Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dara yeng yedag mougt naugb yen yesedougwo Allah men lusud se goucimdeb, kaba, dan desulou yen dara goubesa namcir. Dauntoba yen yemaisan gurog dau sug yen yagauwesa lusud dag domba gedig Allah ogugwo deb se yen meisirohob gin touwero. Doba yen yeic meijuwemougb esesa naugb yen yesedougwo len dara geigouhw namcir. Dara sug yen yesedougwo len, kaba, yen yemecbec se gin touwero. Doba yen yaimo augwan gini dara yen meigdoc erleij an len dous. Anai gini aimo dau areg asesa Allah enin medoc mes namcirohob. Dara sug yen yesedougwo len, kaba, yen yemarerei aremougb dau len touwero. Doba yen yagauwesa len dareg yen meigdoc esgiraha an gin terimda. Dan desulou yen dag gini, anai dan toua dedag mougt naugb dan desedougwo Allah men lusud. Dara sug len leic mog erij dou Krisdus sug nosa, kaba, danin deiya se dan indires touohob. Dangga hang, ebiji dau lona sug Allah ens Krisdus se men gogouf cucugb ainyes dou lusud, kaba, en emogugwo men gogouf cucugb gini ingma dou dan, aninim dag en emogugwo men gogouf cucugb ingma se lona ingga dou yen toua.
2 (5:1)
3 Dara len gedig Allah ogugwo se yen meisirohob, kaba, yen yemeigdoumesa yenin meijoho dag mougt mera medam naugb yen yemaiyan len touwero. Doba yen yedag gansins deinaugb len terimda.
4 Sug yen yes agadgeij se gin terimda, kaba, gogouf cucugb areg Allah esedeb naugb yenohob, kaba, emediyebeiya dau yen touwero. Doba ebiji dau lona sug en ens maman Gembala Moho Gagas dou lusud, kaba, en emogugwo dau gogouf cucugb gini ingma dou yen toues. Dara men gogouf cucugb gin, kaba, mohw emousireij touwero, doba eb huhugb namcir.
5 Dangga toua, naugb yeng yedag yugdeh mesaba, kaba, yen yemeic meijus deseino meijen mougtir naugb yen yohoiya len merir touwero. Doba yen yaimo len merir se aremer augwan toua terimda. Dara yen yaugwan, kaba, yen meigdoc emagas anim touwero. Doba yen yowun yenin meigdoc mes arjaga doum. Hanoba yen yei iremeb aiyim terimda toua. Anai gareg en medoc agas, kaba, Allah ougb sogo maga dougwo en mebes namcir. Doba gareg en owun enin medoc mes arjaga, kaba, Allah medoc eineg an en. Hanoba en eic geigouhw dou en toua terimda. Augwan gini aimo dau areg len log deb se Surad Injil Meb Mohon deb sug nosa touohob.
6 Hang yen meigdoc emagasero. Doba yen yowun yenin debsa Allah enin mesira mes naugb yen yaimo en terimda. Dauntoba edebeij lona areg en medoc edug sehob, kaba, en eigdoumesa yen meijoho toua. Anai enin eng mobisamougb dau augwan namcir.
7 Dangga sug yen meigdoc momogo an ara ara, kaba, yen yogugwo augwan gini deb se Allah enin mesira dous. Anai en, kaba, en medoc eineg an yen. Hanoba en agauwesa dara eseyeiyo yen dougwo areg gecgu augwan toua.
8 Dara yen yesedeh yauweila dougwo meijen moc Bilis gin toua terimda. Anai en, kaba, en edag mihiloro medam gowi asa ucina naugb en au yen.
9 Dangga hang, yen yemobsara dau sug yen meigdoc ebdebin an Krisdus touwero. Doba yen yaiyan meigdocesem. Hanoba yen yes agadgeij dougwo Bilis toua namcir. Anai yen yecinaga dag yenin dous eng yemaimo ucina mog erij ginero. Doba eb naugb yen meijaguner dara yen meigdamouwer se cinogo gus augwan touohob.
10 Doba Allah, kaba, en eija yen aud en. Dauntoba sug yen meigdoc dag hom dara Krisdusohob, kaba, yen yeigtou desij en se men gogouf cucugb beb huhugb namcir toua. Anai eni sud hom gedig en medoc an lusud naugb en eic geigouhw dou len toua terimda. Dangga hang, sug en medoc gororougb yen dag ginohob, kaba, en emarges dau yen. Doba en ousa yen, dauntoba yen yemobsara dau ucina aud maireseb menau geb huhugb gin touwero. Doba en eic goubesa dou yen naugb yen yaiyan meigdocesem. Hanoba yen yes agadgeij naugb yen yaimo ucina gini terimda yen yedebeij men usi gin toua namcirohob. Anai ucina mog erij areg yen yaimo iteitogin, kaba, dag cum cum dous.
11 Dangga eigouhw naugb maman maigdoumesa en moho agas taiba augwan beb huhugb terimda. Augwan gini asesa dag misen namcir.
12 Dan dog surad agarougb dag gini dou yen, dauntoba dan denara dad yen meigdoc mes. Dara dan dauma debin dag areg yen yaimohob gin, kaba, dag augwougwero. Doba esogwa deisa areg Allah medoc eigouhw an yen augwan dag misen touohob. Dangga hang, yen yemobsara dau ucina mog erij gin touwero. Doba yen yes agadgeij namcir naugb yen yaimo terimda. Dara areg dan dog gini, kaba, dan demog ai danin insirero. Doba dan darougb maman mamaguna Silas en og dou dan naugb dasulou yen. Anai dan decinaga en toua edag sud hom gedig en emobsara dau Krisdus touwero. Doba en aiyan meigdocesem naugb en aimo Krisdus dara en medoc augwan toua terimdohob.
13 Leng se goucimdeb se cinogo Babel sugin, kaba, len laugwan lou yen. Anai Allah ouci len debinim naugb en, aninim dag yen touohob. Dara dan indisi se Krisdus, moho Markus, en ou yen toua.
14 Sug yen youcimdeb, kaba, yen yanim dara you meijufesem toua. Anai gini ansins dag yen yedag hom dara Krisdusohob. Dara gareg dau yen en edag hom dara en dag ginohob, kaba, dan dacgeij Allah naugb en eseyeiyo en dougwo areg gecgu augwan toua terimda.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA