Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai nini si Samuel ma dompak si Saul, “Jahowa do marsuruh ahu maminaki ham gabe raja manggomgom bangsa-Ni halak Israel, on pe tangihon ham ma hata ni Jahowa.
2 Sonon do hata ni Jahowa Zebaot, ʻBalaskonon-Ku ma na binahen ni halak Amalek hu bani halak Israel, ai ma na iolat sidea i tongah dalan sanggah na tangkog sidea luar hun Masir.ʼ
3 On pe, laho ma ham, anjaha taluhon ham ma halak Amalek, anjaha siapkon ham ma sidea ampa na adong bani sidea; ulang ma hargahon ham sidea, tapi bunuh ham ma dalahi age naboru, dakdanak age na etek-etek, lombu age biri-biri, unta ronsi halode.”
4 Dob ai idilo si Saul ma bangsa ai, anjaha ibilang ma sidea i Telaim, dua ratus ribu halak sipardalan, anjaha sapuluh ribu halak hun Juda.
5 Dob ai das ma si Saul hu huta ni halak Amalek, anjaha ibahen ma paronggopan i habungan ai.
6 Jadi nini si Saul ma dompak halak Keni, “Laho ma, paholang ma, tuad ma nasiam hun tongah-tongah ni halak Amalek, ase ulang husiapkon nasiam rap pakon sidea; ai mardear layak do nasiam bani halak Israel, sanggah tangkog sidea luar hun tanoh Masir.” Jadi ipaholang halak Keni ai ma dirini hun tongah-tongah ni halak Amalek.
7 Jadi italuhon si Saul ma halak Amalek ai, singgan ni Havilla das hu Sur, na hampit hapoltakan ni tanoh Masir.
8 Dob ai itangkap ma si Agag, raja ni halak Amalek ai, manggoluh, tapi ganup do bangsa ai isiapkon bani podang.
9 Tapi ilaosi si Saul pakon bangsa ai do si Agag, biri-biri sijengesan ampa lombu, pinahan-pinahan na pinamombur ampa biri-biri, seng ra sidea mansiapkon ai; tapi sagala na bajan anjaha na so marharga isiapkon sidea do.
10 Dob ai roh ma hata ni Jahowa hu bani si Samuel,
11 “Husolsoli do diring-Ku pabangkitkon si Saul gabe raja, ai domma marbalik ia hun Bangku, anjaha seng iramotkon hatang-Ku.” Jadi borit manringis tumang ma uhur ni si Samuel, anjaha dilo-dilo ma ia hu bani Jahowa layur sabornginni ai.
12 Dob ai ipagirah si Samuel ma puho laho manjumpahkon si Saul girah sogod; anjaha adong do halak na patugahkon hu bani si Samuel, “Domma das si Saul hu Karmel, anjaha tonggor ma, ipajongjong do bani sada tanda pardingatan; dob ai mulak ma ia, mandipar laho tuad hu Gilgal.”
13 Jadi dob das si Samuel hu bani si Saul, nini si Saul ma hu bani, “Sai ipasu-pasu Jahowa ma ham; domma hupasaud hata ni Jahowa.”
14 Tapi nini si Samuel ma, “Sora ni biri-biri na mahua do ai gatni na das hu pinggolhon, anjaha parumboh ni lombu na mahua do na hubogei ai?”
15 Nini si Saul ma, “Na binoan ni sidea do ai hun bani halak Amalek; ai ipilih bangsa in do biri-biri pakon lombu sidearan bahen sigalangkonon bani Jahowa Naibatamu; na legan ai isiapkon hanami do.”
16 Dob ai nini si Samuel ma dompak si Saul, “Sungkup ma in! Sihol do patugahonku bamu na hinatahon ni Jahowa bangku na borngin.” Jadi nini ma mambalosi, “Hatahon ham ma!”
17 Dob ai nini si Samuel ma, “Ai lang sonon do, sanggah etek ham nini uhurmu, ijai do ham gabe pambobai ni marga ni halak Israel? Iminaki Jahowa do ham gabe raja, manggomgom halak Israel.
18 Anjaha isuruh Jahowa do ham bingkat, nini, ʻLaho ma ho, siapkon ma halak pardousa, halak Amalek ai, anjaha porang ma sidea, ronsi bois sidea ibahen ho.ʼ
19 Mase ma lang itangihon ham hata ni Jahowa, tapi rahanan ham mangayob taban-taban, anjaha ibahen ham sogam ni uhur ni Jahowa?”
20 Dob ai nini si Saul ma dompak si Samuel, “Hubalosi do sora ni Jahowa. Hudalankon do parentah na niondoskon ni Jahowa bangku. Huboan do hujon si Agag, raja ni halak Amalek ai, anjaha husiapkon do halak Amalek ai.
21 Anggo ibuat bangsa in pe hun bani taban-taban ai, biri-biri pakon lombu sidearan hun bani sisiapkonon ai hinan, bahen galangan bani Jahowa Naibatamu do ai i Gilgal.”
22 Dob ai nini si Samuel ma, “Mintor tumaram ma rosuhan uhur ni Jahowa mangidah galangan situtungon pakon galangan sipanganon, hun bani na manangihon sora ni Jahowa? Tonggor ma, dearan do na mambalosi hun bani galangan, pakon na marimbagaskon hun bani taboh-taboh ni biri-biri tunggal.
23 Ai usih bani dousa partondungon do pangengkaron, anjaha hahengkengon usih bani dousa parsombahon bani naibata na legan. Halani na niambukkonmu in hata ni Jahowa, ambukkonon-Ni ma ham hun bani harajaonmu.”
24 Dob ai nini si Saul ma dompak si Samuel, “Domma mardousa ahu, halani hulanggar hata ni Jahowa pakon hatamu; ai mabiar do ahu mangidah bangsa in, gabe hubalosi sora ni sidea.
25 On pe, sai marpangulaki ma uhurmu mangidah dousangkin, anjaha rap mulak ma hita, ase marsombah ahu bani Jahowa.”
26 Tapi nini si Samuel ma dompak si Saul, “Seng ra mulak ahu rap pakon ham, ai domma iambukkon ham hata ni Jahowa, anjaha domma iambukkon Jahowa ham hun bani na manggomgom halak Israel.”
27 Dob ai marhusor ma si Samuel sihol misir namin, tapi ijolom si Saul ma suhi-suhi ni bajuni, pala marigat.
28 Jadi nini si Samuel ma hu bani, “Domma irotapkon Jahowa Harajaon Israel hun bamu sadari on, anjaha ibere do ai hu bani hasomanmu na dearan paruhuranni hun bamu.
29 Ambah ni ai seng anjai marladung anjaha manosal Ia, hatengeran ni Israel, ai seng jolma Ia, gabe ra manosal.”
30 Dob ai nini si Saul ma, “Domma mardousa ahu, tapi pasangap ham ma ahu i lobei ni pangintuai ni bangsangkin pakon i lobei ni halak Israel. Rap mulak ma hita, ase marsombah ahu bani Jahowa Naibatamu.”
31 Jadi mulak ma si Samuel mangirikkon si Saul, gabe marsombah ma si Saul bani Jahowa.
32 Dob ai nini si Samuel ma, “Boan nasiam ma hujon si Agag, raja ni halak Amalek in.” Jadi roh ma si Agag hu bani ibagas hinsah ni uhur. Nini si Agag ma, “Tongon domma mandaoh hun bangku paet ni hamateian!”
33 Dob ai nini si Samuel ma, “Songon podangmu mambahen punu puang-puang, sonin do punu bahenonku inangmu i tongah-tongah ni sagala puang-puang.” Dob ai itoktoki si Samuel ma si Agag i lobei ni Jahowa i Gilgal.
34 Dob ai laho ma si Samuel hu Rama; anjaha si Saul pe laho ma hu rumahni hu Gibea huta ni si Saul.
35 Jadi seng be marsiidahan si Samuel pakon si Saul das hu bani ari parmateini, tapi pusok do uhur ni si Samuel mangidah si Saul, anjaha manosal do Jahowa, halani ipabangkit ia gabe raja manggomgom halak Israel.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA