Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 U'andrõ wa'aboto ba dõdõ khõ ndra sondrõnia'õ ba khõmi. Usura da'e, ya'o awõra satua, si no manehegõ famakao Keriso, ba sedõna fao ba lakhõmi, na teforoma'õ lakhõmi Keriso andrõ ba niha. U'andrõ sibai
2 ena'õ mikubaloi mbiribiri si no Itou'õ ba dangami Lowalangi. Mikubaloi ira si fao fa'omuso dõdõ si faudu ba zomasi Lowalangi, ba bõi moroi ba wa'abua gõlõ. Bõi gõi milau da'õ ha ba wangalui luo, ena'õ me sindruhundruhu omasi ami mõi enoni.
3 Bõi si mane samatõrõ ami ba khõra si no mufaduhusi tõdõ khõmi, ena'õ tobali dumaduma ami khõra.
4 Ba ba ginõtõ we'aso Gubalo Sebua andrõ dania, ba mitema dakula solakhõmi andrõ si tebai ahoe.
5 Si manõ gõi ami, ya'ami sawuyuwuyu. Mi'o'õ li zatua moroi khõmi. Dozi ami, faoma mi'olembe wa lõ fayaw̃a, ba mi'ae enoni nawõmi si fao fangidengide'õ. Bõrõ me ba Mbuku Ni'amoni'õ no tesura imane, "Itimba Lowalangi zi fayaw̃a, ba I'ebua'õ dõdõ-Nia ba niha sangidengide'õ ya'ira."
6 Bõrõ da'õ mi'ide'ide'õ ami barõ danga Lowalangi sabõlõ, ena'õ I'alaw̃a'õ ami na no inõtõnia.
7 Mitou'õ fefu noro dõdõmi khõ Lowalangi, so so sa dõdõ-Nia ami.
8 Ya mangenanõ ami ba mi'ama'anõ! Bõrõ me no udumi Gafõkha. Hulõ zingo sanõrõnõrõi, ba sindrõndrõndrõndrõ, i'alu'alui ni'ania.
9 Mitimba ia faoma famati saro, bõrõ me no mi'ila wa ira talifusõmi Niha Keriso tanõ bõ'õ ba gulidanõ ma'asagõrõ lataõgõ gõi wamakao si mane ya'ami.
10 Ba na no aefa mitaha wamakao si lõ arara, ba Ya'ia zamo'ahonoa ya'ami. I'abe'e'õ, ba I'abõlõ'õ, ba I'a'aro'õ ami. Me Lowalangi si fahõna fa'asõkhi dõdõ Ia, si no mogaoni ya'ami ba wefao ba lakhõmi-Nia andrõ sebua si lõ aetu ba khõ Keriso Yesu.
11 Khõ-Nia so wa'abõlõ irugi zi lõ aetu! Yaduhu!
12 No usura khõmi zuragu sadogodogo andre, nitoloni Ziliw̃ano si no u'otalifusõgõ si lõ farõi. Omasido ufarou dõdõmi ba u'a'aro'õ ami wa nisuragu andre ba no turia satulõ sanandrõsa ba wa'ebua dõdõ Lowalangi. Mi'a'aro'õ ami ba wa'ebua dõdõ-Nia andrõ.
13 La'owai ami awõda nituyu andrõ, banua Niha Keriso ba Mbabilona, si manõ gõi nonogu Mareko ni'omasi'õ.
14 Faoma mi'owai nawõmi moroi ba wa'omasi, si mane si fatalifusõ ba wa'aniha Keriso. Ya So'aya zame'e fa'ohahau dõdõ khõmi fefu si no tobali tana khõ Keriso.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA