Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai ibuat si Samuel ma sada guri-guri na marisi minak, iuseihon ma ai hu bani uluni, isummah ma ia anjaha ihatahon, “Jahowa do na mamminaki ham gabe pambobai ni bangsa-Ni, halak Israel. Ham ma na manggomgom bangsa ni Jahowa, anjaha ham ma na paluahkon sidea hun tangan ni munsuh ni sidea inggot. On ma tanda bamu, paboa Jahowa do na mamminaki ham gabe pambobai ni bangsa na niain-Ni ai.
2 Anggo domma laho ham holi hun lambungku, jumpah ham ma dua dalahi dohorhon tanoman ni si Rahel, i tanoh Benjamin, i Selsa, anjaha hatahonon ni sidea ma bamu, ʻDomma jumpah halode boru-boru na pinindahanmu ai, anjaha tonggor ma, seng be iuhurhon bapanta halode inʼ, tapi rusak do ia pasal nasiam, nini, ʻAha ma bahenonku pasal anakkai?ʼ
3 Dob ai toruskon ham ma dalanmu hunjai gabe das ma ham hu baringin Tabor, jumpah ham ma ijai tolu halak, na tangkog marayak Naibata hu Betel, sahalak mamboan tolu anak ni hambing, na sada nari mamboan tolu kibul ruti, anjaha na patoluhon mamboan gusi hulingkuling, na marisi anggur.
4 Jadi tabion ni sidea ma ham anjaha bereonni ma bamu dua kibul ruti, anjaha jalo ham ma ai hun tangan ni sidea.
5 Dob ai das ma ham hu Gibea-Elohim, ianan ni tangsi ni halak Palistim; anjaha dob das ham hubagas huta ai, pajumpah ma ham pakon satumpuan nabi, na tuad hun buntu-buntu ai mararbab, marsarune, martulila pakon marhusapi, anjaha manjahai ma sidea.
6 Jadi sogopan ni Tonduy ni Jahowa ma ham, gabe manjahai ma ham rup pakon sidea, jadi mubah ma ham gabe jolma na legan.
7 Jadi anggo domma masa tanda ai bamu, bahen ham ma barang aha na jumpah tanganmu, ai hasomanan ni Jahowa ma ham.
8 Dob ai palobei ham ma tuad hu Gilgal, anjaha tonggor ma, tuad pe ahu manjumpahkon ham laho manggalangkon galangan situtungon pakon galangan pardameian. Maningon pitu ari dokahni paimaonmu ahu paima roh ahu bamu, ase hupatuduhkon bamu sibahenonmu.”
9 Jadi dob tundal ia, laho hun bani si Samuel, gabe ibere Naibata ma bani uhur na legan; anjaha masa ma ganup tanda ai sadari ni ai.
10 Dob das sidea hu Gibea, tonggor ma, roh ma satumpuan nabi manjumpahkonsi; anjaha sogop ma Tonduy ni Naibata hu bani, lanjar manjahai ma ia i tongah-tongah ni sidea.
11 Anjaha dob iidah sagala na mananda si hinan ia manjahai rap pakon nabi-nabi, nini sidea ma samah sidea, “Aha do na masa hu bani anak ni si Kis? Dihut do homa si Saul masuk bani nabi-nabi?”
12 Jadi nini sahalak na hunjai ai ma, “Ai na sonaha do ge bapa ni sidea?” Halani ai do ase gabe umpama ia, ʻDihut do homa si Saul masuk bani nabi?ʼ
13 Dob maronti ia na manjahai ai das ma ia hu Gibea.
14 Dob ai nini tulang ni si Saul ma hu bani pakon hu bani juakjuakni ai, “Ai laho huja do hanima?” Nini ma mambalosi, “Laho mangindahi halode boru-boru namin.” Jadi dob itonggori hanami hape seng jumpah, gabe laho ma hanami hu bani si Samuel.
15 Dob ai nini tulang ni si Saul ma, “Mahua patugah ma hu bangku barang aha do na hinatahon ni si Samuel ai bennima.”
16 Jadi nini si Saul ma dompak tulangni ai, “Torang do ipatugah bennami, na dob jumpah do halode ai. Tapi anggo pasal harajaon ai, na hinatahon ni si Samuel ai, seng dong ipatugah hu bani.”
17 Dob ai idilo si Samuel ma bangsa ai roh marayak Jahowa hu Mispa.
18 Jadi nini ma dompak halak Israel, “Sonon do hata ni Jahowa, Naibata ni Israel, ʻAhu do na mangarahkon halak Israel luar hun tanoh Masir, anjaha Ahu do, na paluahkon hanima hun tangan ni halak Masir ampa sagala harajaon, na mangodohkon hanima.
19 Tapi domma iambungkon nasiam sadari on Naibata nasiam, na paluahkon nasiam hun bani hamagouan pakon hasosakan nasiam; ai nini nasiam do, ʻLang! Pabangkit ma bennami sada raja.ʼ On pe, jongjong ma nasiam i lobei ni Jahowa marsasamarga pakon marsasaribu.ʼ”
20 Dob ai ihatahon si Samuel ma roh hundohor haganup marga ni halak Israel, gabe hona ma marga Benjamin.
21 Dob ai ihatahon ma use roh hundohor haganup marga Benjamin marsasapangku, gabe hona ma pangku Matri; anjaha dob ihatahon roh hundohor pangku Matri, marsasahalak, gabe hona ma si Saul, anak ni si Kis. Jadi ipindahi sidea ma ia hape seng jumpah.
22 Jadi iulaki sidea ma use manungkun Jahowa, “Ai roh do ia hujon?” Nini Jahowa ma mambalosi, “Tonggor ma, marponop do ia i tongah-tongah ni parugasan.”
23 Jadi marlintun ma sidea mangalopisi hunjai. Jadi dob jongjong ia i tongah-tongah ni bangsa ai, taridah ma ganjangan do ia hun bani ganup bangsa ai, singgan ni abarani hu atas.
24 Dob ai nini si Samuel ma dompak ganup bangsa ai, “Domma iidah nasiam ia, ia ma ai na dob pinilih ni Jahowa. Seng dong na songonsi i tongah-tongah ni ganup bangsa in.” Jadi marsurak ma ganup bangsa ai, anjaha nini sidea ma, “Sai sayur ma manggoluh raja in!”
25 Dob ai ipatugah si Samuel ma hu bani bangsa ai uhum ni harajaon ai; isuratkon ma ai hubagas sada buku, anjaha itibalhon i lobei ni Jahowa. Dob ai isuruh si Samuel ma ganup bangsa ai hu rumahni bei.
26 Sonai homa si Saul mulak ma hu rumahni hu Gibea, itaruhkon bala, na dob pinuhoan ni Naibata paruhuran ni sidea.
27 Tapi adong do halak parjahat na mangkatahon, “Sonaha ma parpaluah ni halak on banta?” Mapas do uhur ni sidea mangidahsi; seng ra sidea mamboan siluah bani. Tapi ipakulah si Saul do songon na so ibogei hata ai.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA