Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Hana pas adu’a, oca’na, "PANGERAN maperak tang ate; se elampa’agi Salerana masenneng tang pekker! Kalaban ate gumbira sengko’ bi-nyebbi tang moso, sabab Allah la ongguwan nolong sengko’.

² Tadha’ se socce kantha PANGERAN! Pera’ Salerana se apareng parlindhungan.

³ Ambuwi sebballa se tadha’ ollena jareya, ja’ paterros se sombong cacana! Sabab PANGERAN reya Allah se ngagali sakabbinna, ban se ngadili sakabbinna tengkana manossa.

⁴ Gandhibana pahlawan la padha potong, tape atamba kowat oreng se lo’lo’.

⁵ Oreng se lamba’na kennyang ta’ kakorangan kakanan, sateya daddi oreng derrebban pera’ parlo nyareya essena tabu’na. Tape se lamba’na kalaparan, sateya ta’ kakorangan kakanan. Binena oreng se jubeng, sateya perak, andhi’ ana’ papetto’ bannya’na. Tape babine’ se bannya’ ana’na, sateya ana’na tadha’ karena.

⁶ PANGERAN se mate’e ban se maodhi’ pole. Matoron manossa ka dunnyana oreng mate. Ban ngangka’ oreng dhari jadhiya.

⁷ Badha oreng se epamesken, badha keya se epasogi. Badha se erendha’agi, badha keya se epatenggi.

⁸ Oreng se mesken eangkes dhari kasossa’an, se nespa epakalowar dhari kasangsara’anna. Reng-oreng jareya epadaddi kancana reng-oreng bangsawan, sarta eparenge lalakon kahormadan. Langganna bume reya kaagunganna PANGERAN, e attasanna epaddeggi dunnya reya.

⁹ Oreng se esto aman saterrossa e dhalem parlindhunganna Pangeran. Tape reng-oreng se jahat epamosna e dhalem papetteng se calemot parana. Kakowadan dibi’ ta’ ekenneng andellagi, kakowadanna manossa ta’ madhateng kamennangan.

¹⁰ So-mosona PANGERAN padha ancor, kabbi padha tako’; ngedhing sowarana dhari langnge’ akantha galudhuk magundhek bume. PANGERAN ahakimana manossa sadunnya reya, marengana kakobasa’an se molja ka to-rato peleyanna."

¹¹ Elkana pas abali mole ka Rama, tape Samuwel edina e Silo, aladine PANGERAN sambi ejaga Imam Eli.

¹² Tra-pottrana Eli ce’ jahadda. Padha ta’ parduli ka PANGERAN,

¹³ daddi imam ngala’ sakarebba dibi’ ka bangsa Isra’il. Ompamana mon badha oreng ngatorragi kurban, oreng se nolonge imam nyander sambi ngeba garpu se agigi tello’. Teppa’na dagingnga ekella,

¹⁴ garpuna ejujjuwagi ka dhalem panci se epangellae daging jareya, apa’a bai se cekka’ ka garpu jareya daddi andhi’na imam. Reng-oreng Isra’il se entar ngatorragi kurban ka Silo epakantha jareya kabbi.

¹⁵ La’-mala’ dhang-kadhang oreng se abanto imam jareya nyander sabellunna gajina daging jareya epalaen se eobbara, pas ngoca’ ka reng-oreng se ngatorragi kurban jareya, "Atorragi daging se gi’ matta ka imam me’ olle epanggang; imam ka’issa’ ta’ kasokan daging kella."

¹⁶ Mon oreng jareya nyaot, "Langkong sae noro’ atoran se lerres saos, gajina obbar dhimen; saamponna ganeka pondhut se ka’imma se ekasokane," oreng jareya tanto ngoca’ kantha reya, "Bunten! Atorragi samangken jugan! Mon bunten, bi’ kaula epaksa’a."

¹⁷ Dusana tra-pottrana Eli jareya ce’ rajana e dhalem pangoladanna PANGERAN, sabab ta’ ngargai kurban se eatorragiya ka PANGERAN.

¹⁸ Sabatara jareya, Samuwel se gi’ kana’ rowa terros aladine PANGERAN. Kalambina dhari kaen linen, padha ban kalambi se malolo eangguy imam e dhalem kabakteyan.

¹⁹ Sabban taon ebuna agabay juba ne’-kene’, pas ebagi ka Samuwel mon ebuna jareya teppa’na entar ngaterragi kurban taonan abareng ban lakena.

²⁰ Eli pas aberkadi Elkana ban binena sambi adhabu, "Moga-moga PANGERAN marengana ba’na ana’ sabannya’na dhari binena reya, menangka gantena ana’na ba’na se eatorragi ka PANGERAN reya." Saellana jareya Elkana ban binena pas mole ka Rama.

²¹ Hana eberkadi PANGERAN, pas rembi’ pole lalake’ katello ban babine’ kadhuwa. Samuwel atamba raja sabatara aladine PANGERAN.

²² Eli la ce’ seppona. Salerana ros-terrosan meyarsa cacana oreng parkara tengkana tra-pottrana ka oreng Isra’il. Eli ngagali keya ja’ tra-pottrana jareya tedhung apolong ban babine’an se atugas e adha’na labangnga Kemah Paseban Socce.

²³ Daddi Eli pas adhabu ka tra-pottrana, "Sengko’ ngedhing dhari sakabbinna ommat Isra’il parkara tengkana ba’na se jahat. Arapa ba’na me’ kantha jareya?

²⁴ Mara ambuwi, na’. Ce’ juba’na onggu cacana ommadda PANGERAN parkara ba’na!

²⁵ Mon oreng andhi’ sala ka oreng laenna, gi’ ekenneng billai bi’ Allah; tape mon oreng andhi’ dusa ka PANGERAN, sapa se nolongana?" Tape tra-pottrana jareya ta’ endha’ ngedhingngagi babala’anna Eli, ramana, sabab PANGERAN la motossagi mateyana se kadhuwa jareya.

²⁶ Sabaligga na’-kana’ se anyama Samuwel rowa, sajan abit sajan raja ban sajan ekaleburi bi’ PANGERAN, bariya keya bi’ sakabbinna oreng.

²⁷ E settong are badha nabbi manggi’i Eli manapa’ dhabuna PANGERAN, ca’na dhabuna nabbi jareya, "E bakto bangatowana ba’na, iya areya Harun, ban ana’ binena ekadunor rato Messer, Sengko’ la anyata’agi ka Harun sapa Sengko’ reya.

²⁸ Dhari sakabbinna suku Isra’il Sengko’ mele kalowargana epadaddi Tang imam se aladinana Sengko’ e mezba, ngobbar dupa ban ngangguy efod mon acaca ban Sengko’. Balana Harun ban toronanna bi’ Sengko’ eberri’ ha’ ngala’ sabagiyan dhari kurban tor-ator se eobbar e mezba.

²⁹ Daddi, arapa ba’na me’ gi’ dhakka nangale’e ban-kurban se menorot Tang parenta eatorragi Tang ommat ka Sengko’? Arapa ba’na, Eli, me’ ahormadan ka na’-ana’na etembang ka Sengko’ ban norodi na’-ana’na jareya malempo aba’na bi’ bagiyan se paleng bagus dhari saneyap tor-atorra Tang bangsa ka Sengko’?

³⁰ Sengko’, Guste Allahna Isra’il, lamba’ la ajanji, ja’ kalowargana ba’na ban kaomma ba’na bi’ Sengko’ epadaddiya imam se aladinana Sengko’ salanjangnga. Tape sateya Sengko’ ta’ terro se kantha’a jareya! Sabab pa’-sapa’a se ngargai Sengko’, bi’ Sengko’ earga’ana, tape pa’-sapa’a se ya-nyeya Sengko’, bi’ Sengko’ eya’-seya’a.

³¹ Edhingngagi, ya, e settong bakto Sengko’ mateyana sakabbinna lalake’ ngangodhadan e dhalem kalowargana ban margana ba’na, sampe’ tadha’ lalake’ e dhalem kalowargana ba’na se bisa’a odhi’ sampe’ towa.

³² Ba’na bakal arassa’a ngennes ban ere nangale’e sakabbinna berkat se ebagiya Sengko’ ka reng-oreng laen e Isra’il, mangkana sabala’anna ba’na dibi’ bakal mateya gi’ dha-ngodha kabbi.

³³ Tape, badha toronanna ba’na kasorang, bi’ Sengko’ epapagguna odhi’ epadaddiya imam se aladinana Sengko’. Tape oreng jareya bakal buta’a ban ta’ andhi’ pangarebban e dhalem odhi’na. Toronanna ba’na bakal epateyana oreng kabbi.

³⁴ Menangka bukte ja’ sabarang se ekoca’agi Sengko’ reya bakal kalakona kabbi, ana’na ba’na se kadhuwa, iya areya Hofni ban Pinehas bakal mateya e dhalem saare.

³⁵ Saellana jareya Sengko’ meleya imam se esto ka Sengko’ ban se ajalannagi sabarang se eparenta’agi bi’ Sengko’. Imam jareya bi’ Sengko’ eberri’ana na’ poto se bakal terrosa atugas daddi imam e adha’na to-rato Tang peleyan.

³⁶ Saneyap toronanna ba’na se gi’ odhi’, bakal entara ka imam jareya menta pesse ban kakanan, sarta menta sopaja eedine abanto para imam me’ olle bisa ngakan maske pera’ saompa’an."

1 Samuel

Video 1 Samuel 2

Ikuti Kami:

KONTAK | PARTISIPASI | DONASI