Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 E settong are Yonatan adhabu ka oreng ngodha se ngeba’agi sanjatana, "Mara ja’ entara ka parkemahanna Filistin e dhissa’ rowa!" Tape Yonatan ta’ nyo’on edi ka ramana.
2 E bakto jareya Saul teppa’na badha e babana bungkana dalima e Migron, ta’ jau dhari Gibeya. Ra’yat se ngereng ka jadhiya badha ra-kera nem atos oreng.
3 (Imam se ngagem efod iya areya Ahiya pottrana Ahitub, taretanna Ikabod pottrana Pinehas, dineng Pinehas reya pottrana Eli, imamma PANGERAN e Silo.) Ra’yat ta’ tao keya ja’ Yonatan meyos dhari jadhiya.
4 Mon terro napa’a ka parkemahanna Filistin jareya, Yonatan kodu lebat e jalan se eapet gunong dhadhuwa’; gunong jareya agi’-reggi’, nyamana Bozes ban Sene.
5 Gunong karang se e dhaja ngadhep ka Mikhmas, ban se e lao’ ngadhep ka Geba.
6 Daddi Yonatan adhabu ka oreng ngodha jareya, "Mara ja’ entara ka eppossa oreng Filistin se kaper rowa. Pola PANGERAN me’ kasokan nolonge sengko’ ban ba’na. Sabab PANGERAN bisa apareng kamennangan; parkara orengnga bannya’ otaba sakone’, padha bai."
7 Ca’na oreng ngodha gella’, "Ponapa saos kasokanna junandalem, abdidalem ngereng dhabu."
8 "Iya, mara," dhabuna Yonatan. "Mon dhaggi’ alengka’a lorong, ba’na ban sengko’ ngaton bai ka oreng Filistin.
9 Mon bi’ oreng Filistin esoro ambu ban esoro anante’ sampe’ reng-oreng jareya nyander ka kennengnganna sengko’ ban ba’na, iya mara ambu e jadhiya, ta’ osa alengka lorong jareya.
10 Tape mon oreng Filistin nyoro sengko’ ban ba’na nyander ka kennengnganna, mara terros nyander, sabab jareya tandhana ja’ reng-oreng Filistin jareya bi’ PANGERAN la epassra’agi ka sengko’ ban ba’na."
11 E bakto se kadhuwa jareya ngaton ka reng-oreng Filistin e eppos panjaga’anna, reng-oreng Filistin jareya ngoca’, "Abas, wa, badha reng-oreng Ibrani kalowar dhari bang-lobang pangetegganna!"
12 Saellana jareya reng-oreng jareya pas aera’ ka Yonatan ban barengnga, "Mara dha’ enna’, sengko’ badha se epataowa ka ba’na." Dhabuna Yonatan ka oreng ngodha gella’, "Mara noro’, sabab reng-oreng Filistin la epassra’agi ka Isra’il."
13 Yonatan arangka’ ka attas etoro’ bunte’ oreng ngodha gella’. E bakto Yonatan ngaton, terros mokole reng-oreng Filistin sampe’ ngalotor, pas epate’e bi’ oreng ngodha se badha e budhiyanna.
14 E dhalem serrangan se dha’-adha’ jareya Yonatan ban oreng ngodha gella’ ngenneng mate’e ra-kera dhu polo oreng e dhaera se lebarra saparapat hektar.
15 Kadaddiyan jareya mabaridhu reng-oreng Filistin e parkemahanna ban e lon-talon. Ra’yat Filistin ban pos-eppos panjaga’anna sarta ngan-rombonganna rampogga padha katako’en kabbi; la’-mala’ bume agundhek ban oreng ce’ baridhuna.
16 Sabatara jareya tantarana Saul se ajaga e Gibeya e dhaera Benyamin, nangale’e oreng Filistin buru san-kassannagi kabingongen.
17 Dhabuna Saul ka reng-orengnga, "Bitong sakabbinna tantara, pareksa sapa se tadha’." Papakon jareya ejalannagi, pas etemmo ja’ Yonatan ban oreng ngodha se ngeba’agi sanjatana padha tadha’.
18 "Efod jareya giba dha’ enna’," dhabuna Saul ka Imam Ahiya. (E are jareya Ahiya se abakta efod jareya e adha’na oreng Isra’il.)
19 E bakto Saul teppa’na adhabu ka imam jareya, kabadha’an e parkemahanna oreng Filistin sajan baridhu, daddi Saul adhabu ka imam gella’, "Sateya la ta’ sempat pole nyo’ona petodu ka Pangeran!"
20 Daddi Saul ban ra’yadda terros maju ka medan paperrangan. E jadhiya Saul ban reng-orengnga padha nangale’e reng-oreng Filistin salbut, saleng serrang ban saleng pate’e sakanca’an.
21 Reng-oreng Ibrani se badha e dhaerana oreng Filistin ban se la noro’ tantarana Filistin, abalik agabung ka Saul ban Yonatan.
22 Bariya keya reng-oreng Isra’il se ngetek e mo’-gumo’ Efraim, se ngedhing ja’ oreng Filistin padha buru, pas agabung noro’ nyerrang oreng Filistin.
23 Reng-oreng jareya terros aperrang e salanjangnga lorong sampe’ ngalebadi Bet-Awen. PANGERAN masalamet Isra’il e are jareya.
24 E are jareya reng-oreng Isra’il lo’lo’ badanna polana lapar, sabab Saul asompa kantha reya, "Ta’ salamet reng-oreng se kan-ngakan e are teya sabellunna sengko’ males sake’na tang ate ka tang moso." Daddi tadha’ oreng kan-ngakan e are jareya.
25 Saellana jareya reng-oreng jareya napa’ ka settong alas; e jadhiya bannya’ madduna,
26 tape tadha’ oreng se bangala ngakan maddu jareya, polana tako’ ka babastonna Saul.
27 Tape Yonatan ta’ ngagali ja’ ramana abasto kantha jareya ka ra’yadda; daddi kalapkabanna maddu jareya egai’ ban tekkenna, madduna epondhut, pas edha’ar. Salerana pas arassa segger tor kowat.
28 Saellana jareya badha tantarana se mator kantha reya, "Sadajana oreng ka’dhinto ampon ta’ gadhuwan kakowadan polana lapar. Namong ramaepon junandalem abasto kadi ka’dhinto, ‘Ta’ salamet reng-oreng se kan-ngakan e are teya.’"
29 Dhabuna Yonatan, "Ce’ paranana onggu rama reya ka tang bangsa! Mara abassagi sengko’ sateya! Sengko’ atamba kowat samarena ngakan maddu rowa.
30 Saompamana e are teya ra’yat eedine ngakan kakanan ollena arampas e bakto makala moso, tantona oreng Filistin se ekenneng pate’e jang bannya’an pole!"
31 E are jareya oreng Isra’il makala oreng Filistin saellana aperrang e salanjangnga jalan dhari Mikhmas sampe’ ka Ayalon. Tape samarena jareya reng-oreng jareya pas ce’ lessona polana lapar.
32 Daddi kabbi pas padha saleng rebbu’ ngala’ rang-barang rampasan hasella arampas dhari moso; badha se ngala’ dumba ban sapena pas esambelli e jadhiya keya, dagingnga maske gi’ badha dharana terros ekakan e jadhiya.
33 Pas badha oreng se areppot kantha reya ka Saul, "Guste, ra’yat dusa ka PANGERAN, neddha daging se gi’ badha dharana." "Ba’na reya kiyanat!" dhabuna Saul atharat. "Gulu’agi bato se raja dha’ enna’."
34 Saellana jareya pas adhabu pole ka reng-oreng se ngeba kabar gella’, "Mara ba’na mencar, kabala ka ra’yat sape ban dumbana soro giba dha’ enna’, soro sambelli e attassa bato reya pas soro kakan e dhinna’; kalaban cara se kantha jareya reng-oreng jareya ta’ ngakan daging se badha dharana ban ta’ dusa pole ka PANGERAN." E malem jareya keya ra’yat ngeba ban-keban rampasanna, pas esambelli e jadhiya.
35 Saul pas maddek mezba se eatorragi ka PANGERAN; jareya mezba se epaddek Saul dha’-adha’ kadibi’.
36 Saul pas adhabu ka tantarana, "Mara dhaggi’ lem-malem nyerrang oreng Filistin sambi rampok kabbi sampe’ lagguna, orengnga pate’e kabbi." Saodda tantarana, "Ngereng, ponapa saos se eanggep sae sareng junandalem" Tape imam adhabu, "Ngereng nyo’on petoduna Allah dhimen."
37 Daddi Saul pas mator ka Allah, dhabuna, "Ponapa kengeng abdidalem nyerranga oreng Filistin? Ponapa oreng Filistin sareng Junandalem epassra’agiya ka Isra’il?" Tape e are jareya Allah ta’ adhabu pa-apa.
38 Daddi Saul adhabu ka para pamimpinna ra’yat, "Mara dha’ enna’ kabbi; mara pareksa apa dusana ba’na kabbi are teya.
39 Sengko’ ajanji kalaban asmana PANGERAN se odhi’, se la apareng kamennangan ka Isra’il, ja’ sapa’a bai se sala eokoma mate, sanajjan oreng jareya Yonatan, tang ana’ dibi’ sakale." Tape tadha’ oreng se bangal nyaot.
40 Saul pas adhabu ka sakabbinna ra’yat Isra’il, "Ba’na kabbi manjeng e bagiyan dhinna’." Saodda ra’yadda, "Ngereng, ponapa saos se eanggep sae sareng junandalem."
41 Saellana jareya Saul pas adu’a, "Guste PANGERAN, Allahna Isra’il, aponapa are mangken Junandalem me’ ta’ kasokan nyaot? GUSTE, ngereng saodi abdidalem kalaban parantara’annepon to-bato se karamat ka’dhinto. Manabi se sala abdidalem otaba Yonatan, kasokana adhabu kalaban bato Urim, dineng manabi se sala ommat Isra’il, kasokana adhabu kalaban bato Tumim." Dhabuna PANGERAN noduwagi ja’ se sala Yonatan ban Saul; daddi ra’yat enyata’agi ta’ sala.
42 Dhabuna Saul, "Adhu, Guste, ngereng tantowagi, Yonatan ponapa abdidalem?" Yonatan se enyata’agi sala.
43 Dhabuna Saul ka Yonatan, "Dusa apa se la elakone ba’na?" Saodda Yonatan, "Kaula neddha maddu sakone’, se bi’ kaula ekala’ ngangguy konco’na tongket; kaula narema’a okoman pate."
44 Dhabuna Saul ka Yonatan, "Mon ba’na ta’ eokom pate, mandar sengko’ eokoma bi’ Allah, Yonatan!"
45 Tape ra’yat mator ka Saul, "Ponapa Yonatan eokoma mate? Mangkana Yonatan se maolle kamennangan se raja ka’dhinto. Bunten! Abdidalem sadaja ajanji kalaban asmana PANGERAN se odhi’, Yonatan ta’ kengeng kaelangan sanare namong obu’ salembar dhari serana. Sabab dhari partolongannepon Allah, Yonatan kengeng kamennangan e are mangken." Daddi Yonatan salamet dhari okoman mate etolong ra’yadda.
46 Saellana jareya oreng Filistin abali ka dhaerana dibi’ sabab bi’ Saul ta’ eserser pole.
47 Saellana jumenneng rato Isra’il, Saul aperrang ka man-dhimman ban sakabbinna mosona Isra’il, iya areya oreng Mo’ab, oreng Amon ban oreng Edom, to-rato dhari nagara Zoba ban oreng Filistin. E dhimma’a bai se aperrang Saul masthe mennang.
48 Mon aperrang bangalan, sarta makala oreng Amalek ban mabebas Isra’il dhari kakobasa’anna rampok.
49 Pottra lalake’anna Saul iya areya Yonatan, Yiswi ban Malkisuwa. Pottra babine’anna se sareyang anyama Merab, ban se nomer dhuwa’ anyama Mikhal.
50 Rajina anyama Ahino’am, pottrana Ahima’as; panglimana tantarana iya areya Abner ana’na Ner, iya areya majadhi’na Saul.
51 Kis ramana Saul, ban Ner eppa’na Abner, padha pottrana Abiyel.
52 Salanjangnga odhi’na Saul ros-terrosan aperrang amba’ pate ban oreng Filistin. Daddi, mon Saul ngoladi oreng se badanna kowat ban bangalan, oreng jareya pas duli epadaddi tantarana.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA