Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kenca ipajekken Raja Salomo Rumah Pertoton ras istana ras kerina si surakenna majekkenca,
2 TUHAN ncidahken BaNa ka man Salomo, bagi si IbahanNa i Gibeon.
3 Nina TUHAN, "Nggo Kubegi pertotonndu. Kupebadiaken Rumah Pertoton enda, si nggo ipajekkenndu man inganKu arus isembah rasa lalap. Kutatap dingen Kukawali Rumah e katawari pe.
4 Adi kam nggeluh i bas adep-adepenKu alu bujur dingen pinter ukur, bagi si ibahan bapandu Daud, janah adi ikutkenndu Undang-undangKu ras ilakokenndu si nggo Kupedahken man bandu,
5 la banci lang Kusehken padan si nggo Kubahan man bapandu Daud asum Kukataken man bana maka Israel la banci la tetap iperentah kesusurenna.
6 Tapi adi kam ras kesusurenndu lanai ngikutken Aku, adi lanai ipakendu Undang-undang ras pedah si nggo Kubereken man bandu, jenari isembahndu dibata-dibata si deban,
7 emaka la banci lang Kupelawes bangsangKu Israel i bas taneh si nggo Kubereken man bana enda nari. Rumah Pertoton enda pe si nggo Kupebadiaken jadi ingan ersembah man bangKu, Kutadingken. Israel la banci lang igombang-gombangi ras ipedungu-dungu kalak i japa pe pagi.
8 Rumah Pertoton enda runtuh pagi jadi batu si ergun-gun, janah kasa kai kalak si mentas jadi sengget dingen kemamangen nina: 'Ngkai maka bagenda ibahan TUHAN man taneh enda ras man Rumah Pertoton enda?' nina pagi nungkun.
9 Jenari ngaloi kalak: 'Enda erkiteken itadingken bangsa enda TUHAN, Dibatana, si maba nini-ninina ndarat i Mesir nari. Iendeskenna pusuh-peratenna man dibata-dibata si deban janah nembeh ia man bana. Em sabapna maka idabuhken TUHAN mara enda ku ia.'"
10 Dua puluh tahun dekahna Salomo majekken Rumah Pertoton ras istanana.
11 Raja Hiram i Tirus nari nikapken kayu pinus si merim ras pinus biasa man bana bage pe kerina emas kasa kai atena guna dahin enda. Kenca nggo dung, ibereken Raja Salomo man Hiram dua puluh kuta i daerah Galilea.
12 Lawes Hiram ngenehenca, janah la atena ngena.
13 Emaka nina man Salomo, "Kuta kai kin si iberekenndu e man bangku, o seninangku?" Erkite-kiteken si enda; daerah e seh asa genduari igelari denga Kabul.
14 Gelgel e nggo ikiremken Hiram man Salomo lebih empat ribu kilo emas.
15 Raja Salomo make kerja paksa guna majekken Rumah Pertoton ras Istanana, ngangkati taneh ku bagin kota e arah kenjulu, ras erbahan tembok kota e. Tole ipakena ka nge kerja paksa e majekken kota-kota Hasor, Megido ras Geser.
16 (Gelgel e nggo iserang raja Mesir kota Geser jenari ikuasaina, ibunuhna pendudukna kalak Kanaan, janah icilukna kota e. Jenari ihadiahkan raja Mesir kota e man anakna asum ia sereh man Salomo,
17 kenca bage ipekena Salomo mulihken.) Alu make kerja paksa, ipajekken Salomo ka mulihken kota-kota Bet-Horon Berneh.
18 Baalat, Tamar, i taneh si mesawang Juda,
19 bage pe kota-kota man inganna nimpan perbekalenna, kota-kota man ingan kuda-kudana ras gereta perangna, ras si debanna si ipajekkenna atena i Jerusalem, i Libanon, ras i bas ingan-ingan si deban i bas kerajanna.
20 Guna kerja paksa e ipakena kesusuren bangsa Kanaan si la ibunuh asum Israel ngerebut tanehna. Bangsa-bangsa enda eme kap bangsa Amori, bangsa Heti, bangsa Peris, bangsa Hewi, ras bangsa Jebusi, i ja kesusurenna terus jadi budak seh paksa enda.
21 (1Raj 9:20)
22 Kalak Israel la ibahan Salomo jadi budak; ia erdahin jadi tentera, pegawai-pegawai, puanglima-puanglima, kepala-kepala tentera si ergereta perang, ras tentera si erkuda.
23 Lit lima ratus lima puluh kalak pegawai si ngaturken kerja paksa e erdahin i bas erbage-bage pembangunen.
24 Itambusi Salomo bagin kota e arah kenjulu, kenca ndeharana, puteri raja Mesir, nggo pindah i Kota Daud nari ku istana si ipajekken Salomo man bana.
25 Telu kali sada tahun Salomo nehken persembahen tutungen ras persembahen pengalemi dosa i bas batar-batar si nggo ipajekkenna. Rempah-rempah si merim itutungna ka man TUHAN. Janah bage me ia ndungi Rumah Pertoton e.
26 Piga-piga kapal pe ibahan Salomo i Esion-Geber, deherken Elat, i tepi lawit Teluk Akaba, i negeri Edom.
27 Raja Hiram nuruh piga-piga kalak pelautna si nggo erpengalemen i bas kapalna nari erdahin ras anak buah Salomo.
28 Erlayar ia ku Opir, jenari ibabana mulih man Salomo lebih sepulu empat ribu kilo emas.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA