Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Badha settong nabbi nyamana Eliya. Asalla dhari Tisbe, settong kottha e baba Gileyad. E settong are, nabbi jareya nyabis ka Rato Ahab pas mator kantha reya, "Bit asmaepon PANGERAN, Allah se odhi’ se esemba sareng ommat Isra’il se eabdi sareng abdidalem, abdidalem ngatore oneng ka junandalem manabi dhu taon otaba tello taon abidda bakal tadha’a ebbun otaba ojan se toron, kajabana manabi abdidalem ngoca’ manabi ebbun sareng ojan torona."

² Saellana jareya PANGERAN adhabu ka Eliya,

³ "Onduri kennengngan reya, kassa’ entar ka temorra Songay Yordan, pas ngetek e dissa’ e seddi’anna cangkana Songay Kerit.

⁴ Mon ba’na ngenoma badha aeng songay jareya, mon ba’na ngakana, Sengko’ nyorowa no’-mano’ dhangdhang ngeba’agi kakanna ba’na."

⁵ Eliya atoro’ ka dhabuna PANGERAN jareya, pas mangkat ka cangkana Songay Kerit pas terros ngetek e seddi’anna cangkana songay jareya.

⁶ Mon ngenom mondhut aengnga songay, se edha’ar roti ban daging se egiba dhangdhang sabban gu-laggu ban sar-asar.

⁷ Ta’ ella’ saapa abidda, cangkana songay jareya asat aengnga sabab tadha’ ojan.

⁸ Saellana jareya PANGERAN pas adhabu ka Eliya,

⁹ "Sateya kassa’ ba’na entar ka kottha Sarfat, e seddi’anna Sidon, ba’na pas neng e jadhiya. E kottha jareya badha randha; randha jareya bi’ Sengko’ la esoro makane ba’na."

¹⁰ Daddi Eliya mangkat ka Sarfat. Sanapa’na ka labangnga kottha, Eliya ngoladi badha oreng randha parappa’na makompol kaju. Dhabuna Eliya ka randha jareya, "Bu, ta’ langkong kaula nyo’ona aeng enomma."

¹¹ E bakto randha jareya ajalan ngala’agiya aeng enom, Eliya aera’, "Bu, kaula nyo’ona rotina jugan."

¹² Saodda randha jareya, "Bit asmaepon PANGERAN se odhi’, Allah se esemba sampeyan, kaula asompa ja’ kaula ta’ gadhuwan roti sakale. Kaula namong gadhuwan teppong sapergem e dhalem jembung, mennya’ jaitun sakone’ e dhalem butol. Kaula ka’anja nyareya kaju eangguya aola teppong se sakone’ ganeka, sopaja kaula sareng ana’ kaula gadhuwan se eteddha’a sanare namong ce’ sakone’na. Ganeka teddha’an gadhuwan kaula se dhi-budhina, saamponna ganeka kaula sareng ana’ kaula tanto mate kalaparan."

¹³ "Ampon sampeyan ja’ kobater," dhabuna Eliya ka randha jareya. "Eatore manabi aola’a teddha’an kaangguy sampeyan sareng pottrana. Tape kaula gabayyagi roti ne’-kene’ kaadha’ dhari teppong ban mennya’ ganeka, pas giba ka’anto’.

¹⁴ Sabab PANGERAN, Allah se esemba oreng Isra’il adhabu ja’ kobuganna sampeyan bakal pagguna badha teppongnga ban butolla sampeyan bakal pagguna badha mennya’na sampe’ baktona PANGERAN madhateng ojan ka bume."

¹⁵ Randha jareya mangkat norodi dhabuna Elia. Sampe’ pan-barampan are abidda e bengkona randha jareya paggun badha parsadhiya’anna kakanan kaangguy se katello jareya.

¹⁶ Ban cocok akantha se edhabuwagi PANGERAN kalaban parantara’anna Eliya, kobuganna jareya paggun aesse teppong ban butolla paggun badha mennya’na.

¹⁷ Ta’ abit saellana jareya ana’na randha jareya sake’. Sajan abit sajan sara sampe’ dhi-budhina mate.

¹⁸ Atorra randha jareya ka Eliya, "Abdina Allah, aponapa abdina me’ epasapaneka sareng panjennengngan? Ponapa panjennengngan rabu ka ka’dhinto maemoda Allah ka dusa abdina, me’ sampe’ ana’ abdina epamate?"

¹⁹ Saodda Eliya, "Giba ka’anto’ kana’ ganeka." Kana’ lake’ jareya bi’ Eliya epondhut dhari ebuna, pas ebakta ka loteng, ka kamar pangenebbanna. Eliya nyaba’ kana’ jareya e pasareyanna,

²⁰ pas laju adu’a epakaja, "Adhu, GUSTE Allah, Pangeran kaula, aponapa Junandalem me’ madhateng balai ka’dhinto ka randha ka’dhinto? Abdidalem sareng randha ka’dhinto eparenge ngampong pangenebban, me’ samangken ana’epon epamate sareng Junandalem?"

²¹ Saellana jareya Eliya napang e attassa kana’ jareya sampe’ tello kale, sambi adu’a, "Adhu, GUSTE Allah, Pangeran kaula, paodhi’agi kana’ ka’dhinto, Guste!"

²² Pangeran meyarsa du’ana Eliya; kana’ jareya pas anyaba, laju odhi’ pole.

²³ Eliya toron dhari kamarra sambi abakta kana’ jareya ka ebuna, pas adhabu, "Neka’ ana’na sampeyan pon odhi’ pole!"

²⁴ Saodda randha jareya, "Samangken abdina oneng panjennengngan abdina Allah, se edhabuwagi panjennengngan lerres dhari PANGERAN!"

1 Raja-raja

Video 1 Raja-raja 17

Ikuti Kami:

KONTAK | PARTISIPASI | DONASI