Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Lit sekalak nabi, Elia gelarna asalna i Tisbe nari i daerah Gileat. Nina man Raja Ahap, "I bas gelar TUHAN, Dibata si nggeluh, Dibata Israel si kusembah, kukataken man bandu maka i bas dua ntah telu tahun si reh la lit embun ntah udan ndabuh, seakaten adi kusuruh."
2 Kenca bage nina TUHAN man Elia,
3 "Tadingken ingan enda, to ku kenjulu cebunilah i tepi Lau Kerit, arah Timur Jordan.
4 Lau e pagi man inemenndu, janah nggo Kuperentahken piga-piga kalak naruhken nakanndu ku je."
5 Patuh Elia man perentah TUHAN, emaka lawes ia, jenari tading i tepi Lau Kerit.
6 Lau e jadi inemenna, janah tep-tep erpagi-pagi ras karaben rehen kak maba roti ras daging man bana.
7 La ndekahsa kerah me lau belin ndai sabap la lit udan ndabuh.
8 Kenca bage nina TUHAN kempak Elia,
9 "To ku kota Sarpat, deherken Sidon, tadinglah i jah. Nggo Kuperentahken sekalak diberu balu-balu si ringan i jah mere kam man."
10 Emaka berkat Elia ku Sarpat. Kenca ia seh i gerbang kota idahna sekalak diberu balu-balu sangana muat ranting. Iperkuanken Elia nina, "Enta sitik lau maka aku minem."
11 Muatna lawes ngelegisa ilebuhken Elia ia, "Baba pe sitik roti man bangku."
12 Ngaloi diberu e, "I bas gelar TUHAN Dibatandu si nggeluh tuhu kukataken man bandu maka la lit roti i bas aku, seakatan sengkerauk tepung tare mangkuk ras sitik minak tare botol. Enda kupepulung sitik ranting man babanku mulih ku rumah gelah banci kutasakken pangan si sitik e man bangku ras man anakku. Eme pengkeri-kerinna kami man, janah kenca e mate la man me kami."
13 "Ula kam mbiar," nina Elia. "Banci isikapkenndu panganndu, tapi ope denga si e bahan lebe roti si kitik, jenari baba man bangku. Kenca bage ibana banci itasakkenndu man panganndu ras anakndu.
14 Sabap bage nina TUHAN, Dibata Israel, 'Tepung bas mangkuk la keri-keri, minak bas botol pe la kurang-kurang seh Kupesusur udan ku taneh enda,' bage nina TUHAN."
15 Lawes diberu balu-balu e ilakokenna bagi si ikataken Elia emaka cukup pangan kalak e guna paksa si ndekah sitik.
16 Sue ras si nggo ikataken TUHAN arah Elia, tepung si i bas mangkuk la keri-keri janah minak si i bas botol e la kurang-kurang.
17 La asa kai nari dekahna kenca si e, sakit anak diberu balu-balu ndai. Reh dekahna reh kelekna kedungenna mate.
18 Nina diberu e man Elia, "O suruh-suruhen Dibata, ngkai maka bage perbahanndu man bangku? Kerehenndu ku jenda erbahanca inget Dibata ka mulihken dosa-dosangku, erkiteken si e mate anakku."
19 "Enta anakndu ena," nina Elia. Ibuat Elia anak e i bas ampun nandena nari, iangkipna ku kamar si inganina i das loteng ipepedemna i bas ingan medem.
20 Kenca bage ertoto ia alu sora megang nina, "O TUHAN Dibatangku ngkai maka IberekenNdu kiniseran si mberat man diberu balu-balu enda? Bage kal ulina perbahanna man bangku, tapi IbunuhNdu ka anakna!"
21 Kenca bage iamparkenna bana telu kali i babo anak e ertoto ia, "O TUHAN Dibatangku pegeluhlah mulihken anak enda!"
22 Ibegiken TUHAN pertoton Elia, emaka mulai anak ndai erkesah janah nggeluh mulihi.
23 Itegu Elia mulihken anak ndai ku teruh, iberekenna man nandena nina, "Nehenlah, anakndu nggeluh!"
24 Ngaloi nandena, "Genduari kueteh kam suruh-suruhen Dibata, janah tuhu-tuhu TUHAN ngerana arah kam!"
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA