Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Daud pas buru dhari Nayot e seddi’na Rama manggi’i Yonatan, laju adhabu kantha reya, "Kaula neka sala ponapa? Ponapa kajahadan sareng dusa kaula ka ramana sampeyan me’ daddi ramana sampeyan mateyana kaula?"

² Saodda Yonatan, "Ampon, ja’ adhabu sapaneka! Demi Allah, sampeyan ta’ kera epate’e. Rama masthe abala ka kaula parkara sabarang se elampa’agiya, parkara se penting sareng se ta’ penting. Daddi ta’ kera rama kaagungan maksod se eroseya’agi ka kaula. Daddi, se edhabuwagi sampeyan ganeka ta’ lerres!"

³ Saodda Daud, "Ramana sampeyan ngagali ja’ sampeyan neser ka kaula. Daddi sampeyan ta’ kera ebalai me’ olle ta’ sossa. Kadi ponapa’a saos, demi PANGERAN se odhi’, odhi’ kaula paneka padha sareng tellor e batton!"

⁴ Dhabuna Yonatan, "Ponapa saos parmenta’anna sampeyan sareng kaula elakonana."

⁵ Saodda Daud, "Kadi paneka, lagguna Paraya’an Bulan Ngodha, masthena kaula neddha asareng ramana sampeyan. Tape mon sampeyan saroju’, kaula ngetegga e teggal sampe’ sadhumalem lem-malem.

⁶ Manabi ramana sampeyan mareksane aponapa kaula me’ ta’ hadir, atorragi ja’ kaula nyo’on edi ka sampeyan palemana ka Betlehem duliyan, sabab e ka’dhissa’ badha opacara kurban taonan kaangguy sadajana essena compo’ kaula.

⁷ Manabi rato adhabu, ‘Iya, dina,’ artena kaula aman, tape manabi rato duka, artena rato ampon motossagi macalaka’a kaula.

⁸ Kaula nyo’on tolong ka sampeyan, sabab sampeyan sareng kaula ampon mabadha parjanjiyan e ajunanna PANGERAN. Tape manabi kaula pajat sala, ngereng kaula pate’e, tape kaula ja’ parengngagi ka ramana."

⁹ Saodda Yonatan, "Ampon, ja’ kobater! Mon kaula oneng ja’ rama ampon motossagi mateyana sampeyan, bi’ kaula sampeyan ebala’ana."

¹⁰ Daud mareksane, "Pasera se mala’ana kaula saompama ramana sampeyan duka?"

¹¹ "Tore samangken entar ka teggal," dhabuna Yonatan. Se kadhuwa jareya pas meyos ka teggal kadhuwa’an.

¹² Dhabuna Yonatan ka Daud, "PANGERAN, Allahna Isra’il, mandar kasokana daddi saksena sampeyan sareng kaula! Lagguna gu-laggu otabana sadhumalem baja mangken, kaula aehteyara sopaja bisa’a oneng ka essena atena rama. Manabi maksodda ka sampeyan becce’, sampeyan bi’ kaula ekabarrana.

¹³ Manabi rama aneyat macalaka’a sampeyan, tanto sampeyan bi’ kaula ebala’ana jugan sopaja sampeyan bisa’a buru nyare salamet. Mon kaula ta’ neptebbi janji se ekoca’agi kaula are mangken paneka, mandar kaula epamateya sareng PANGERAN. Moga-moga sampeyan etolonga sareng PANGERAN akadi se nolong rama kaula!

¹⁴ Manabi kaula gi’ odhi’, kaemodi parjanjiyanna sampeyan sareng kaula e ajunanna PANGERAN paneka, ban sampeyan paesto ka kaula; tape manabi kaula ampon mate,

¹⁵ sampeyan paesto salanjangnga ka na’ poto kaula. Manabi sareng PANGERAN mosona sampeyan epatompes sadaja,

¹⁶ ja’ kantos sampeyan megga’ parjanjiyan paneka. Mon sampeyan sampe’ megga’ parjanjiyan paneka, PANGERAN dibi’ se ngokoma sampeyan."

¹⁷ Daddi Yonatan makon Daud sakaleyan aggi’ ajanji taresna’a ka salerana, sabab salerana taresna ka Daud akantha kataresna’anna ka salerana dibi’.

¹⁸ Saellana jareya Yonatan adhabu ka Daud, "Sarrena lagguna paneka Paraya’an Bulan Ngodha, tantona etemmo ja’ sampeyan tadha’, sabab kalenggiyanna sampeyan e meja makan kosong;

¹⁹ ponapa pole sadhumalem! Daddi, sampeyan duli ngetek e pangeteggan se sabbanna ka’issa’, nante’ e bingkengnga tombuganna bato se badha e ka’issa’.

²⁰ Sadhumalem kaula ngocola pana tatello’ ka bato ganeka, me’ olle sareng oreng esanggu kaula ngeleng sasaran.

²¹ Kaula pas nyorowa dunor kaula nyare’e pana se tatello’ ganeka. Manabi kaula ngoca’ sapaneka ka dunor kaula ganeka, ‘E, pana jareya gaggar e jang dhinna’an; mara kala’,’ ganeka artena sampeyan aman, olle kalowar. Kaula asompa kalaban asmana PANGERAN se odhi’ ja’ tadha’ babaja ka sampeyan.

²² Tape mon kaula ngoca’ sapaneka ka dunor kaula, ‘Pana jareya gaggar e jang dhissa’an,’ artena sampeyan epakon buru sareng PANGERAN.

²³ Moga-moga PANGERAN ajaga’a sampeyan sareng kaula sopaja terrosa neptebbi parjanjiyan se ekoca’agi e ajunanna PANGERAN paneka."

²⁴ Daddi Daud ngetek e teggal. E bakto Paraya’an Bulan Ngodha, Rato Saul meyos ka dhadha’aran.

²⁵ Akantha biyasana Saul alenggi e seddi’na geddhung. Yonatan alenggi dhep-adhebban ban Saul, Abner e erenganna Saul, tape korsena Daud kosong.

²⁶ Tape e are jareya Saul ta’ adhabu pa-apa parkara jareya, sabab ca’na panggaliyanna, "Pola badha pa-apa, sampe’ Daud ta’ berse noro’ atoranna agama."

²⁷ Kalagguwanna, e are se kapeng dhuwa’ e dhalem Bulan Ngodha, korsena Daud gi’ kosong keya, daddi Saul adhabu ka Yonatan, "Arapa ba’ari’ ban sateya Daud me’ ta’ entar ka dhadha’aran reya?"

²⁸ Saodda Yonatan, "Ampon nyo’on edi ka kaula, entar ka Betlehem.

²⁹ Oca’na sapaneka, ‘Kaula nyo’ona edi, entara ka Betlehem, polana kalowarga kaula teppa’na araya’agi paraya’an kurban e ka’dhissa’, ban bi’ kaka’ kaula epakon entar. Daddi manabi sareng sampeyan eedine, kaula entara manggi’i la-bala kaula.’ Gapaneka sababba Daud ta’ kengeng hadir e dhadha’aran ka’dhinto, Rama."

³⁰ E bakto meyarsa jareya Saul ce’ dukana ka Yonatan, "Ana’ jada! Sateya sengko’ tao ja’ ba’na nolonge Daud ban agabay malona aba’na dibi’ ban ebuna!

³¹ Apa ba’na ta’ apangrasa ja’ saabidda Daud gi’ odhi’ ba’na ta’ kera bisa daddi rato e nagara reya? Sateya kassa’ soro sare Daud jareya giba dha’ enna’, bi’ sengko’ epateyana!"

³² "Aponapa me’ epateyana?" dhabuna Yonatan. "Sala ponapa?"

³³ Meyarsa partanya’an jareya Saul ngontallagi tombagga eacettagi ka Yonatan; Yonatan epateyana. Daddi Yonatan ngagali ja’ ramana pajat amaksod mateyana Daud onggu.

³⁴ Yonatan pas jaga, laju ondur dhari meja dhadha’aran jareya ta’ kalaban adha’ar pa-apa sakale e are se kapeng dhuwa’ e dhalem Paraya’an Bulan Ngodha jareya; panggaliyanna duka, arassa ngennes polana Daud eya-seya bi’ Saul, ramana.

³⁵ Kalagguwanna Yonatan meyos ka ra-ara apanggiya ban Daud menorot se la erembak e antarana se kadhuwa. Se meyos abakta na’-kana’ lake’ kasorang, dunorra,

³⁶ dhabuna Yonatan ka kana’ jareya, "Mara, kala’ na-pana se bi’ sengko’ epana’agiya." Teppa’na kana’ jareya berka’, Yonatan ngocol panana epangalebadi kana’ jareya.

³⁷ E bakto kana’ jareya napa’ ka kennengnganna pagaggarra pana jareya, Yonatan aera’, "E, pana jareya gaggar e jang dhissa’an!

³⁸ Abak duliyan, ja’ guk-magguk!" Kana’ jareya nolong pana gella’, pas abali ka kennengnganna lorana.

³⁹ Kana’ jareya ta’ ngarte apa maksodda dhabuna Yonatan gella’; se ngarte coma Yonatan ban Daud.

⁴⁰ Yonatan pas marengngagi gandhiba ban panana ka dunorra jareya, se pas epakon giba mole ka kottha.

⁴¹ Saellana kana’ lake’ gella’ la tadha’, Daud kalowar dhari budhina tombuganna bato, pas asojud ka tana tello kale. Daud ban Yonatan saleng seyom sambi padha nanges. Kasossa’anna Daud ngalebbi’i kasossa’anna Yonatan.

⁴² Yonatan pas adhabu ka Daud, "Moga-moga Allah kasokana nolong sampeyan. PANGERAN se nanggunga ja’ sampeyan sareng kaula sana’ poto teptebba neggu’i parjanjiyan se eocabbagi sampeyan sareng kaula e ajunanna Allah." Saellana jareya Daud laju nyengla dhari jadhiya, ban Yonatan gubar ka kottha.

1 Samuel

Video 1 Samuel 20

Ikuti Kami:

KONTAK | PARTISIPASI | DONASI