Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Nyak ngilu perhatian jelma-jelma sai mimpin jemaahmu. Nyak nulis inji sebagai kantik jelma sai mimpin rik sebagai jelma sai radu nyaksiko tenggalan penderitaan Almasih, rik sai haga nutuk juga diagungko, kik keagungan-Ni Almasih diliakko jama manusia. Nyak ngilu nihan

² in keti ngegembalako kumpulan biri-biri sai diserahko Allah jama niku. Gembalakodo tian jama senang hati injuk repa sai dimirakko ulih-Ni Allah, rik dangdo jama biak hati. Dang muneh ngelakuko guaimu guna dapok untung, melainko mani keti temon-temon mirak ngelayani.

³ Dang betindak sebagai jelma sai bekuasa tehadap tian sai dipercayako jama niku, melainko jadido teladan untuk tian.

⁴ Rik waktu Gembala Agung udi ratong kanah, keti haga nerima mahkota sai gemilang, sai mak haga mesuh gemilangni.

⁵ Reno muneh Puari, jelma-jelma ngura. Tundukdo jama jelma-jelma sai tuha. Puari sunyinni harus ngerendahko diri rik saling ngelayani jama rendah hati. Mani delom Alkitab tetulis injuk reji, "Allah nantang jelma sai mepungah, kidang mengasihi jelma sai rendah hati."

⁶ Ulihni seno, rendahko dirimu di debah culuk-Ni Allah sai kuat, in Ia ngelanggarko keti kik radu waktuni.

⁷ Serahkodo sunyin khuatermu jama Allah, mani Ia mempeduliko niku.

⁸ Hagani keti waspada rik siap siaga! Mani iblis anodo musuhmu. Ia injuk singa lapah mik dija mik dudi sambil mengaum nyepok mangsani.

⁹ Lawando ia jama iman sai kuat, mani keti pandai bahwa puari-puari peperda jelma Kristen barehni di seluruh dunia juga menderita injuk keti.

¹⁰ Kidang radu jak keti menderita serebok, Allah tenggalan haga nyani keti jadi sempurna. Ia haga nyecokko rik nguatko keti rik ngukuhko keti. Mani Iado Allah sai betik hati nihan, sai radu ngurau niku untuk nutuk ngerasako keagungan-Ni sai abadi liwat Almasih.

¹¹ Iado sai bekuasa sampai selama-lamani! Amin.

¹² Surat sai singkat inji kutulisko jama niku jama bantuan Silas, sai kuanggap sai puari Kristen sai setia. Nyak mirak ngeni durongan jama niku rik ngeyakinko keti bahwa api sai kutulis inji kabar sai benor tentang rahmat-Ni Allah. Hagani keti nyating teguh pada rahmat udi.

¹³ Kantik-kantik sai jemaah di Babilon, sai juga tepilih ulih-Ni Allah, ngirim salam jama niku; reno juga anakku Markus sai tecinta.

¹⁴ Besalam-salamdo peperda keti jama penuh kasih sebagai puari Kristen. Semoga Tuhan ngeni sejahtera jama Puari sai jadi kedau-Ni Almasih. Hormat sekam, Petrus

1 Petrus

Video 1 Petrus 5

Ikuti Kami:

KONTAK | PARTISIPASI | DONASI