Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kenca bage ibuat Samuel sada botol minak saitun jenari icurcurkenna ku takal Saul iemana janah nina, "Iminaki TUHAN kam jadi raja i BangsaNa Israel. Irajaindu pagi BangsaNa janah ikawalindu bangsa e i bas kerina musuh-musuhna nari. Janah enda me tanda man bandu maka kam nggo ipilih TUHAN jadi raja i bas BangsaNa.
2 Kenca itadingkenndu aku sendah, ijumpaindu kari dua kalak dilaki deher kuburen Rahel i Selsa i bas daerah Benyamin. Ikatakenna kari man bandu maka kalde si idaramindu nggo dat, emaka bapandu lanai bo aru atena kerna si e, tapi kerna kam la erngadi-ngadi ia nungkun, 'Kai arus kubahan kerna anakku?'
3 I jenari terus kam lawes seh ku batang kayu si badia i Tabor. I je jumpa kam kari ras telu kalak dilaki muatna lawes ku Betel erbahan persembahen man Dibata. Sekalak kari negu telu kambing nguda, sekalak maba si ibahan i bas kuling-kuling nari dem isin lau anggur.
4 Ikatakenna kari mejuah-juah man bandu jenari iberekenna roti e dua ngkibul, janah la banci la ialokenndu.
5 Kenca bage terpaksa kam berkat ku Uruk Dibata i Gibea, ingan kalak Pilisti erkemah. I kerabangen kota simbel kam kari ras rombongen nabi-nabi i uruk persembahen e nari. Nabi-nabi e landek janah seko-serko, arah lebena erkata murdap, gendang, suling ras kulcapi.
6 Tupung e Kesah Tuhan ngkuasai kam jenari kam ngikuti landek ras serko jenari biakndu isalihken, jadi manusia si mbaru.
7 Kenca nggo jadi kerina si enda, lakokenlah kai saja si isuruh Dibata.
8 Leben kam lawes asa aku ku Gilgal; i je kujumpai kam janahku erbahan persembahen tutungen ras persembahen persadan. Timailah i je pitu wari seh aku reh gelah kukataken man bandu kai si man bahanen."
9 Asum Saul berkat nadingken Samuel, ibereken Dibata pusuh peraten si mbaru man Saul. Janah kai si nggo ituriken Samuel man bana jadi kerina i bas wari e.
10 Kenca seh Saul ras suruh-suruhenna i Gibea, sada terpuk nabi-nabi reh njumpai ia. Emaka rempet ia i kuasai Kesah Dibata, jenari ikutkenna kalak ndai landek-landek ras ersurak.
11 Kalak si gelgel nari ngidah ia erbahan si enda, emaka nungkun-nungkun ia sapih-sapih ia nina, "Kena kai nge anak Kis e? Nggo kin Saul jadi nabi?"
12 Sekalak dilaki si ringan i je nungkun nina, "Uga kerna nabi-nabi si deban enda? Ise kin iakapndu bapana?" Enda me bena-benana maka nggo jadi kuan-kuan, "Nggo kin Saul pe jadi nabi?"
13 Kenca Saul dung landek-landek ras ersurak, lawes ia ku batar-batar i das uruk.
14 Senina bapana ngidah Saul ras suruh-suruhenna e, emaka isungkunna ia duana nina, "I ja kam gelgel Nari" "Ndarami kalde," nina Saul ngaloi, "janah kenca la idat kami, lawes kami ndahi Samuel."
15 "Kai nina man bandu?" nina.
16 "Ikatakenna man kami maka asuh-asuhen e nggo dat," nina Saul ngaloi, tapi la ikatakenna man bana kai si nggo ikataken Samuel kerna ia jadi raja pagi.
17 Samuel ndilo bangsa e pulung ngadap TUHAN i Mispa.
18 Nina Samuel man bana kerina, "TUHAN, Dibata Israel ngataken, Kubaba kam ndarat i Mesir nari janah Kuselamatken kam i bas kalak Mesir ras i bas kerina bangsa si deban si nindih kam.
19 Aku kap Dibatandu, si ngkelini kam i bas kerina kesusahen ras kiniseranndu nari, tapi sendah nggo itulakndu Aku janah nggo ipindondu man bangKu gelah Kubereken man bandu sekalak raja. Adi bage kin kepe, pulunglah kam kerina i lebe-lebe TUHAN rikutken suku-suku ras terpukndu."
20 Kenca bage isuruh Samuel tep-tep suku ngadap, emaka ipilih TUHAN suku Benyamin.
21 Jenari isuruh Samuel terpuk-terpuk suku Benyamin ngadap, emaka ipilih me terpuk Matri. Kenca bage kerina dilaki i bas terpuk Matri reh ngadap, emaka Saul anak Kis terpilih. Idarami kalak ndai ia, tapi asum la ia jumpa ras Saul,
22 isungkun kalak ndai TUHAN nina, "Lit denga kin kalak si deban?" Nina TUHAN ngaloi, "Saul arah ah sangana cebuni arah pudi barang-barang."
23 Emaka kiam kalak ndai maba Saul ndarat ku tengah-tengah jelma si nterem, janah teridah man kalak ndai gedangen Saul sada takal asa kerina kalak si deban.
24 Ikataken Samuel man bangsa nina, "Enda me kalak si nggo ipilih TUHAN! La lit ise pe i bas kita bagi ia." Kerina bangsa e ersurak nina, "Mejuah-juahlah raja e!"
25 Kenca e iterangken Samuel man bangsa e hak-hak ras tugas sekalak raja, jenari isuratkenna i bas sada kitap, si isimpanna i bas ingan si badia. Kenca bage isuruhna kerina mulih.
26 Saul pe mulih ka ku Gibea. Piga-piga kalak si mbisa, si ukurna nggo ersuruh ibahan Dibata, ngarakken Saul.
27 Tapi lit piga-piga kalak si la erluhu ngerana nina, "I ja nge ngasup anak ah nampati kita?" Megombang ia man Saul janah la ibabana persembahen man bana.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA