Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Le’baki siapa are wattu sallona, ri makatallun taung ri anjo wattu timoroka, Nakanamo Batara ri Elia, "A’lampako mange andallekang ri Karaeng Ahab, tasalloami nalaKupaturung bosia."

² Jari a’lampami Elia. Anjo wattua teaimi sipato’ sanna’na nataba bala kacipurang taua ri Samaria.

³ Lanri kammana Ahab nakio’mi Obaja sollanna battu andallekang. (Obaja iamintu kapala ruma tanggana balla’ kakaraenganga. Ia tau sanna’ attojeng-tojenna assambayang ri Batara.

⁴ Ri wattunna nabuno Izebel na’bi-na’biNa Batara, nia’ 100 tau na’bi natulung Obaja na nacokko ke’nanga lalang ri kali’bong batua — 50 tau lalang se’re kali’bong — kammayatompa nasare kanre siagang je’ne’ inung ke’nanga.)

⁵ Nakana Ahab ri Obaja, "Umba naki’lampa angnginroi sikontu anne pa’rasanganga siagang a’boya timbuseng je’ne’ yareka binanga. Gassingka akkulleki’ anggappa ruku’ untu’ ampasalamaki jaranta siagang keledaita, sollanna tenaja naparallu nibuno olo’-olo’ katuota manna pole sikayu."

⁶ Le’baki nabage ke’nanga daera eroka nainroi, a’lampami ke’nanga. Ahab ri se’reang oloang, na Obaja oloang maraengannaya.

⁷ Ri tangngana aganga assibuntulu’mi Obaja siagang Elia. Naassennamo Elia, su’ju’mi untu’ ampakala’biriki nampa akkuta’nang angkana, "Ikatte tojengka anne bapa’ Elia?"

⁸ Appialimi Elia angkana, "Kammatojengi, inakke Elia. Kamma-kamma anne a’lampamako pauangi karaennu angkana niakka’ anrinni."

⁹ Appialimi Obaja angkana, "Apa kasalangku nakiero’ ampassareanga’ mae ri Ahab sollanna nabunoa’?

¹⁰ Lanri arenNa Batara mattallasaka, Allata’ala kisombaya bapa’, kupauang maki’ angkanaya nasuroa’ karaenga untu’ amboyaki’ ri kere-kere mae. Punna nia’ tukoasa ri se’reang pa’rasangang angkana tenaki’ anjoreng, nasuroi Ahab anjo tukoasaya ri anjo pa’rasangang assumpa angkana ma’nassa tena tojeng nanibuntulukki’ anjoreng.

¹¹ Nampa kamma-kamma anne erokki’ sollangku a’lampa mae ri ia nampa kupau angkana niakki’ anrinni?

¹² Punna a’lampama’ battu anrinni, gassingka labattui RohNa Batara angngerangki’ ri se’reang tampa’ tenaya nakuassengi! Nampa punna kupauang Ahab angkanaya niakki’ anrinni, nampa tena nakkulle ambuntulukki’, ma’nassa lanabunoa’. Parallui kiasseng bapa’, angkanaya inakke anne attojeng-tojenga’ assambayang mae ri Batara baku’ battu ri ca’diku!

¹³ Apaka tenapa kilangngereki angkanaya ri wattunna nabuno Izebel na’bi-na’biNa Karaeng Allata’ala, nia’ le’ba’ kucokko 100 tau battu ri ke’nanga — 50 tau lalang se’re kali’bong ri batua — siagang kusarei ke’nanga kanre siagang je’ne’ inung?

¹⁴ Kamma-kamma anne, angngapa nakisuroa’ a’lampa ampaui ri karaenga angkanaya niakki’ anrinni? Ma’nassa lanabunoa’!"

¹⁵ Appialimi Elia angkana, "Lanri Batara Kaminang Koasa kulayania, a’janjia’ labattu kalengku andallekang ri karaenga ia memang anne alloa."

¹⁶ Jari a’lampami Obaja allaporoki mae ri karaenga, nampa a’lampamo Ahab mange angngagangi sibuntulu’ Elia.

¹⁷ Ri wattu nacini’na Ahab anjo Elia, ammarrammi Ahab angkana, "Iaminne tau apparicua ri Israel!"

¹⁸ Appialimi Elia angkana, "Teai inakke tau apparicua, mingka kalenna karaenga. Ikattemi siagang kaluargata apparicu. Lanri anynyombata ri barhala-barhala Baal, kidakkaimi parenta-parentaNa Batara.

¹⁹ Kamma-kamma anne parentakammi sikontu ra’ya’ Israel untu’ angngaganga’ sibuntulu’ ri Moncong Karmel. Erang tongi anjo 450 na’bi Baal siagang 400 na’bi rewata baine Asyera, ia niongkosia ri Izebel bainenna karaenga!"

²⁰ Jari napagio’ ngasemmi Ahab sikontu ra’yaka siagang na’bi-na’bi Baalka mange ri Moncong Karmel.

²¹ Nampa nareppesi Elia anjo ra’yaka na nakana, "Sa’ge kemaepi ero’nu a’rua nyawa? Punna Batara, Batara musti nusomba. Punna anjo Baal Allata’ala, iami nusomba." Anjo ra’ya’ niaka a’rappungang, tena nia’ akkana.

²² Nampa nakanamo pole Elia, "Battu ri sikamma na’bi-na’biNa Batara, inakke mami tassesa, padahala’ anrinni nia’ 450 na’bi Baal.

²³ Kamma-kamma anne angngerangko mae ruang kayu sapi laki. Suroi anjo na’bi-na’bi Baal angngalle sikayu siagang nasamballe, na napolong-polong, nampa napadongko’ irate ri kayu tunuanga. Mingka takkulleai apparinra ke’nanga pepe’ anjoreng. Sapi se’reanga pole lanipasadia kammajinjo bawang. Lakusamballei siagang kupolong-polong, nampa kupadongko’ irate ri kayu tunuanga. Mingka manna inakke tena todong kukkulle apparinra pepe’ anjoreng.

²⁴ Lappassammi anjo na’bi-na’bi Baal appala’ doang mae ri rewatana ke’nanga, nampa inakke lappala’ doang tonga’ mae ri Batara. Ia appialia siagang pepe’, Iami Allata’ala." Sikontu ra’yaka appiali ngasemmi angkana, "Situju!"

²⁵ Nampa nakanamo Elia ri anjo na’bi-na’bi Baal, "Nasaba’ ikau jaiko, pileimi rolong sapia siagang nupasadia, mingka teako apparinrai pepe’ ri kayua. Le’baki anjo appala’ doang mako mae ri rewatanu."

²⁶ Jari ammilemi ke’nanga sikayu sapi nampa napasadia. Le’baki anjo appala’ doammi ke’nanga ri Baal, battu ri bari’basa’ sa’genna tangngallo siagang akkiok-kio’, "Baal, pilangngeri ikambe!" Nagaukammi ke’nanga nampa turus a’joge’-joge’ ri tammulilina anjo tampa’ koro’banna ke’nanga. Mingka tena sikali pappiali mae ri ke’nanga.

²⁷ Ri attangnganamo alloa, appakkaramulami Elia ancau-caui ke’nanga angkana, "Pila’ lompo-lompoi sa’rannu appala’ doang! Sai iami allata’ala? Gassingka sitabangi nia’ nanawa-nawa, yareka mangei atta’mea. Yareka sitabangi a’lampa. Yareka attinroi kapang, na parallu nuronrong!"

²⁸ Pila’ lompomi sa’ranna appala’ doang anjo na’bi-na’bia. Siagang kamma biasaya nagaukang ke’nanga, nae’ba’-e’ba’mi kalenna ke’nanga siagang pa’dang yareka poke sa’genna ammatti’-matti’mo cera’na ke’nanga.

²⁹ Kammaminjo situlusu’na nagaukang ke’nanga sa’genna karueng, sangkamma nicini’ tunisoso’ ri setang. Mingka tena appiali ri ke’nanga, tena amparhatikangi.

³⁰ Nampa nakanamo Elia mae ri sikontu anjo ra’yaka, "Maeko a’reppese’!" A’rappungammi ke’nanga ri tammulilina. Nampa appakkaramulamo napakabaji’ tampa’ pakkoro’bangnganga ri Batara, ia rumbangamo.

³¹ Angngallei sampulo anrua batu. Massing tasse’rea batu nawakkeli kalase’renna sampuloa anrua suku turunganna Yakub, iamintu tu nisarea areng Israel ri Batara.

³² Iaminjo batu-batua napake Elia ambangungi ammotere’ tampa’ pakkoro’bangngang passambayanganga mae ri Batara. Ri tammulilina anjo tampa’ pakkoro’bangnganga angngekemi solongang lompoa sike’de’ sa’genna akkulle angngalle je’ne’ kira-kira sampulo allima litere’ jaina.

³³ Nasusungimi kayu tunuang irateanna anjo tampa’ pakkoro’bangnganga, nampa napolong-polong anjo sapi sikayua siagang napadongko’ irateanna anjo kayua. Nampa nakana, "Bonei je’ne’ appa’ katoang sa’genna rassi, nampa tumpai anjo je’neka irateanna anjo koro’banga siagang kayua." Le’baki nagaukang ke’nanga anjo kammaya,

³⁴ nakanamo Elia, "Sikalipi". Kammaminjo nagaukammi ke’nanga. Nakanamoseng Elia, "Sikalipi," siagang nagaukammi ke’nanga kammaya.

³⁵ Jari assolommi je’neka ri tammulilina anjo tampa’ pakkoro’bangnganga sa’genna rassimo je’ne’ kaloro’na.

³⁶ Ri wattunna narapi’mo wattunna assare koro’bang karueng, a’reppese’mi Na’bi Elia mae ri anjo tampa’ pakkorobangnganga nampa appala’ doang angkana, "O Batara, Allata’ala nasombaya Abraham, Ishak siagang Yakub, Kipa’nyatai kamma-kamma anne angkanaya iKattemi Allata’alana Israel, siagang inakke anne atanTa. Kipa’nyata tongi angkanaya sikontu anne apa kugaukanga lanri parentaTa.

³⁷ Appiali maKi’, o Batara! Kipialima’, sollanna naasseng anne ra’yaka angkanaya iKatte, o Batara, iKattemi Allata’ala, siagang iKattemi lampata’gilingi ke’nanga mae ri Katte."

³⁸ Nampa appabattumo Batara pepe’ battu ri langika siagang nakanre anjo kayua siagang anjo koro’banga sa’genna ammutung, batu-batunna, buttana, kammayatompa nalepa’ ngaseng tommi je’ne’ niaka ri kaloroka.

³⁹ Nacini’na ra’yaka anjo apa kajarianga, su’ju’mi ke’nanga naung ri buttaya, nampa nakana ke’nanga, "Batarami Allata’ala. Ma’nassa tojenna anjo Batara, Allata’ala!"

⁴⁰ Jari nakanamo Elia, "Jakkala’ ngasengi anjo na’bi-na’bi Baal! Teako lappassangi nia’ ta’lappasa’ manna sitau!" Nampa nijakkala’ ngasemmo anjo na’bi-na’bia ri anjo taua. Nampa nierang anjo na’bi-na’bi Baal ri Elia mange ri Binanga Kison, nanabuno ngaseng ke’nanga anjoreng.

⁴¹ Le’baki anjo nakanamo Elia ri Karaeng Ahab, "Kamma-kamma anne baji’mi punna a’lampa maki’ mange angnganre. Sinampe’ mami nalabosi, nasaba’ kalangngerammi ammarrung."

⁴² A’lampami Ahab mange angnganre, nampa Elia nai’mi ri Moncong Karmel. Anjoreng su’ju’mi sa’genna rapa’ rupanna naung ri buttaya ri alla’na ruaya kulantu’na.

⁴³ Nakana ri palayanna, "Naikko ri coppo’ nampa accinikko mae ri tamparanga." Nai’mi anjo atanna, nampa ammotere’ siagang nakana, "Tena apa-apa kucini’." Sa’genna pintuju nasuro Elia anjo atanna nai’ naung untu’ accini’.

⁴⁴ Ri makapintujuna, ammotere’mi anjo atanna siagang nakana, "Nia’ kucini’ rammang ca’di sangkamma pala’ lima lompona battu ri tujunna tamparanga." Nakanamo Elia ri atanna, "A’lampamako mange ri Karaeng Ahab, suroi nai’ ri karetana nampa ammotere’ sollanna tena nitahangi ri bosia."

⁴⁵ Poro sinampe’ duduji sassammi langika, siagang sanna’mi sarrinna anging mammirika, nampa appakkaramulamo battu bosi sannaka lompona. Nai’mi Ahab ri karetana nampa ammotere’ mange ri Yizreel.

⁴⁶ Anjo wattua anggappami Elia kagassingang battu ri Batara. Nalappa’mi nai’ jubana nampa nasikko’ ri aya’na nampa lari ampilumbai Ahab ri aganga sa’genna mange ri pakke’bu’ lompona kota Yizreel.

1 Raja-raja

Video 1 Raja-raja 18

Ikuti Kami:

KONTAK | PARTISIPASI | DONASI