Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nini si Hanna ma bani tonggoni, “Marolob-olob do uhurhu ibagas Jahowa; timbul do tandukku ibagas Jahowa. Itartawai pamanganku do munsuhku, halani marmegah ni uhur ahu ibagas pangurupionmu.
2 Seng dong na pansing usih songon Jahowa, seng dong sobali Ham; seng dong batu gingging songon Naibatanta.
3 Ulang be sai mangenjeng marsahap, ulang be luar hata jungkat hun pamangan nasiam; ai Jahowa ai ma Naibata sibotoh haganup, anjaha Ia do sitimbang sagala pambahenan.
4 Ropukan-Ni do sior ni puanglima, tapi igonditi do bani hagogohon halak na sihol jomba.
5 Halak na bosur hinan gabe siparombou, tapi halak na lohean hinan, seng hurang be sipanganonni. Halak na lambang mantubuhkon pitu anak, tapi halak na ramos gabe punjung.
6 Jahowa do na mamunuh anjaha Ia do na pagoluhkon; Ia do na manampakkon hu tanoman anjaha na patangkogkon use.
7 Jahowa do sibahen na musil pakon sibahen na bayak, Ia do na patoruhkon, Ia do na pagijangkon.
8 Ia na papuhohon na musil hun orbuk; Ia patimbulhon na masombuh hun hubang, laho pahundulhon sidea rap pakon raja-raja, anjaha mamberehon bani sidea paratas hamuliaon. Ai Jahowa do simada tiang ni tanoh on, anjaha ipajonam i atas ni tanoh on.
9 Ia do manramotkon nahei ni halak na daulat bani; tapi siapkonon-Ni do ibagas hagolapan anggo halak parjahat; ai seng marhitei hagogohonni monang halak.
10 Sai na ropukkononkon do na mangimbang Jahowa, ipahata longgur-Ni dompak sidea i nagori atas; Jahowa do na manguhum ujung ni dunia on, ibere do hagogohon bani raja-Ni, anjaha ipagijang tanduk ni na niminakan-Ni.”
11 Dob ai mulak ma si Elkana hu rumahni i Rama, tapi marugas bani Jahowa do dakdanak ai i lobei ni Malim Eli.
12 Tapi halak na jahat do anak ni si Eli ai, seng parduli sidea bani Jahowa,
13 sonai homa parbagianan ni malim hun bani bangsa ai. Siap roh halak mamboan galanganni, roh ma juakjuak ni malim ai, sanggah manlompah gulei ai, mamboan garpu sitolu jari ibagas tanganni,
14 itobakkon ma ai hubagas hudon barang serek barang balanga barang hudon banggal, sagala na longkot hu garpu ai ibuat malim ai ma ai bani. Sonai do ibahen sidea hu bani ganup halak Israel, sagala na roh hu Silo manggalang.
15 Gari sanggah lape ope itutung taboh-taboh ai, domma roh juakjuak ni malim ai, anjaha nini ma dompak dalahi na manggalang ai, “Bere ma gulei in sigorengon ni malim ai, ai seng ra ia manjalo gulei na nilompah hun bamu, maningon na matah do.”
16 Anggo ihatahon halak ai bani, “Paturut lobei itutung taboh-taboh ai, dob ai buat ham ma bamu aha sir ni uhurmu.” Gabe ihatahon ma, “Lang, sonari do bereonmu. Anggo lang, marhitei paksa do buatonku in.”
17 Halani ai banggal tumang do dousa ni anak garama ai i lobei ni Jahowa; ai lambin hiri do galangan sipanganon bani Jahowa ibahen sidea.
18 Marugas i lobei ni Jahowa do anggo si Samuel, anjaha margonditkon epod hun bani hiou silopak do dakdanak ai.
19 Ibahen inangni do homa bani sada baju na etek-etek, na binoanni bani siap tahun, sanggah na tangkog ia rap pakon paramangonni laho manggalangkon galangan tahunan.
20 Jadi ipasu-pasu si Eli do si Elkana pakon parinangonni ai, nini ma, “Sai ibere Jahowa ma ginompar bamu hun bani parinangonmu on, gantih ni na dob niondoskonni bani Jahowa.” Dob ai mulak ma sidea hu iananni.
21 Jadi itumpak Jahowa ma si Hanna use, gabe boratan rumah ma ia, anjaha itubuhkon ope tolu anak pakon dua boru; tapi magodang i lobei ni Jahowa do anggo si Samuel.
22 Tapi domma matua tumang anggo si Eli, anjaha ibogei do ganup na binahen ni anakni ai hu bani ganup halak Israel, pakon na hinasomanan ni sidea ai naboru modom, na marugas i lambung labah ni lampolampo partumpuan ai.
23 Jadi nini ma dompak sidea, “Mase sonin ibahen hanima? Ai hubogei do pambahenannima na jahat in hun bani ganup bangsa in.
24 Ulang sonai anakku! Ai seng barita na madear na hubogei ai, ierap-erapkon bangsa ni Naibata i darat-darat in.
25 Anggo mardousa jolma hu bani hasomanni, Naibata do pangadu-aduanni; tapi anggo dompak Jahowa jolma in mardousa, tor ise ma pangaduanni?” Tapi seng itangihon sidea sora ni bapa ni sidea ai; ai sihol bunuhon ni Jahowa do sidea.
26 Tapi anggo si Samuel na poso ai, lambin magodang ma, marosuh do uhur ni Jahowa pakon jolma mangidahsi.
27 Dob ai roh ma sada halak ni Naibata hu bani si Eli, anjaha nini ma hu bani, “Sonon do hata ni Jahowa, “Ai lang Hupatalar do diring-Ku hu bani ginompar ni ompungmu, sanggah i Masir ope sidea, ibagas rumah ni Parao,
28 anjaha Hupilih ia Bangku hun bani ganup marga ni halak Israel gabe malim laho manggalang bani anjapanjap-Ku, manutung dahupa, mamahei epod i lobei-Hu, anjaha Hubere do hu bani ginompar ni ompungmu haganup galangan situtungon ni halak Israel.”
29 Mase ma hiri ibahen hanima galangan sisayaton pakon galangan sipanganon-Kai, na Huparentahkon ai, anjaha sangapan anakmu hun Bangku ibahen ho, marhitei na pamomburhon dirinima marhitei gori sidearan hun bani ganup galangan, na ginalangkon ni bangsang-Ku halak Israel?
30 Halani ai sonon do hata ni Jahowa, Naibata ni Israel, “Domma Huhatahon hinan ginomparmu pakon ginompar ni bapamu marugas i lobei-Hu ronsi sadokah ni dokahni,” tapi sonari, nini Jahowa do, ʻDaoh ma in hun Bangku. Tapi barang ise na pasangap Ahu marsangap bahenon-Ku; na pahiri Ahu, mahiri bahenon-Ku.”
31 Tonggor ma, na roh ma panorangni, rotapon-Ku ma tanganmu pakon tangan ni ginompar ni bapamu, ase ulang adong be na sayur matua ibagas rumahmu.
32 Jadi subil ma uhurmu mangidah ganup na madear, na Hubahen hu bani halak Israel; anjaha seng dong na sayur matua i rumahmu ronsi sadokah ni dokahni.
33 Anjaha sahalak hansa hunbam, na so Hurotapkon hun bani anjapanjap-Ku, ase bosol matamu anjaha mandolei uhurmu ibahen; tapi ganup ginomparmu na legan ai, maningon matei do bahenon ni podang ni halak.
34 Anjaha on do na sihol masa hu bani anakmu na dua ai, si Hopni pakon si Pinehas, maningon matei sidea ibagas na sadari.
35 Tapi pajongjongon-Ku ma Bangku sada malim hatengeran, na mangkorjahon na romban ibagas uhur-Hu pakon na ibagas tonduy-Hu, anjaha pajongjongon-Ku ma bani sada rumah na totap, ase marugas ia i lobei ni halak, na dob Huminaki sadokah ni dokahni.
36 Anjaha sagala na tading hun bani ginomparmu, maningon roh marsombah hu bani laho mangindo duit barang ruti sangkibul, anjaha nini ma, “Pabangkit ma ahu hu bani horja hamalimon, ase boi panganonku sansayat ruti.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA