Punna bajiki mae ri kau, lakkiringa’ kabara’ mae ri kau.
13 Punna erokko nacilakai, tantu lakupauang tongko, sollanna akkulle nupasalama’ kalennu. Tapporo Nabunoa’ Batara punna tena nakugaukang anjo kammaya. Tapporo Natulungko Batara, sangkamma ia le’ba’ tommi nitulung ri Batara.
14 Na punna attallasa’ ija’, u’rangi anne parjanjianta ri dallekanNa Batara, siagang teako amminrai pa’mai’nu mae ri nakke; mingka punna tenama’,
15 pappicinikangi mae ri turungangku tamamminranu satunggu-tungguna. Na punna Naancuru’ ngaseng Batara sikontu musunnu,
16 teako tappuki anjo parjanjianta sipa’rua. Punna nutappuki, Batara langhukkungko."
17 Jari makapinruanna Yonatan nasuromi Daud a’janji untu’ angkamaseangi, nasaba’ ia nakamaseangi Daud sangkamma batangkalenna.
18 Nampa nakanamo Yonatan ri ia, "Ammuko Passua’-suarrang Bulang Berui. Tantu laniassengi punna tena nuhadere’, nasaba’ kosongi pammempoannu ri mejang pangnganreanga.
19 La’biangampa ammembara’! Lanri kammana anjo, a’lampamako mange ri paccokoannu anjo rioloa, siagang tayanga’ ri bokona pa’gompoang batua anjoreng.
20 Ammembara’ nia’ tallu ana’ pana lakulappasa’ mange anjoreng, sanrapang angkanaya nia’ lakupitujui kupana.
21 Nampa lakusuro atangku mange anrappungi anjo sikamma panaya. Na punna kukana ri ia, ‘E, anjo panaya la’bi ambani mae anrinni; allei,’ batuanna akkulleko assulu’ nasaba’ amangi. Assumpa’ lanri Batara attallasaka, angkanaya ma’nassa tena sikali bahaya lantujuko.
22 Mingka punna kukana ri atangku, ‘E, la’bi bellai anjo panaya mange anjoreng,’ battuanna Nasuroko Batara a’lampa; jari a’lampako.
23 Tapporo Najagaiko Batara sollanna akkulle para nita’gala’ jarre’ parjanjianta sipa’rua."
24 Jari accokkomi Daud ri paranga. Ri wattunna Passua’-suarrang Bulang Beru, battumi Karaeng Saul mae ri parjamuanga.
25 Sangkamma biasa ammempoi ri ampi’na rinringa. Yonatan angngallei pammempoang ri dallekanna. Abner ri sa’rinna Saul, mingka pammempoanna Daud tuli kosongiji.
26 Mingka anjo alloa tena nasero kanai Saul anjo passalaka, nasaba’ napikkiriki angkana, "Gassingka nia’ tamangngapa-apana sa’genna tena natangkasa’ kalenna situru’ atorang agamaya."
27 Ammukona, iamintu ri allo makaruana Bulang Berua, tuli kosongiji pammempoanna Daud. Jari akkuta’nammi Saul ri Yonatan angkana, "Angngapa natena nahadere’ Daud subangngi siagang anne alloa ri parjamuanga?"
28 Appialimi Yonatan angkana, "Le’baki appala’ ising ri nakke untu’ a’lampa mange ri Betlehem.
29 Nakana, ‘Kisarea’ ising a’lampa, nasaba’ kaluargaku nagaukangi passua’-suarrang koro’banga ri Betlehem, nampa nakellaia’ daengku battu. Lanri kammana, punna kikellaija’, lappassamma’ a’lampa untu’ assibuntulu’ siagang sikamma sari’battangku siagang bijangku.’ Iaminjo saba’na natena hadere’ ri anne parjamuanga, Bapa’."
30 Nalangngere’na anjo a’jari larro sikalimi Saul mae ri Yonatan siagang nakana, "Ana’ harang lompo! Kamma-kamma anne kuassemmi angkanaya nualleangangi Daud na nupakasiri’ kalennu siagang amma’nu!
31 Tena nanusadari angkanaya punna attallasa’ iji Daud tena olonu la’jari karaeng ri anne pa’rasanganga? Kamma-kamma anne suroi taua a’lampa mange amboyai nampa naerang mae anrinni, nasaba’ musti nibunoi!"
32 Jari appialimi Yonatan angkana, "Angngapa namusti nibuno? Apa dosana?"
33 Nalangngere’na anjo napasambilami pokena Saul mange ri Yonatan, ero’ nabuno. Jari naassemmi Yonatan angkanaya memang ma’nassa ero’ tojengi manggena ambunoi Daud.
34 Larro sikalimi Yonatan, nampa a’lampamo ambokoi mejang parjamuanga, siagang tena apa-apa nakanre ri passua’-suarrang makaruana anjo Bulang Berua. Sanna’ sikalimi attojeng-tojenna ampikkiriki Daud le’baka nihina ri Saul manggena.
35 Ammukona a’lampami Yonatan mange ri paranga untu’ assibuntulu’ siagang Daud, sangkamma le’baka narancana ke’nanga. Angngerammi sitau ana’ bura’ne, iamintu atanna,
36 nampa nakana ri ia, "A’lampako mange anrappungi ana’ pana lakupapanaya." Ri wattunna lari anjo anaka, ammanami Yonatan, na napilalloi anjo anaka.
37 Ri wattunna battu anjo anaka mange ri napattu’guria anjo panaya, akkio’mi Yonatan ri ia angkana, "E, anjo panaya la’bi bella iji mange anjoreng!
38 Akkaro-karoko sike’de’, teako takkajannakki!" Narappummi anjo anaka panaya nampa ammotere’ mange ri karaenna.
39 Tena sikali napahangi apa battuanna anjo kana-kananna Yonatan, mingka Yonatan siagang Daud bawang angngassengi battuanna.
40 Nampa napassareang Yonatan anjo panaya siagang pakkakasa’na mae ri anjo anaka, na nasuro ammotere’ mange ri kotaya.
41 A’lampanamo anjo anaka, assulu’mi Daud battu ri bokona anjo pa’gompoang batua, nampa su’ju’ pintallung. Baji’ ia kammayatompa Yonatan para angngarru’mi ke’nanga ri wattunna massing assibau. La’bi lompoangangi si’nana Daud na Yonatan.
42 Nampa nakanamo Yonatan ri Daud, "Tapporo Natulung laloko Allata’ala. LaNajamingi Batara angkanaya ikatte siagang turunganta tuli lanata’gala’ jarreki parjanjianta sipa’rua ri dallekanNa Allata’ala." Le’baki anjo a’lampami Daud, nampa a’lampa tommo Yonatan ammotere’ mange ri kotaya.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA