Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 E settong are Samuwel mator ka Saul, "PANGERAN se makon abdidalem alanti’ junandalem daddi rato se marenta Isra’il ommattepon. Daddi, junandalem kodu meyarsa’agi dhabuna PANGERAN Se Mahakobasa.
2 PANGERAN ngokoma oreng Amalek, polana bangatowaepon alaban ka oreng Isra’il e bakto oreng Isra’il dhateng dhari Messer.
3 Daddi, ngereng serrang bangsa Amalek, paancor sadajaepon dhi’-andhi’na. Ja’ kantos badha se ceccer; pate’e sadajana oreng lalake’an, babine’an, na’-kana’ sareng babaji’; jugan sape, dumba, onta sareng hemarrepon."
4 Saul pas makompol tantarana, ban ebitong e Telaim; badha dhu ratos ebu oreng tantara Isra’il ban sapolo ebu oreng tantara Yehuda.
5 Saellana jareya Saul ban tantarana mangkat ka kotthana Amalek sarta pas ngamba’ moso e dhasarra songay se kerreng.
6 Salaenna jareya Saul akerem parengeddan ka oreng Keni, kantha reya essena, "Ondur, ja’ apolong ban oreng Amalek, me’ olle bi’ sengko’ ba’na ta’ epatompes epabareng ban oreng Amalek jareya, sabab lamba’ bangatowana ba’na noduwagi panarema’an se asobat ka oreng Isra’il e bakto oreng Isra’il dhateng dhari Messer." Daddi oreng Keni pas ondur dhari jadhiya.
7 Saellana jareya Saul aperrang ban oreng Amalek, makala oreng Amalek jareya e salanjangnga lorong dhari Hawila sampe’ ka Syur e temorra Messer.
8 Ra’yat ban tantarana Amalek bi’ Saul epate’e tape rato Agag, ratona oreng Amalek jareya pera’ epega’ dhi’-odhi’, ta’ epate’e. Bariya keya dumba ban sapena se paleng bagus, budhu’na sapena ban budhu’na dumbana se paleng lempo, ban sabarang se aji; se epate’e pera’ ebin se tadha’ gunana otaba se tadha’ argana.
9 (15:8)
10 Dhabuna PANGERAN ka Samuwel,
11 "Sengko’ kasta mele Saul epadaddi rato; sateya aoba ta’ atoro’ ka Tang parenta." Samuwel sossa, ban samalem benteng aserrowan ka PANGERAN.
12 Kalagguwanna gu-laggu, Samuwel entar nyare Saul. Ca’na oreng, Saul meyos ka kottha Karmel maddegga tugu kaangguy salerana dibi’, pas terros meyos ka Gilgal.
13 E baktona Samuwel la tapanggi ban Saul, Saul adhabu, "Moga-moga PANGERAN aberkadana panjennengngan! Kaula ampon ajalannagi papakonna PANGERAN."
14 Samuwel mareksane, "Manabi saka’dhinto, aponapa abdidalem me’ mereng monyena sape sareng dumba?"
15 Saodda Saul, "Ka’issa’ ban-keban ollena arampas dhari oreng Amalek. Dumba sareng sape se paleng sae sareng ra’yat ampon ekala’, ebadhiya kurban tor-ator ka GUSTE Allahna panjennengngan, se laenna ampon epate’e sadaja."
16 "Mangken dhimen," dhabuna Samuwel, "abdidalem matorragiya ka junandalem ponapa se edhabuwagi sareng PANGERAN ka abdidalem malemma." "Ngereng dhabuwagi," dhabuna Saul.
17 Dhabuna Samuwel, "Junandalem ka’dhinto gu ta’ ampon daddi pamimpinna ku-suku Isra’il, sanare junandalem apangrasa banne oreng penting. Sareng PANGERAN junandalem ampon epele epadaddi ratona bangsa Isra’il,
18 sarengngan pole junandalem eotos sareng PANGERAN kaangguy mate’e bangsa Amalek se jahat ka’dhissa’. Junandalem epakon aperrang kantos bangsa Amalek ka’dhissa’ tadha’ karena.
19 Aponapa junandalem me’ ta’ atoro’ ka dhabuna PANGERAN? Aponapa junandalem sareng ra’yat me’ padha arampas dhi’-andhi’na moso, se kadi ka’dhinto andaddiyagi dukana PANGERAN?"
20 Saodda Saul, "Kaula ampon atoro’ ka dhabuna PANGERAN, mangkat aperrang kadi se edhabuwagi ka kaula; Agag ratona bangsa Amalek sareng kaula ampon etawan, oreng Amalek ampon epate’e sadaja sareng kaula.
21 Namong ta’ sadajana ebin epate’e sareng reng-oreng se abanto kaula; reng-oreng ganeka mele dumba ban sape se paleng sae dhari sadajana rampasan, parlo ebadhiya tor-ator e Gilgal menangka kurban ka GUSTE Allahna panjennengngan."
22 Dhabuna Samuwel, "Se ka’dhimma se langkong ekasokane PANGERAN, etoro’ dhabuna ponapa eatore kurban tor-ator? Langkong sae atoro’ dhabuna etembang abakta kurban dumba se paleng sae.
23 Alaban ka Pangeran padha juba’na sareng oreng se ajalannagi seher, ate se sombong padha dusana sareng oreng se nyemba ka diba. Sarrena junandalem ta’ atoro’ ka papakonna PANGERAN, sareng Pangeran junandalem ta’ eakone rato pole."
24 Meyarsa dhabuna Samuwel jareya, Saul adhabu, "Enggi, lerres kaula pajat dusa. Kaula ta’ atoro’ ka dhabuna PANGERAN sareng ta’ merengngagi du-petoduna panjennengngan. Kaula tako’ ka reng-oreng se nolonge kaula sarta norodi karebba reng-oreng gapaneka.
25 Namong samangken, kaula nyo’ona sapora, ngereng panjennengngan abali ka Gilgal asareng kaula, sopaja kaula kenenga abakte ka PANGERAN."
26 Tape Samuwel nyaot, "Abdidalem ta’ abaliya asareng junandalem. Junandalem ta’ atoro’ ka papakonna PANGERAN, samangken PANGERAN ta’ ngakone junandalem menangka ratona bangsa Isra’il."
27 Samuwel pas abalik ondura, tape bi’ Saul etagenne jubana sampe’ juba jareya beddha.
28 Dhabuna Samuwel ka Saul, "E are mangken PANGERAN ampon nyebbit karaja’an Isra’il dhari junandalem, eparengngagiya ka oreng laen se asaeyan dhari junandalem.
29 Allahna ommat Isra’il Se Molja ta’ lecegan sarengngan ta’ ngoba panggaliyannepon, sabab Allah ka’dhinto banne manossa."
30 "Kaula dusa," dhabuna Saul, "namong kaula nyo’ona tolong ka panjennengngan, ngereng abali asareng kaula sopaja kaula bisa’a abakte ka GUSTE Allahna panjennengngan. Kalaban sapaneka panjennengngan ngormadi kaula e adha’na para pamimpinna bangsa kaula sareng e adha’na sadajana ommat Isra’il."
31 Daddi Samuwel abali abareng Saul ka Gilgal, ban Saul pas abakte ka PANGERAN.
32 "Sateya Rato Agag giba dha’ enna’," dhabuna Samuwel. Agag nyander kalaban pangarep se raja e dhalem atena, sabab apekker bariya, "Tantona babaja maot la lebat!"
33 Samuwel pas adhabu, "Peddhangnga ba’na andaddiyagi bannya’ ebu kaelangan ana’na, bariya keya sateya ebuna ba’na bakal kaelangana ana’na." Ban Samuwel Agag jareya pas ecacca e adha’na mezba e Gilgal.
34 Samarena jareya Samuwel meyos ka Rama, ban Rato Saul gubar ka kalenggiyanna e Gibeya.
35 Sampe’ seda Samuwel ta’ tao tatemmo pole ban Saul; tape Samuwel sossa polana PANGERAN kasta mele Saul epadaddi rato Isra’il.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA