Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Saellana mosem kerreng jareya olle tello taon abidda, PANGERAN adhabu ka Eliya, "Kassa’ ba’na entar ka Rato Ahab, ta’ saapa abidda Sengko’ madhatengnga ojan."

² Daddi Eliya pas mangkat. E bakto jareya kalaparan e Samaria ce’ sarana,

³ daddi Ahab pas adikane Obaja. (Obaja reya kapalana roma tatanggana karaton. Orengnga ce’ abakte ka PANGERAN.

⁴ E bakto Izebel mate’e bi-nabbina PANGERAN, Obaja nolonge bi-nabbi se bannya’na saratos oreng, eerrep e dhalem wa-guwa, settong guwa eesse’e saeket oreng. Reng-oreng se epangetek e dhalem wa-guwa jareya ekereme dha’ar ban aeng enom.)

⁵ Dhabuna Ahab ka Obaja, "Mara ja’ entara nyare somber ban songay e saantero nagara reya. Pola me’ nemmo rebba se ekenneng gabay pakanna ran-jaran tompa’an ban ran-jaran buwadan andhi’na sengko’ ban ba’na kabbi, sopaja ebinna sengko’ ban ba’na ta’ sampe’a badha se mate kalaparan."

⁶ Saellana gi-magi dhaera se kodu eentare bang-sebang, Ahab ban Obaja pas padha mangkat. Ahab ka bagiyan se settong, ban Obaja ka bagiyan settonganna.

⁷ E tengnga jalan Obaja atemmo ban Eliya. Obaja enga’ jareya Eliya, daddi laju asojud ngatore hormat sambi atanya, "Ba’ lerressa panjennengngan ka’dhinto Eliya?"

⁸ "Iya, sengko’ pajat Eliya," saodda Eliya. "Kabala ka ratona ba’na ja’ sengko’ badha e dhinna’."

⁹ Obaja nyaot, "Ponapa salana abdina me’ panjennengngan makon abdina entar ka Ahab? Dhaggi’ abdina tanto epate’e.

¹⁰ Bit asmaepon PANGERAN se odhi’, Allah se esemba panjennengngan, abdina asompa’a ja’ abdina sareng rato epakon nyare panjennengngan ka man-ka’dhimman. Manabi rato e settong nagara adhabu panjennengngan tadha’ e nagarana, sareng Ahab rato gapaneka epakon asompa ja’ panjennengngan lerres ta’ epanggi e nagarana.

¹¹ Pas samangken panjennengngan makon abdina mator ka Rato Ahab ja’ panjennengngan badha e ka’iya.

¹² Kadi ponapa manabi abdina gi’ buru mangkat, panjennengngan pas ebakta sareng Errohepon PANGERAN ka kennengngan se ta’ ekaonenge sareng abdina? Manabi abdina mator ka Ahab ja’ panjennengngan badha e ka’iya, namong Ahab pas ta’ manggi’i panjennengngan e ka’iya, tanto abdina epate’e. Panjennengngan tantona emot, abdina ka’dhinto oreng se abakte ka PANGERAN molae gi’ kene’.

¹³ Ponapa panjennengngan ta’ meyarsa ja’ e bakto Izebel mate’e bi-nabbina PANGERAN, abdina mangetek saratos oreng e antarana bi-nabbi gapaneka e dhalem guwa, sabban guwa settong eesse’e saeket oreng, sareng ngereme dha’ar sareng aeng enom ka bi-nabbi gapaneka?

¹⁴ Daddi samangken, aponapa panjennengngan me’ makon abdina ngatore oneng ka rato ja’ panjennengngan badha e ka’iya? Tanto abdina pa epate’e."

¹⁵ Saodda Eliya, "Bit asmana PANGERAN Se Mahakobasa se esemba sengko’, sengko’ entara dibi’ ka rato are teya."

¹⁶ Daddi Obaja pas mangkat ngatore oneng ka rato, Ahab pas mangkat manggiyana Eliya.

¹⁷ E bakto ngoladi Eliya, Ahab adhabu epakaja, "Areya’ pangaco e Isra’il!"

¹⁸ "Se pangaco banne abdidalem," saodda Eliya, "namong junandalem dibi’ sakalowarga. Junandalem nyemba la-brahalana Ba’al, daddi junandalem ta’ atoro’ ka papakonna PANGERAN.

¹⁹ Ngereng samangken ra’yat Isra’il sadaja pakon apanggi sareng abdidalem e Gunong Karmel. Bakta jugan nabbina Ba’al se pa’ ratos saeket oreng sareng nabbina Dewi. Asyera se pa’ ratos oreng se ebandhai Din Aju Rato Izebel."

²⁰ Daddi Ahab makompol ra’yat ban bi-nabbina Ba’al kabbi e Gunong Karmel.

²¹ Eliya nyemma’e ra’yat jareya pas adhabu, "Sampe’ bila ba’na se mangmanga atena? Mon PANGERAN reya Allah, semba Pangeran! Mon Ba’al Allah, semba Ba’al!" Ra’yat se akompol e jadhiya neng-enneng, ta’ ca’-ngoca’.

²² Dhabuna Eliya, "E antarana bi-nabbina PANGERAN pera’ kare sengko’ malolo, mangkana e dhinna’ badha pa’ ratos saeket oreng nabbina Ba’al.

²³ Mara ngala’ sape lake’ dhadhuwa’. Se settong bagi ka bi-nabbina Ba’al soro sambelli pas thok-ketthok, laju saba’ e attassa kaju, tape kaju jareya ja’ odhi’i. Sengko’ ngala’a sape settonganna. Sape jareya bi’ sengko’ esambelliya, pas ethok-ketthoga, esaba’a e attassa kaju. Tape tang kaju ta’ eodhi’ana keya.

²⁴ Bi-nabbina Ba’al jareya soro adu’a ka dibana, ban sengko’ nyo’ona ka tang PANGERAN. Se ngabbullagi parnyo’onan ban madhateng apoy, jareya Allah." Ra’yat padha nyaot kabbi epakaja, "Sae!"

²⁵ Dhabuna Eliya ka bi-nabbina Ba’al, "Sarrena sampeyan bannya’, eatore mele kaadha’ sapena pas sadhiya’agi, tape kajuna ja’ odhi’i. Saamponna ranta, eatore adu’a ka la’-alla’anna sampeyan."

²⁶ Bi-nabbina Ba’al jareya pas mele sapena laju eparanta. Saellana ranta pas adu’a ka Ba’al dhari gi’ laggu sampe’ dhuk-beddhuk sambi rat-tharadan, "Ngereng peyarsa’agi parnyo’onan abdina, Ba’al!" Reng-oreng jareya terros ra’-era’an sambi atari e sakalenglengnga mezbana. Tape tadha’ jawabanna.

²⁷ E baja beddhuk Eliya molae co-ngoco reng-oreng jareya, "Pakajai, pona! Ba’al ganeka gu ta’ la’-alla’an, ta’ enggi? Olle daddi teppa’na ngalamon, otabana teppa’na ka pakeban. Olle daddi teppa’na ajalanan! Otabana teppa’na tedhung, jagai, pona!"

²⁸ Bi-nabbi jareya adu’a epasajan kaja. Ban akantha biyasana, badanna sambi eri-duri ban peddhang sarta tombak, sampe’ dharana jar-galajir.

²⁹ Se kantha jareya terros sampe’ sar-asar akantha oreng kasoroban. Tape tadha’ se nyaodi, tadha’ se marduli.

³⁰ Eliya pas adhabu ka reng-oreng Isra’il jareya, "Mara, padha dha’ enna’an kabbi." Kabbi pas padha akompol e sakalenglengnga Eliya, dineng Eliya molae mateppa’ mezba se la robbu.

³¹ Saellana pas mondhut bato dhubellas meggi’, sabban settong bato abakkele sala settong dhari suku se dhubellas e dhalem toronanna Yakub, se bi’ PANGERAN eparenge asma Isra’il.

³² Bato se dhubellas jareya ebadhi maddek pole mezba kennengnganna kabakteyan ka PANGERAN. E sakalenglengnga mezba jareya epasange li-giliyan se cokop raja, bisa eesse’e aeng ra-kera lema bellas liter.

³³ E attassa mezba jareya epasange kaju, esoson epateppa’, sapena ethok-ketthok, esaba’ e attassa kajuna. Saellana jareya pas adhabu, "Mara ngala’ pennay pa’-empa’ esse’e aeng papossa’, aengnga serammagi ka kurban ban kajuna." Saellana jareya ejalannagi bi’ reng-oreng gella’,

³⁴ Eliya adhabu, "Sakaleyan aggi’," bi’ reng-oreng jareya pas ejalannagi. "Sakaleyan aggi’," dhabuna Eliya pole, reng-oreng jareya pas ajalannagi jareya pole.

³⁵ Aengnga agili ka sakalenglengnga mezbana sampe’ li-giliyanna possa’ aengnga.

³⁶ E bakto la napa’ baktona ngatorragiya kurban sar-asar, Eliya nyemma’e mezba gella’ pas adu’a kantha reya, "Adhu, GUSTE Pangeran, Allah se esemba Ibrahim, Ishak sareng Yakub, ngereng samangken duduwagi manabi Junandalem ka’dhinto Allah e Isra’il, dineng abdidalem ka’dhinto abdiepon Junandalem. Nyata’agi jugan manabi sadaja se ejalannagi abdidalem ka’dhinto lerres papakonna Junandalem.

³⁷ Ngereng peyarsa’agi, GUSTE! Parenge jawaban abdidalem, GUSTE, sopaja ra’yat ka’dhinto oneng ja’ Junandalem ka’dhinto Allah, sarengngan pole manabi Junandalem se mabali reng-oreng ka’dhinto ka Junandalem."

³⁸ PANGERAN matoron apoy dhari langnge’, kurban ban kajuna rabak katonon, bariya keya bato ban tanana, aeng e li-giliyanna ekello’ sampe’ kerreng.

³⁹ E bakto ra’yat nangale’e jareya pas padha asojud ka tana kabbi sambi ngoca’, "PANGERAN reya Allah! Ongguwan, PANGERAN reya Allah!"

⁴⁰ Dhabuna Eliya, "Pega’ bi-nabbina Ba’al jareya! Ja’ bagi buru!" Reng-oreng pas padha mega’ bi-nabbina Ba’al jareya, bi’ Eliya ebakta ka Songay Kison sarta epate’e kabbi e jadhiya.

⁴¹ Saellana jareya Eliya mator ka Rato Ahab, "Samangken junandalem eatore mondhut dha’ar. Sakejja’ aggi’ tanto ojan, sabab monyena ampon agarudhu’ ekaedhing dhari ka’dhinto."

⁴² Ahab pas mangkat adha’ar, dineng Eliya ongga ka attas Gunong Karmel, e jadhiya asojud, mowana nyokel ka tana sampe’ eapet to’odda se dhadhuwa’.

⁴³ Dhabuna Eliya ka sarengnga, "Kassa’ ongga ka konco’na gunong pas abas ka tase’." Barengnga Eliya jareya ongga, pas abali laju mator, "Kaula ta’ nengale pa-ponapa." Sampe’ pettong kale Eliya makon sarengnga ongga toron epakon ngabas ka tase’.

⁴⁴ E bakto abali kapeng petto’na barengnga Eliya jareya ngoca’, "Kaula nengale ondhem akadi pa’-dapa’na tanang dhari tase’." Dhabuna Eliya ka sarengnga jareya, "Kassa’ ba’na entar ka Rato Ahab, kabala soro gubar netene karetana sabellunna kaaddhangan ojan."

⁴⁵ Sakejja’ aggi’ langnge’ la petteng bi’ ondhem, angen tandhes, pas ojan derres. Ahab netene karetana, gubar ka Yizre’el.

⁴⁶ E bakto jareya Eliya eparenge kakowadan bi’ PANGERAN. Jubana ecengceng, etaleyagi ka tengngana, pas berka’ ajangadha’i Ahab salanjangnga lorong sampe’ ka labangnga kottha Yizre’el.

1 Raja-raja

Video 1 Raja-raja 18

Ikuti Kami:

KONTAK | PARTISIPASI | DONASI