Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Sulaiman molae maddek Padalemman Socce e bulan Ziw, iya areya e bulan dhuwa’, e taon se kapeng empa’ e dhalem pamarenta’anna, pa’ ratos ballung polo taon saellana bangsa Isra’il kalowar dhari Messer.
2 Bagiyan dhalemma padalemman jareya lanjangnga petto lekor meter, lebarra sangang meter, ban tenggina tello bellas meter satengnga.
3 E bagiyan adha’na badha balayna se lanjangnga pa’ meter satengnga, ban lebarra sangang meter, padha ban lebarra padalemman jareya.
4 Dhung-geddhungnga epobuwi bang-lobangnga candhela se bagiyan dhalemma alebaran dhari bagiyan lowarra.
5 E sakalenglengnga bagiyan budhina, e geddhung bagiyan lowarra epobuwi kamar se asoson tello’, tenggina padha 2,2 meterran.
6 Kamar se ba-baba lebarra 2,2 meter, se bagiyan tengnga 2,7 meter ban se tas-attas 3,1 meter. Geddhungnga kamar se e baba akandellan dhari se e attasanna, daddi balandarra mar-kamar tamba’an jareya pera’ nyaman epanongko’ ka geddhungnga padalemman jareya, ta’ osa alobange geddhung jareya.
7 Ka-sasakana jareya dhari kaju comara Libanon. Labang ka mar-kamar tamba’an se ba-baba badha e lao’ ban labang ka kamar se nga-tengnga ban se tas-attas ngangguy dhak-ondhak se apente. Padalemman jareya bi’ Sulaiman pas epobuwi gabak se ngangguy osok ban papan dhari kaju comara Libanon. Saabidda oreng maddek padalemman jareya, tadha’ monyena tokol, kapak otabana pakakas besse laenna, sabab to-bato se epamaddegga padalemman jareya la elakone epamare e bakto gi’ badha e pangaleyanna bato. Daddi Sulaiman maddek Padalemman Socce jareya sampe’ mare.
8 (6:7)
9 (6:7)
10 (6:7)
11 Dhabuna PANGERAN ka Sulaiman,
12 "Mon ba’na ta’at ka Tang kom-hokom ban Tang ta-parenta, Sengko’ ajalannagiya ka ba’na apa se ejanjiyagi Sengko’ ka Daud, ramana ba’na.
13 Sengko’ ennengnga e padalemman se epaddek ba’na e nga’-tengnga’anna Tang ommat Isra’il reya. Sengko’ ta’ adina’agiya Tang ommat jareya."
14 Kantha reya Sulaiman se mamare Padalemman Socce rowa:
15 Geddhung bagiyan dhalemma kabbi ekole’e kaju comara Libanon, molae dhari palesteranna sampe’ ka ata’na. Palesteranna dhari kaju comara biyasa.
16 E padalemman jareya, e bagiyan budhi epobuwi kamar se ngangguy bates dhari kaju comara Libanon dhari palesteranna sampe’ ka ata’na. Kamar jareya enyamae Rowang Se Mahasocce; lanjangnga sangang meter.
17 Bagiyan e adha’na Rowang Se Mahasocce jareya enyamae Kamar Raja, lanjangnga ballu bellas meter.
18 Geddhung bagiyan dhalemma Padalemman Socce jareya kabbi ekole’e kaju comara Libanon, sampe’ batona geddhungnga ta’ etangale’e sakale. Kole’na geddhung jareya erengga ban okeranna buwana labu ban bang-kembang se mekkar.
19 Rowang Se Mahasocce se egabay e bagiyan dhalemma Padalemman Socce jareya esadhiya’agi kaangguy kennengnganna Petthe Parjanjiyanna PANGERAN.
20 Lanjangnga, lebarra ban tenggina padha, iya areya sangang meter. Mezba se esaba’ e adha’na Rowang Se Mahasocce jareya ekagabay dhari kaju comara Libanon. E labang lowarra kamar jareya epasange rantay emmas. Bagiyan dhalemma Padalemman Socce jareya tamaso’ Rowang Se Mahasocce ban mezbana ekole’e emmas morne.
21 (6:20)
22 (6:20)
23 E dhalem Rowang Se Mahasocce gella’ epobuwi keya arcana kerub dhadhuwa’ se ekagabay dhari kaju jaitun. Arca se dhadhuwa’ jareya tenggina padha 4,4 meterran;
24 okoran ban bangonna padha. Padha badha kalembangnga dhadhuwa’, tong-settongnga kalembang lanjangnga 2,2 meter. Konco’na kalembang se kangan ban konco’na kalembang se kacer ella’na 4,4 meter.
25 (6:24)
26 (6:24)
27 Arca se dhadhuwa’ jareya epajajar e dhalem Rowang Se Mahasocce sampe’ konco’na kalembangnga se salaja padha nyedding ka geddhung e erenganna, dineng konco’na kalembang salajanna padha acampo e nga’-tengnga’anna kamar jareya.
28 Arcana kerub se dhadhuwa’ jareya ekole’e emmas.
29 Geddhungnga Padalemman Socce jareya bagiyan dhalemma kabbi erengga ban okeranna rub-kerub, ka-bungkana palma ban bang-kembangan se mekkar.
30 La’-mala’ palesteranna ekole’e emmas.
31 Ogerra labang lowarra Rowang Se Mahasocce jareya ngangguy salemarra labang dhadhuwa’ ekagabay dhari kaju jaitun. Ogerra labang jareya bagiyan attassa epamalengkong tape larsep e nga’-tengnga’anna.
32 Labang se dhadhuwa’ jareya erengga ban ker-okeranna kerub, bungkana palma sarta bang-kembangan se mekkar. Labangnga, arcana kerub ban okeranna ka-bungkana palma jareya kabbi padha ekole’e emmas.
33 Labangnga kamar bagiyan adha’, iya areya kamar se raja, salemarra ekagabay dhari kaju jaitun, bangonna masagi empa’.
34 E jadhiya epobuwi keya labang dhadhuwa’ dhari kaju comara biyasa, padha ekenneng pelko’.
35 Bang-labang jareya ngangguy okeran kerub, bungkana palma ban kembang se mekkar. Okeran jareya padha ekole’e emmas.
36 E adha’na Padalemman Socce jareya epasange palataran dhalem. Palataran jareya e sakalenglengnga badha geddhungnga apes-lapes: e attassanna batona, sabban olle tello soson epobuwi kaju comara Libanon.
37 Dhasarra Padalemman Socce jareya epasang e bulan Ziw, iya areya bulan se kapeng dhuwa’, e taon se kapeng empa’ e dhalem pamarenta’anna Sulaiman.
38 Ban e bulan Bul, iya areya bulan se kapeng ballu’, e taon se kapeng sabellas e dhalem pamarenta’anna Sulaiman, Padalemman Socce se epaddek bi’ Sulaiman jareya la mare, eppas akantha se la erancana’agi. Se maddek padalemman jareya abidda pettong taon.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA