Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 I bas sada wari nina Jonatan man anak perana si maba senjatana, "Ota lawes kita ngepar ku perkemahen kalak Pilisti ah." Tapi la ikataken Jonatan man Saul, bapana,
2 si sanga erkemah i teruh batang galiman i Migron, la ndauh i Gibea nari; lit enem ratus tentera ras ia.
3 (Imam si maba epod guna meteh sura-sura TUHAN eme Ahia, anak Ahitup senina Ikabot, anak Pinehas, kempu Eli, imam TUHAN i Silo.) La ieteh kalak ndai maka Jonatan nggo lawes.
4 I bas baluren dalan ku Mikmas, si arus ibentasi Jonatan gelah banci seh ku ingan kalak Pilisti erkemah, lit dua batu galang njurjur i bas lingling, sada arah kawes sada arah kemuhen baluren e; sada igelari Boses janah sada nari Sene.
5 Sada arah Utara baluren e, ngala ku Mikmas, janah sada arah Selatan, ngala ku Geba.
6 Nina Jonatan man anak perana ndai, "Ota ngepar kita ku ingan erkemah bangsa Pilisti si perbegu ah. Mbera-mbera TUHAN nampati kita kari. Adi bage, la lit kai pe si banci ngambati Ia mereken kemenangen man banta aminna gia la kita nterem."
7 Nina anak perana ndai ngaloi, "Kai pe atendu ibahanndu, aku tetap ras kam."
8 "Merandal," nina Jonatan. "Lawes kita ngepar janah si pediat idah kalak Pilisti kita.
9 Adi isuruhna kita nimai ia emaka ngadi kita i bas inganta.
10 Tapi adi isuruh kita lawes ndahi ia emaka berkat kita, sabap eme tandana maka TUHAN nggo mereken kemenangen man banta ngelawan ia."
11 Emaka ipelepasna bana idah bangsa Pilisti jenari nina bangsa e, "Nehenlah! Piga-piga kalak Heber ndarat i bas lubang inganna cebuni nari!"
12 Jenari erlebuh ia man Jonatan ras man anak perana e nina, "Mari ku jenda! Lit si man katanken kami man bandu!" Ikataken Jonatan man anak perana ndai nina, "Ikutken aku. TUHAN nggo mereken kemenangen man Israel ngelawan kalak ah."
13 Nangkeng Jonatan i bas baluren e nari cirawis-cirawis ku das, janah anak perana ndai ngikut arah pudina. Iserang Jonatan kalak Pilisti, idampeskenna ku taneh, jenari reh anak perana ndai munuhisa arah pudi.
14 I bas serangen si pemena e saja lit ibunuh Jonatan ras anak perana ndai kira-kira duapuluh kalak i bas ingan si belangna kira-kira seperempat hektar.
15 Kerina kalak Pilisti i bas mbalmbal e lanai kal langlang biarna; pasukan si nerang bage pe tentera si lit i bas kemah nggirgir perban biarna. Taneh pe mundu-undu, emaka bene kal ukurna.
16 Tentera Saul si erjaga i Gibea i daerah Benyamin ngidah kalak Pilisti kiamen lanai erturi-turin.
17 Emaka nina Saul man tenterana, "Beligai tentera e kerina jenari pepayo ise si lanai i je." Minter bage ibahanna janah tereteh man bana maka Jonatan ras anak perana si maba senjatana lanai i je.
18 "Baba epod ena ku jenda," nina Saul man Imam Ahia. (I bas wari e Ahia maba epod e i lebe-lebe bangsa Israel.)
19 Asum Saul sangana ngerana denga ras imam e, i bas ingan erkemah kalak Pilisti si nggo guntar e, erdekahna ergejekna, emaka nina Saul man bana, "Lanai sempat nungkun TUHAN!"
20 Kenca bage lawes ia ras tenterana ku pertempuren ngelawan bangsa Pilisti, si nggo si tampulen sapih-sapih ia perban bage nggo guntarna.
21 Piga-piga kalak Heber si gelgel nari arah pihak kalak Pilisti janah si nggo lawes ku bas ingan erkemah e ras ia, genduari nggo ka erbalik mulihken ukurna jenari ersada ia ras Saul ras Jonatan.
22 Si debanna, si mbarenda nggo cebuni i uruk-uruk Eperaim, megi maka kalak Pilisti sangana kiamen, emaka ia pe kerina reh nggabungken bana jenari iserangna kalak Pilisti.
23 Pertempuren e terus ngepari Bet-Awen. TUHAN ngkelini Israel i bas wari e.
24 I bas wari e nggo kote kalak Israel perban lihena, sabap Saul alu ersumpah nggo mereken perentah nina, "Sendah, ise saja kalak si man kai gia ope denga aku erbalas man musuhku la banci lang kena sumpah." Emaka la lit ise pe si man kai pe gedang-gedang wari e.
25 Emaka seh me ia kerina i bas sada kerangen janah melala i je tengguli.
26 Tuhu melala tengguli i bas kerangen ndai, tapi ise pe la lit si manca sabap mbiar ia kerina kena sumpah Saul.
27 Tapi la ibegi Jonatan bapana erbahan larangen man bangsa e alu sumpah, emaka ijukjukna alu ciken si ibabana, igedapkenna ujungna ku asar wani jenari ipanna tengguli ndai. Minter ergegehna akapna.
28 Tapi sekalak i bas ia nari ngataken, "Kerina nge kita kote perban lihena, tapi ilarang bapandu kami nina, 'Ise si man kai gia sendah la banci lang kena sumpah.'"
29 Ngaloi Jonatan nina, "Beneme bangsanta erkite-kiteken perbahanen bapangku. Nehenlah uga senangna dagingku kenca nggo kupan tengguli enda ndai sitik!
30 Ndauhkal min ndai ulin bangsanta ipelepas man nakan si ibuatna i bas musuh si italuken e. Nterem denga min ndai kalak Pilisti si banci ibunuhna!"
31 I bas wari e talu bangsa Pilisti ibahan bangsa Israel, iperangna mulai i Mikmas nari seh ku Ayalon. Tupung e kalak Israel seh kal kotena perban lihena.
32 Emaka kurang pedas akapna muati barang-barang rampasen i bas musuh e nari; ibuatna biri-biri ras lembu, minter igelehna i je, jenari ipanna dagingna ras dareh si lit denga i bas daging e.
33 Ituriken kalak man Saul, "Nehenlah, bangsa e nggo erdosa man TUHAN sabap ipanna daging ras darehna." Isergangi Saul kalak ndai nina, "Penghianat kam! Gulingken sada batu si galang ku jenda man bangku."
34 Kenca bage iperentahkenna ka tole, "Laweslah ku tengah-tengah kerina bangsa e jenari kataken man bana kerina maba lembu ras biri-birina ku jenda. Arus igelehna jenari ipanna i jenda; la banci ia erdosa man TUHAN erkite-kiteken man daging ras dareh." Emaka i bas berngi e kerina ia maba lembuna jenari igelehna i je.
35 Ipajekken Saul sada batar-batar man TUHAN, janah eme si pemena ipajekkenna.
36 Nina Saul man tenterana, "Ota kita ku berneh gelah siserang bangsa Pilisti nggo kenca berngi, sirampasi barangna seh siang erpagi-pagi, jenari sibunuh ia kerina." "Bahanlah kai iakapndu si mehulina," nina kalak ndai ngaloi. Tapi nina imam, "Marilah sisungkun lebe Dibata."
37 Emaka isungkun Saul me Dibata nina, "Banci ka nge kuserang kalak Pilisti? IberekenNdu nge man kami kemenangen?" Tapi la ijabap Dibata i bas wari e.
38 Kenca bage ikataken Saul man peminpin bangsa e nina, "Marilah ku jenda jenari cubaken pepayo dosa kai si nggo ilakoken sendah.
39 Erpadan aku i bas TUHAN si nggeluh si mereken kemenangen man Israel, maka kalak si ersalah la banci la ibunuh aminna gia ia anakku Jonatan." Tapi ise pe la lit si pang ngeranana.
40 Kenca bage nina Saul man bana kerina, "Kam kerina tedis arah ah, janah Jonatan ras aku tedis arah enda." "Bahanlah kai kap kam mehuli," nina kalak ndai ngaloi.
41 Nina Saul man TUHAN, Dibata Israel, "TUHAN, ngkai maka la IaloiNdu penungkunenku wari enda? TUHAN, Dibata Israel, aloilah aku arah batu si badia e. Adi kesalahen e kesalahen Jonatan ntah kesalahenku, jabaplah alu Urim, tapi adi kesalahen e kesalahen BangsaNdu Israel, jabaplah alu Tumim." Jabapna ngataken Jonatan ras Saul si ersalah, emaka bangsa e nggo terang la ersalah.
42 Kenca bage nina Saul, "Tentukenlah, anakku Jonatan ntah aku." Emaka Jonatan me si ituduhken.
43 Jenari nungkun Saul man Jonatan nina, "Kai nggo ibahanndu?" Erjabap Jonatan nina, "Nggo kupan sitik tengguli. Kuendesken diringku, aku nggo pang mate."
44 Nina Saul man bana, "Dibata gia si ngukum aku mate adi la kam kari ibunuh!"
45 Tapi nina bangsa e man Saul, "Arus kin Jonatan ibunuh? Adi nggo idatsa kemenangen si mbelin man bangsa Israel? Lang! Erpadan kami i bas TUHAN si nggeluh maka bukna selambar pe la banci naktak i bas takalna nari. Kai si nggo ibahanna sendah eme arah penampat Dibata." Bage me Jonatan itebusi bangsa emaka la ibunuh.
46 Kenca si e, ingadiken Saul ngayak-ayak bangsa Pilisti, jenari mulih bangsa Pilisti ku daerahna.
47 Kenca Saul jadi raja i taneh Israel iperangna kerina musuh-musuh i japa pe: bangsa Moap, Amon, ras Edom, raja-raja Soba, ras Pilisti. I japa pe ia erperang, ia tetap menang.
48 I bas peperangen icidahkenna maka ia kalak merawa janah kalak Amalek pe ngasup ia nalukenca. Iselamatkenna bangsa Israel i bas kerina serangen nari.
49 Anak Saul si dilaki eme Jonatan, Iswi, ras Milkisua. Gelar anakna si diberu sintua eme Merap, janah si peduaken Mihal.
50 Gelar ndeharana Ahinoam, anak Ahimas; puanglima tenterana seninana sembuyak bapa, Abner, anak Ner.
51 Bapa Saul eme Kis janah bapa Abner eme Ner, duana anak Abiel.
52 Kidekah nggeluh Saul terpaksa erperang alu mesangat ras kalak Pilisti. Emaka adi jumpa ia ras kalak si mbisa ntah merawa, minter ijadikenna jadi tenterana.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA