Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Samuwel pas adhabu ka sakabbinna bangsa Isra’il, "Apa pamentana ba’na bi’ sengko’ la etorodi. Sengko’ la ngangkat rato se marenta’a ba’na.

² Molae sateya rato jareya se mimpina ba’na. Mara abassagi, sengko’ la oban ban la towa. Sengko’ la ce’ abidda se mimpin ba’na — molae sengko’ gi’ ngodha sampe’ sateya. Buktena tang ana’ se la ja-raja reya.

³ Sateya sengko’ badha e dhinna’ e adha’na ba’na. Mon sengko’ andhi’ sala ka ba’na, koca’agi sateya e ajunanna PANGERAN ban e ajunanna rato peleyanna PANGERAN jareya. Apa sengko’ tao ngala’ sape otaba hemarra oreng? Pola sengko’ tao co-ngoco otaba nyeksa oreng otaba ngala’ sogo’? Mara koca’agi, sopaja pa-apa se ekala’ sengko’ bisa’a epabali sateya."

⁴ Reng-oreng jareya nyaot, "Bunten, panjennengngan ta’ oneng co-ngoco otabana nyeksa bangsa abdina; jugan ta’ oneng mondhut dhi’-andhi’na oreng."

⁵ Dhabuna Samuwel, "E are teya PANGERAN ban rato peleyanna daddi sakse ja’ sengko’ ta’ andhi’ sala pa-apa." "Lerres, Pangeran saksena," ca’na reng-oreng Isra’il.

⁶ Samuwel pas adhabu pole, "PANGERAN se mele Mosa ban Harun, ban se abakta bangatowana ba’na kabbi kalowar dhari Messer.

⁷ Sateya, nante’ gallu, ja’ duli nyengga. Sengko’ nyebbuddagiya kasala’anna ba’na e ajunanna PANGERAN. Kaenga’e sakabbinna kamora’anna PANGERAN ka ba’na ban ka bangatowana ba’na.

⁸ E bakto Yakub ban la-balana ngalle ka Messer, ban oreng Messer pas eseksa, bangatowana ba’na nyo’on partolongan ka PANGERAN; PANGERAN pas ngotos Mosa ban Harun. Mosa ban Harun jareya abakta bangatowana ba’na kalowar dhari Messer sarta nolong bangatowana ba’na jareya sampe’ bisa neptep e nagara reya.

⁹ Tape saellana jareya oreng Isra’il loppa ka PANGERAN, Allahna, daddi bi’ PANGERAN bangsa reya epanneng e bakto eserrang ban epakala Sisera, panglimana tantara Hazor, ban oreng Filistin sarta rato Mo’ab.

¹⁰ Saellana jareya oreng Isra’il adu’a ka PANGERAN ban ngakowe dusana, sambi ngoca’ kantha reya, ‘Abdidalem dusa polana mongkore Junandalem, GUSTE, sareng nyemba ka ca-arcana diba Ba’al sareng Asytoret. Namong samangken, abdidalem nyo’ona tolong pasalameddagi dhari moso, abdidalem ajanji ngabdiya ka Junandalem!’"

¹¹ PANGERAN pas ngotos Gideyon, samarena jareya pas Barak, pas Yefta, dhi-budhina sengko’. Sengko’ ban otosanna PANGERAN laenna se katello jareya padha nolong ba’na sampe’ salamet dhari moso ban odhi’ taremtem.

¹² Tape e bakto ba’na nangale’e ja’ eserranga Nahas rato Amon, ba’na ta’ ngakone PANGERAN menangka ratona, ban ba’na kabbi padha ngoca’ ka sengko’, ‘Abdina sadaja terro eparenta’a rato.’

¹³ "Sateya mara abas, reya’ rato peleyanna ba’na dibi’. Ba’na menta rato, ban PANGERAN la eparenge.

¹⁴ Ba’na tanto senneng odhi’na mon ba’na hormat ka PANGERAN ban ngabdi ka Salerana, sarta ngedhingngagi ban atoro’ ka papakonna, apa pole mon ba’na ban ratona teptep esto ka Guste Allahna.

¹⁵ Sabaligga, mon ba’na ta’ ngedhingngagi ka dhabuna PANGERAN, la’-mala’ alaban ka papakonna, ba’na sarta ratona tanto ekamoso bi’ PANGERAN.

¹⁶ Sateya, edhingngagi pole! Abassagi! PANGERAN mabadha’a kaajiban raja e adha’na ba’na.

¹⁷ Sengko’ nyo’ona ka PANGERAN, ban sanajjan sateya reya mosem nemor, PANGERAN bakal madhatengnga galudhuk ban ojan menangka tandha ja’ tang parnyo’onan ekabbuli. E bakto jareya, ba’na bakal apangrasa’a saapa dusana ba’na ka PANGERAN polana se menta rato."

¹⁸ Samuwel pas adu’a, ban e are jareya keya PANGERAN madhateng galudhuk ban ojan. Bangsa jareya padha tako’ kabbi ka PANGERAN ban ka Samuwel.

¹⁹ Atorra reng-oreng jareya ka Samuwel, "Nyo’ona tolong, Pa’, nyo’onnagi ka GUSTE Allahna panjennengngan, sopaja abdina sadaja ta’ kantosa mate. Samangken abdina apangrasa sadaja ja’ salaenna dusa se ba’-lamba’na, samangken atamba dusa pole polana nyo’on rato."

²⁰ Saodda Samuwel, "Ella, ta’ osa tako’. Maske ba’na la alako jahat, ja’ mongkore PANGERAN, papaggun ngabdi ka Salerana pagu-onggu.

²¹ Ja’ atoro’ ka ba-diba se ta’ bisa nolong ban masalamet ba’na, sabab sanyatana ba-diba jareya tadha’.

²² PANGERAN la asompa ta’ adinggallagiya ba’na sabab PANGERAN la motossagi ja’ ba’na kabbi epadaddiya ommadda dibi’.

²³ Parkara sengko’, moga-moga sengko’ ta’ dusa’a ka PANGERAN sabab ta’ adu’a nyo’onnagi ba’na ka PANGERAN. Sabaligga sengko’ terrosa keya ngajarragi parkara se becce’ ban bendher ka ba’na.

²⁴ Pahormat ka PANGERAN, paesto ban pagu-onggu ngabdi ka Salerana. Kaenga’e kon-lalakon raja se elampa’agi Salerana kaangguy kaparlowanna ba’na.

²⁵ Tape mon ba’na ros-terrosan agabay dusa, ba’na ban ratona tanto mate."

1 Samuel

Video 1 Samuel 12

Ikuti Kami:

KONTAK | PARTISIPASI | DONASI