Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kenca bage ikataken Samuel man bangsa kerina Israel nina, "Nggo kulakoken kai si ipindondu man bangku. Nggo kubereken man bandu raja si merentah kam,
2 janah genduari ia si minpin kam. Tapi aku nggo metua janah ubanen janah anak-anakku nggo ras kam. Aku nggo jadi peminpin mulai kin sanga aku nguda denga seh genduari.
3 Enda kap aku. Adi lit kin kubahan si salah, adukenlah aku genduari i lebe-lebe TUHAN ras raja si nggo IpilihNa. Lit kin nggo kubuat lembu ntah kalde kalak? Lit kin nggo kalak kutipu ntah kupaksa? Lit kin nggo kualoken sogok i bas ise nari gia? Adi lit kin nggo kulakoken apai gia i bas si enda nari, kugalari mulihken kai si nggo kubuat."
4 Nina bangsa njabapsa, "Lang, labo pernah kami itipundu ntah ipaksandu. Labo pernah ibuatndu kai pe i bas ise nari."
5 Emaka nina Samuel ka ngaloi, "TUHAN ras raja si nggo IpilihNa jadi saksi sendah maka sitik pe la lit idatndu kesalahen i bas aku." "Ue, TUHAN jadi saksi," nina kalak njabapsa.
6 Iterusken Samuel ngerana nina, "TUHAN kap si milih Musa ras Harun ras maba nini-ninindu ndarat i Mesir nari.
7 Genduari tedislah kam i bas inganndu sekalak-sekalak kerna perbahanen si mbelin si ilakoken TUHAN guna engkelini kam ras nini-ninindu.
8 Kenca Jakup ras keluargana lawes ku Mesir janah kalak Mesir maksa ia kerina, nini-ninindu nderkuh mindo penampat man TUHAN, jenari IsuruhNa Musa ras Harun maba ia ndarat i Mesir nari jenari ItamakenNa ia ringan i bas taneh enda.
9 Tapi bangsa e ngelupaken TUHAN Dibatanta, emaka IpelepasNa kalak Pilisti ras raja Moap bage pe Siseraken, puanglima tentera kuta Hasor erperang ngelawan nini-ninindu jenari italuken.
10 Kenca si e nderkuh ia mindo penampat man TUHAN janah nina, 'Kami nggo erdosa perban nilah kami i bas Kam nari, TUHAN, janah nembah man gana-gana Baal ras Astarte. Kelinilah i bas musuh-musuh kami nari gelah kami nembah man BaNdu!'
11 Emaka isuruh TUHAN me Gideon, kenca bage Barak, jenari Jepta, janah kedungenna aku. Sekalak-sekalak kami engkelini kam i bas musuh-musuhndu nari, emaka aman kam nggeluh.
12 Tapi asum idahndu maka Nahas, raja Amon nandangi nerang kam, itulakndu TUHAN jadi rajandu jenari ikatakenndu man bangku, 'Raja nge ate kami si merentah kami.'
13 Genduari enda me raja si ipilihndu; ipindondu ia, janah genduari nggo ibereken TUHAN ia man bandu.
14 Kerina pagi erdalan alu mehuli adi ipehagandu TUHAN Dibatandu, isembahndu Ia, ibegikenndu KataNa, ras ipatuhindu kerina PedahNa, bage pe adi kam ras rajandu ngikutken Ia.
15 Tapi adi la ibegikenndu TUHAN janah la ipatuhindu PedahNa, la banci la IlawanNa kam ras rajandu.
16 Dage, tedislah kam i bas inganndu sekalak-sekalak, gelah idahndu kejadin si mbelin si ibahan TUHAN AteNa.
17 Ma musim perlego kin genduari? Tapi ertoto ateku maka ibereken TUHAN lenggur ras udan. Adi jadi si enda ngaku me kam maka nggo ilakokenndu dosa si mbelin man TUHAN asum ipindondu man BaNa sekalak raja."
18 Emaka ertoto Samuel, jenari i bas wari e ka ibereken TUHAN lenggur ras udan. Erkite-kiteken si e kerina bangsa e mbiar man TUHAN ras man Samuel.
19 Emaka nina man Samuel, "Mindo kal kami gelah ertoto kam man TUHAN Dibatandu kerna kami gelah ula kami mate. Ngaku kami genduari maka kami nggo erdosa kal kerina. Tambah si e nggo ka kami erdosa alu mindo sekalak raja."
20 "Ula kam mbiar," nina Samuel njabapsa, "Aminna gia nggo ibahanndu perbahanen si jahat e, ula kam nilah i bas TUHAN nari, tapi sembahlah Ia alu bulat ukurndu.
21 Ula ikutken dibata-dibata si palsu; si e kerina la ngasup nampati kam, sabap labo ia lit.
22 Erkiteken GelarNa si mbelin, emaka labo kam ItadingkenNa, sabap nggo ItetapkenNa kam jadi BangsaNa jine.
23 Adi kerna aku, ula min ibere TUHAN aku erdosa man BaNa alu lanai ertoto kerna kam. Tapi ateku ngajarken man bandu kai si mehuli ras si benar guna idalankenndu.
24 Ikutkenlah TUHAN janah tetaplah sembah Ia asa ukurndu. Ingetlah kerina PerbahanenNa si mbelin si nggo IlakokenNa man bandu.
25 Tapi adi terus kam erdosa, kam ras rajandu la banci la ikernepken."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA