Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Empat ratus waluh puluh tahun kenca bangsa Israel nadingken Mesir, i bas tahun si peempatken asum Salomo erkuasa i Israel, i bas bulan si peduaken, bulan Sip, Salomo mulai erbahan Rumah Pertoton.
2 Arah bas gedangna dua pulu pitu meter, belangna siwah meter, janah ganjangna sepulu telu setengah meter.
3 Serambi dalan bengket empat setengah meter bertengna janah gedangna siwah meter, bali ras belang Rumah Pertoton e.
4 Dingding Rumah Pertoton e melala lubang anginna; lubang e kitiken arah darat asa arah bas.
5 Arah darat dingdingna, arah kawes-kemuhen ras arah pudi Rumah Pertoton e, ibahan kamar-kamar si ertingkat telu. Tiap tingkat ganjangna dua seperlima meter.
6 Tiap kamar i bas tingkat si arah teruhna belangna dua seperlima meter. Tingkat si peduaken belangna 2,7 meter, janah tingkat si arah datasna belangna 3,1 meter. Dingding Rumah Pertoton e i bas tiap lante nipesen asa dingding si lit i bas lante si arah teruhna; emaka kamar e banci leket ku dingding, aminna la gia ibahan beloti penahanna.
7 Batu si ipake guna majekken Rumah Pertoton e nggo dung isikapken i bas ingan muat batu-batu e, emaka lanai lit terbegi gejek sora martel, kapak, ntah pe sora perkakas besi si debanna asum Rumah Pertoton e ipajekken.
8 Dalan bengket ku bas kamar tingkat si arah teruhna eme arah samping Selatan Rumah Pertoton e, janah ku tingkat si peduaken ras si peteluken lit tanggana.
9 Bage me idungi Raja Salomo Rumah Pertoton e. Ipasangna langit-langitna alu beloti ras papanna si ibahan i bas kayu pinus si merim nari.
10 Kamar si ertingkat telu si ibahan arah darat dingding Rumah Pertoton e, tiap tingkat ganjangna 2,2 meter, ipersada ku dingding e alu beloti kayu pinus si merim.
11 Nina TUHAN man Salomo,
12 "Adi ikutkenndu Undang-undangKu ras pedahKu, Kusehken man bandu kai si nggo Kupadanken man bapandu Daud.
13 Ringan Aku i tengah-tengah bangsangKu Israel janah ndigan pe la Kutadingken bangsangKu."
14 Bage me nggo dung ipajekken Salomo Rumah Pertoton e.
15 Arah bas dingding Rumah Pertoton e ilapisi alu papan kayu pinus si merim mulai i bas lante nari seh ku langit-langit janah lantena kayu pinus biasa.
16 Sada kamar si arah bas, igelari Ingan si Badiana kal, ibahan arah ujung Rumah Pertoton e. Gedangna siwah meter janah ibelat alu papan kayu pinus si merim i lante nari terus ku langit-langit.
17 Kamar si lit i lebe-lebe Ingan si Badiana kal gedangna sepulu waluh meter.
18 Lapisen papan kayu pinus si merim e ihiasi alu ukiren-ukiren gambar labu ras bunga si terlak: kerina bagin si arah bas itutupi alu pinus si merim, emaka batu dingding e la teridah.
19 Arah ujung Rumah Pertoton e ibahan sada bilik, i je me Peti Perpadanen TUHAN arus itamaken.
20 Kamar si enda gedangna siwah meter, belangna siwah meter, janah ganjangna siwah meter, kerina ilapisi alu emas murni. Batar-batar ilapisi alu papan kayu pinus si merim.
21 Arah bas Rumah Pertoton e ilapisi alu emas, janah rante emas itamaken arah lebe-lebe dalan bengket kubas kamar si arah ujung ndai janah kamar e pe ilapisi alu emas.
22 Kerina bagin si arah bas Rumah Pertoton e ilapisi alu emas, bage pe batar-batar si lit i bas Ingan si Badiana kal.
23 Dua patung mahluk si erkabeng si ibahan i bas kayu saitun nari, si itamaken i bas Ingan si Badiana kal, ganjangna 4,4 meter.
24 Duana seri belinna ras bentukna. Kabengna dua, tep-tep kabeng gedangna 2,2 meter. Dauhna i ujung sada kabeng nari ku ujung kabeng si sada nari 4,4 meter.
25 (1Raj 6:24)
26 (1Raj 6:24)
27 Ia itamaken petingtang i bas Ingan si Badiana kal, dua i bas kabengna si ikirbangkenna e sikenan i tengah-tengah bilik e, janah kabeng si dua nari ngkenai dingding.
28 Patung mahluk si erkabeng si dua e ilapisi alu emas.
29 Dingding-dingding kamar si mbelin ras kamar si arah ujung kerina ihiasi alu ukiren gambar-gambar mahluk si erkabeng, batang kurma, ras bunga-bunga si terlak.
30 Lantena pe ilapisi alu emas.
31 Sada pintun buka dua si ibahan i bas kayu saitun nari ipasang i bas dalan bengket kubas Ingan si Badiana kal; pintunna arah das lengkung-telap.
32 Pintun-pintun e ihiasi alu ukiren gambar-gambar mahluk si erkabeng, gambar batang kurma, ras gambar bunga-bunga si terlak. Pintun-pintun, gambar mahluk si erkabeng ras gambar batang kurma e ilapisi alu emas.
33 Guna dalan bengket ku bas kamar si mbelin ibahan sada rangka pintun i bas kayu saitun nari, bentukna segi empat.
34 Pintunna lit dua, duana pintu lipat si ibahan i bas kayu pinus biasa nari.
35 Janah ihiasi alu ukiren gambar-gambar mahluk si erkabeng, batang kurma ras bunga-bunga si terlak, si ilapisi rata alu emas.
36 I lebe-lebe Rumah Pertoton e ibahan sada kesain si idingdingi alu batu, i ja i bas tiap telu lapis batu itamaken sada lapis beloti kayu pinus si merim.
37 Palas Rumah Pertoton e icibalken i bas bulan si peduaken, bulan Sip, i bas tahun si peempatken pemerentahen Raja Salomo.
38 I bas bulan si pewaluhken, bulan Bul, i bas tahun si pesepuluh sadaken pemerentahen Raja Salomo Rumah Pertoton nggo dung kerina ibahan sue kal ras si nggo irencanaken. Pitu tahun dekahna Salomo majekken Rumah Pertoton e.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA