Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 A’lampai Rehabeam mange ri Sikhem, lanri sikontu ra’yaka ri Israel bageang wara’ nia’mi a’rappungang anjoreng untu’ angngangkaki a’jari karaeng.
2 Anjo wattua Yerobeam ana’na Nebat nia’ iji ri Mesir lanri larina battu ri Karaeng Salomo. Ri wattu nalangngere’na kabara’na Rehabeam, ammotere’mi mange ri Israel.
3 Ra’ya’ niaka ri bageang wara’ naundammi Yerobeam, nampa a’lampa ke’nanga siagang ia mange andallekang ri Rehabeam. Nakana ke’nanga,
4 "Salomo, manggeta karaeng, le’ba’mi nabattalli dudu ikambe. Kamma-kamma anne punna kikurangngi battala’na ikambe siagang kikurangngi kasessanna ikambe, lamminawang turuki anjama ikambe untu’ ikatte."
5 Appialimi Rehabeam angkana, "Musti appikkirika’ rolong. Battu poleang mako mae ri tallungallo labattua." Jari ammotere’mi ke’nanga.
6 Nampa appala’ tangara’mo Rehabeam mae ri tau toa-toaya ia le’baka a’jari tumappakainga’na Salomo, manggena Rehabeam. Akkuta’nangi Rehabeam angkana, "Antekamma musti pappialingku mae ri anjo taua? Antekamma pikkiranta ngaseng?"
7 Appialimi ke’nanga angkana, "Punna attojeng-tojengki’ ero’ amboyangi kabajikanna ra’yaka, kiturukiangi pappala’na ke’nanga, nalamminawang turu’ anjama untu’ ikatte sa’genna satunggu-tungguna."
8 Mingka tena najampangi Rehabeam pappakainga’na anjo sikamma tau toa-toaya. Ba’lalo a’lampami mange ri tau rungka simpangka’-pangka’na siagang a’jaria pambantuna.
9 Akkuta’nammi ri ke’nanga angkana, "Apa pappitangara’nu mae ri nakke untu’ ampiali ra’ya’ appalaka sollanna kukurangngi battala’na ke’nanga?"
10 Appialimi ke’nanga angkana, "Kamma anne kananta mae ri ke’nanga, ‘Manna pole antekamma lammaku, kassakangngangija’ namanggeku!
11 Nasareko tanggongang battala’ manggeku, mingka lakusareko tanggongang la’bi battallangngangi pole. Nacambokko siagang cambo’, mingka inakke lakucambokko siagang cambo’ akkatintinga bassi!’"
12 Tallungallo pole, battumi pole Yerobeam siagang sikontu anjo taua andallekang ri Karaeng Rehabeam, sangkamma niparentakanga mae ri ke’nanga.
13 Sisalai siagang pappakainga’na yangaseng anjo tau toaya, nabicarai kasara’mi anjo ra’ya’ niaka battu andallekang ri ia.
14 Na situru’ pappakainga’na anjo tau rungka-rungkaya, nakanamo, "Nasareko manggeku tanggongang battala’, mingka lakupa’jari battallangngangi pole anjo tanggongannu. Nacambokko siagang paccambo’, mingka inakke lakucambokko siagang paccambo’ akkatintinga bassi!"
15 Tena najampangi pappala’na ra’yaka. Mingka anjo memang ero’Na Batara. Apa le’baka Napau Batara tete ri Na’bi Ahia battu ri Silo ri passala’na Yerobeam ana’na Nebat, musti kajariangi.
16 Nacini’na ra’yaka angkanaya tena naero’ karaenga ampilangngeri pappala’na ke’nanga, ammarrammi ke’nanga angkana, "Apa paralluna nipaduli Daud siagang turunganna! Tena apa-apa le’ba’ nagaukang ke’nanga untu’ ikatte. Ikau ra’ya’ Israel umba kimmotere’. Lappassammi anjo Rehabeam naurusu’ kalenna!" Jari ammotere’mi ra’ya’ Israel,
17 na’jari karaemmo Rehabeam poro ri daera Yehuda bawang.
18 Mingka manna nakamma Karaeng Rehabeam nasuro iji Adoniram, iamintu kapala pajama passaya, ampakasannangi ra’yaka. Mingka nisambilami batu ri ke’nanga sa’genna mate. Nacini’na anjo apa kajarianga, akkaro-karomi Rehabeam nai’ ri karetaya, nampa lari mange ri Yerusalem.
19 Appakkaramula anjo wattua ra’ya’ niaka ri bageang wara’ ri kakaraenganna Israel tuli angngewami mae ri karaeng-karaeng turunganna Daud.
20 Ri wattu nalangngere’na sikontu ra’ya’ Israel angkanaya ammotere’mi Yerobeam battu ri Mesir, naundammi ke’nanga Yerobeam mae ri se’reang tampa’ pa’rappungang nampa naangka’ ke’nanga anjo Yerobeam a’jari karaeng Israel. Ra’ya’ suku Yehuda mami bawang amminawang ri turunganna Daud.
21 Ri wattunna battu Karaeng Rehabeam mange ri Yerusalem, napa’rappungammi 180.000 tantarana kaminang bajika battu ri suku Yehuda siagang Benyamin untu’ mange ambunduki Israel siagang napoterang kakoasanna mange ri suku-suku niaka ri bageang wara’na Israel.
22 Mingka nisuromi Na’bi Semaya ri Allata’ala,
23 ampabattui anne kabaraka mae ri Rehabeam, siagang sikontu suku Yehuda siagang Benyamin,
24 angkanaya, "Teako bunduki anjo sari’battannu Israel. Ammotere’ mako! Anjo apa le’baka kajariang, anjo erokKu." Jari naturukimi ke’nanga parentaNa Batara, nampa massing ammotere’mo ke’nanga mae ri balla’na.
25 A’jari karaennamo ri Israel, nakassakkimi Yerobeam kota Sikhem ri daera pa’monconganna Efraim, nampa ammantang anjoreng untu’ sinampekang wattu. Nampa a’lampa pole battu anjoreng na nakassakki kota Pnuel.
26 Appikkiri’ kammaminne lalang ri atinna, "Punna tuli a’lampa ra’yaka mange ri Yerusalem untu’ assare koro’bang ri Balla’Na Batara sangkamma nagaukanga ri kamma-kammaya anne, lammotereki sallang amminawang ri Rehabeam, karaeng Yehuda, nampa nabunoa’."
27 (12:26)
28 Le’ba’na napikki’-pikkiri’ anjo passalaka, appare’mi rua patung sapi bulaeng, nampa nakana mae ri ra’yaka, "Bansa Israel! Sallo mako tuli a’lampa mange ri Yerusalem untu’ assambayang. Kamma-kamma anne, iaminne rewata-rewatanu, ia le’baka angngantarakko assulu’ battu ri Mesir."
29 Nampa naboli’ Yerobeam kalase’renna anjo sapi bulaenga ri Betel, na maraengannaya ri Dan.
30 Jari dorakami ra’yaka lanri a’lampana ke’nanga mange ri Betel siagang Dan untu’ assambayang.
31 Appaenteng tommi Yerobeam tampa’-tampa’ passambayangang maraeng ri coppo’-coppo’ monconga, siagang angngangka’mi imang-imang battu ri pantaranganna kaluarga Lewi.
32 Nampa natampakkang Yerobeam anjo imang-imanga ri Betel untu’ anggaukangi tugasa’na anjoreng, nampa ia kalenna assare koro’bang mae ri anjo sapi-sapi bulaeng napareka. Nampa napattantu angkana tanggala’ sampulo allima bulang sagantuju allo lompo untu’ Israel, sangkamma allo lompoa ri Yehuda. Anjo alloa a’lampai Yerobeam mange ri Betel siagang assare koro’bang untu’ ansuarri anjo allo lompo le’baka napattantu.
33 (12:32)
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA