Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Idi kuan amung lun rayeh sidang luk arang muyuh, ini aceh bada'ku, ngaceku ui pana' seburur lun rayeh teh, idi ui mangun ku lun luk nekali' ratnan dereh Keristus, idi teh ui miak ngalap babpat rayeh luk miak uen ngegala'.
2 Ui mutuh nemuyuh: do' matar dumba Allah luk inan arang muyuh, baken dengan sinaad, iamo' dengan awang niat maya' pian Allah. Aleg ngakem ngaceku sikal ngalap tabpar, iamo' ngakem ngaceku pian ngedengan.
3 Aleg muyuh mepad kudeng lun ngimet ukum kuan lemulun luk biré nemuyuh, iamo' do' muyuh mangun ku luk pinginud kuan sengeriudan dumba ineh.
4 Idi kareb Lun Rayeh lun matar ineh uen ngegala', muyuh miak ngalap pata rayehNeh luk na miak mekarang.
5 Kudeng ineh teh, O muyuh lun luk anak adi', do' muyuh mebeneh ratnan lun rayeh-rayeh ineh. Idi do' amung-amung muyuh dengan niat luk mebeneh ngedengan seburur dengan luk baken, ngaceku "Allah sikal metueh ratnan lemulun luk medita' niat, iamo' Ieh maré katuNeh kuan lemulun luk mebeneh niat."
6 Ngaceku ineh do' muyuh ngebeneh burur muyuh pa liang ticu' Allah luk meluun melalud ineh, pad Ieh ngedita' nemuyuh bang karebNeh.
7 Do' maré amung-amung rapang muyuh kuanNeh ngaceku Ieh luk ngerawé nemuyuh.
8 DO' muyuh ngerawé, idi matar do'-do'! Iblis luk bunu' muyuh ineh, mepad kudeng balang luk ngeku luk nalan-nalan nakap idé luk miak kenenneh.
9 Do' muyuh munu' neneh dengan nau muyuh luk meraben, ngaceku muyuh kali' amung-amung dereh luk kudeng ineh teh miak mangun kuan kinanak-kinanak muyuh luk libut-libut tana' ini.
10 Idi Allah, lawa amung-amung katu, luk pangeh nenawar nemuyuh semuet bang rayehNeh luk meruked bang Keristus, kareb muyuh pangeh nengalap dereh bang segageh mo', idi Ieh luk miak ngeligan nemuyuh idi ngeraben nemuyuh idi ngetueh nemuyuh pana'.
11 Idi kuanNeh lalud ruked-ruked peh. Amin.
12 Idi dengan ayud ticu' kinanak tau Siluanus, luk lutep maya' luk pianku, ui ngayud surat ini dengan sesuut kuan muyuh, pad mada' idi maré kali' ratnan katu Allah ini luk matu. Do' muyuh lutep bang ineh.
13 Idi sidang kinanak-kinanak muyuh déi' Babil, luk pinili' mepad kudeng muyuh sebuleng, maré tabi' kuan muyuh, kudeng ineh teh anakku Markus.
14 Idi do' muyuh maré tabi' seburur kuan seburur dengan pebuen luk meligan. Idi do' awang ngedengan amung-amung muyuh luk idi bang Keristus.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA