Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Na'a in tongginaku mita kon itoi mita in jama'at i Allah inta kon sigad monimu. Aku'oi nomais tana'a saḷakubií yobayat topogaidan in itoi mita in jama'at bo saḷaku intau inta ain noko'ontong tontanií kon roriga i Kristus, bo inta mo'itakin doman kong kamulia'an inta popo'ontong i Kristus kon intau kon singgai mo'iduduimai. Po'igumonku totok,
2 ḷukadaibií monimu kopiara'an in domba i Allah inta aim pinosarakan ko'i monimu. ḷukadai takin sanang ing gina naí inta kino ibog i Allah, dikabií tongaí pakisa ing gina. Bo dika doman mogaid kon oaíidan tatua tongaí sakadar motayak kong ka'untungan tontanií, ta'e aidaibií intua sin lantaranbií mo'ikow totu-totu'ubií mo'ibog mopobayak in oaíidan i Allah.
3 Bo dikabií i mo'ikow naonda bo ponguasa ko'i monia inta pinokiḷukad ko'i monimu, ta'e mo'ikow mustibií mobalií contoh ko'i monia.
4 Sahingga ing kowakutu Gombala inta momulia mamangoi bui, mo'ikow motarima kon hadiah moḷoben inta diaí mogogoguya'at.
5 Naí doman tua, utatku mita inta nongomudapa, mokopotoindudui kon guyanga mita. Mo'ikow musti mokopo'ompaí kon dodia bo mo'ibog doman mosibantungan sing kom Buk Mosuci aim pinais nana'a: "Ki Allah mohukum kon intau inta mokaḷakuang, ta'e motabibií kon intau inta mo'ompaí in dodia."
6 Manangka intua kodu-koduduidon mo'ikow kong kawasa i Allah inta moropot, simbaí poḷantuddon-Nya i mo'ikow aka wakutunyadon.
7 Posarakaidon ko'i Allah im bayongan inta mokolia-liaw kong ginamu, sin Siabií in umuran mo'indoi ko'inimu.
8 Mokopo'ingatdon bo umuran pobasadia im mo'ikow! Sin Ibilis inta saturumu, maya-mayak makow naonda bo singa inta sindaḷan moganggor motayak kon onu inta mota'aunya ka'anon.
9 ḷawang in sia takin pirisayamu inta moroton, simbaí kota'auandon monimu kon utat mita naton inta mopirisaya ko'i Kristus kom bayongan dunia na'a nokorasa doman kon Roriga naonda bo mo'ikow.
10 Ta'e naonda im mo'ikow nokorasa kon roriga motoyong, yo ki Allah tontanií im moposompurna ko'i monimu. Potorindogon-Nya bo iropotan im mo'ikow. Sin Sia in Allahbií inta totok mopia ing gina, inta ain nogoinií ko'i monimu simbaí mo'itakin doman mokorasa kong kopia-Nya inta mononoi pongin i Kristus.
11 Siabií doman tua inta mongawasa modapot ing kopaḷutan yagi-yagi! Amin.
12 Suratku inta nopoḷok tana'a pinoki paisku ko'i Silas, intau inta inanggapkudon ginaḷum bo mota'au pirisayaan. Surat tana'a pinotuju ko'i monimu. Aku'oi im mononggina bo mopoyakin ko'i monimu, kon onu inta pinaisku na'a in habarbi' totu'u soaáḷ totabi i Allah. Manangka intua aku'oi moguman simba' mo'ikow umuran mokoporoton ing kumadai kon totabi i Allah ko'i monimu.
13 Yobayat mita tojama'atan takinku kom Babel inta aim pinilií doman i Allah, nokipoyaput in salam ko'i monimu, natua doman ing ki Markus ki adiíku inta kinotabiku.
14 Mo'ikow musti mosisalaman tobatuí bo tobatuí takin tabi saḷaku tumpaḷa Keresten. Po'igumonku makow ki Tuhan mobogoi im barakat bo kobiagan motompia ko'i monimu komintan inta ain nobalií kapunya'an i Kristus. Hormat nami, Petrus
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA