¹ Men zene Kristen zisi nol eibirida gweꞌan, ee, ere mae mo syal bose, ama emsa enlala sobiridaꞌan: Kristus kim karek yala insa nebe mae hap goltoweka, ee ama aen nwekam kara taꞌak. Hwena zeno hyanak asa hen ki zep Kristen zisi de nol gwibiridan hap dam dasik. Hen Kristus kim de nebe mae hap zere mo ngatan zi mo langnak de ngatanna goltreizimꞌinka, nen apdekam esa desa hla kul. Zen in zebe emsa enlala sobiridaꞌan:
² Alap mo domba zahona dawem enkam esa kara la gwibir– Zena men kirekam nesa dwam gwibiridaꞌarake. Anakan bap nen eenlala gwe-gwen, “Ëe an eine syal gwe-gweꞌan.” Hen te-ala en hap bap nen syal ta gwen. Diki isrip-sri naban nen syal ta gwen.
³ Nen bap nen nere mae mo domba zahona anakan gubirida gwen, “Ëe an eno mae mo teipsinni.” Diki nenaka nen zebe mae hap erak makan kang gul gwen, “Alap mo domba zahona diki a kirekam mo lowehe gwenanye.”
⁴ Sap nesa de zaho ta gwibin hip de Zi tangan in kim de lwa haꞌan zaka, Zen sa hwena nebe mae hap ngatan nabare mire sigina kap tazim zira. Mire sigina in, zeno ngatanna hendep denaban sa zil ane gwer.
⁵ Domba zahokam de wenya, emki ere mae mo nol-nola blikip gwesibirida gwen. Hen enlala betekkam emki lowehe gwen– ebabu gwe-gwen zini men kirekam lowehe gwenanke. Sap Alap mo olak man lwak, “Alap bolte-bolte zisi man husus gwibirida gwenda, hwena enlala betek zisi man kwasang gwibirida gwenda.”
⁶ Zen in zep enlala betekkam nen ki anakare enlala naban lowehe gwen, “Ëe an Soson Zini Alap mo taha terenake gwe gweꞌan.” Zep nere mae mo engalap gwe-gwen enlalana kitak Zebon en onak nen eblol gwe-gwen, sap Zen man nesa kwasang naban kara ta gwibirida. Kirekame lowehe gweꞌak, ki Zen sa lamkam nebe mae hap bose dawemna golzim zira.
⁷ (5:6)
⁸ Nen ki nenaka dawem enkam goleinik gwe-gwen, deban janam-janamkam nen lowehe gwen. Sap neno mae mo jal zini, dowal mo kigina, zen man tesen lwa jal-jal mo kim yil-yili ban til gi nisen gweꞌara– mae hap, “Ëe an narasae tan?”
⁹ Zep Kristussu de taibliblan ennak de tatem ezauk gwenkam nen zereijan. Hen anakan nen ki eenlala gwe-gwen, “Ano mae mo Kristen bose walya tingare langnak kirekam de kareknak hen tatem ezauk gweꞌan.”
¹⁰ Sap nen awe karek goltowe gwen ennak molye holokam lowehe gwek, sap kwasang-kwasang Zini Alap nabakam sa nesa mas gwibirida zala. Zen sa nesa soson tabiri, hen gol mokosa de etan eiyas tandan makan sa nesa tatete tabiri. Sap nen an zen– Alap zere mo kwang guludan wenyaye, Kristus hun de zeraha-en gwen nakon dikim Alap zere mo ngatannak hendep denaban lowehe gwen hap.
¹¹ Diki soson tangan Zini Alap Ze-en– hendep denaban. In eiwa.
¹² Ëe surat tihisni ansa Silas Bak hone ebe mae hap gol sonezimk. Zen ano syal bose, hen zen taibliblan tanganna. Aya wal oso wal, ee mae habe ebe mae hap ale gulzimk: Eno mae mo enlalasa dikim tatete tazimdin hip, hen em dikim ere onakon anakan esane gwen hap, “Eiwa, banakare maesa de goltowen nakon, Alap mo kwasang-kwasangna kirekam nebon mae nwe-mase gwe-gwenan. Zep emki zeno kwasang-kwasangnak tatem ezaun.”
¹³ Ë yala Babelk de Alap mo hlil irin wal bose wal om dawem ensa ebe mae hap nol sonezimk. Ano dang tininak de walas zergwe gwenna Markus hen dawem ensa ep gol sonezimki.
¹⁴ Men kirekam Kristen zini egwe gwenan, ansa de baca gulsun hyanak emki kwasang naban enaka tahasa goletowaran. Tingan men zene Kristus hun eraha-en gweꞌan, nen zere mo taha terenak esa lowehe gwer.