¹ Angkam mensa suratkam asa lakensiblik, Alap mo Enho nakore soson hap dena, men desa Alap Zena kae gwibir-zimnira gwendake, desae ep ding gulzimꞌin: Ëe ama dwam gweꞌan em de eiwa denaka tame gun hup.
² Emki eenlala gwen: Em kime Biansa tame la srem gweꞌak, em dekam yang tabin alap-alapsae ang eibirida nasen gwek– ol srem wenyaka.
³ Ëe in zebe emsa dwam gwibiridaꞌan– eno mae mo jematsa de aha zi tawa tabin hip yaing gwe-gwe zankam, em de dekam zeno mae mo tawa tabin nikon anakan kles so gwen hap, “Alap mo Enho de zisi zergwenna, zen bejen anakan gun, ‘Yesus zen karekna.’ Hen Alap mo Enho de zergwen sremkam, zen bejen anakan gun, ‘Yesus Zen ano teipsinni.’”
⁴ Alap mo Enhona, Zen aha-ere nwe-masekam de sosonsa hom nebe mae hap kae gwe-gwibir-zimnira. Hwena ausuna sap aha-en– zere onak.
⁵ Syala hen sren-srenkam de nwe-mase naka wei yul sone gwizimnira. Hwena in Zen syala insa gwirensiꞌira, Zen aha-en.
⁶ Banakare maesa de syal gwibin hip de sosonna, desa hen sren-srenkam gol gwizimnira– men kirekam zebe mae hap dakastil gwizimninke. Hwena Zen aha-ere Alap ki anakare enlalana ing ta sone gwizimnira, “Ëe anik kirekam syal gwek.”
⁷ Alap mo Enhona Zen kirekam nebe mae hap aha-en aha-enkam sosonna kae gwe-gwibir-zimnira– nen dikim hwena tingare Kristen zisi tatete ta gwibin hip.
⁸ Zep a kirekam mo Alap mo Enhona zi mo enhonak syal gwe-gwenda: Ahakorena kip enlala blalsa ing ta sone gwizimnira– zen de dekam aha zisi titi ta gwibin hip. Hen ahakorena kip Zen ba maesa de tame gun hup denaka ing ta sone gwizimnira– dekam de zen hwena aha zi hip ayang gul gwizimdin hip.
⁹ Alap mo Enhona in ahakorena kip serkam dikim Alapsa taibliblan hap denaka ing ta sone gwizimnira. Hen ahakorena kip zi sang-sangsa dikim dawem ta gwibin hip de sosonsa gol gwizimnira.
¹⁰ Ahakorena kip owas-owassa dikim syal gwe-gwibir-zimdin hip denaka gol gwizimnira. Ahakorena kip Alap mo Enhona hamal hap de olsa dikim ayang gulzimdin hip denaka gol gwizimnira. Ahakorena kip dam gulsuk gwen hap de sosonsa gol gwizimnira– zen dikim anakan dam gulsuk gwen hap, “Zini in mo ol toranna, zen eiwa Alap mo Enho nakorena,” ahaksa, “Zebon onakore naka hom.” Hen ahakorena kip owas olkam dikim etoran hap denaka ing ta sone gwizimnira. Hen ahakore wenya kip, zen dikim owas ola insa zere mae mo olkam li yul sone gwizimdin hip denaka ing ta sone gwizimnira.
¹¹ Syala in zen kirekam sren-sren gwek, zen sap ausuna aha-en Alap mo Enho Zen ki kirekam syal gwe-gwenda. Zen sosonna zere mo dwam gwibin sin nebe mae hap aha-en aha-enkam kae gwe-gwibir-zimnira.
¹² Kristus mo timni, zen neno mae mo tim makan. Timni sap aha-en, hwena dekon zep hli-hli gwek.
¹³ Zen zep hen kirekam, nen kitak sap Yahudi zi, sap Yahudi srem zi, sap tana iltikinnik de lowehe gwen wenya, hen kirenak de lowehe gwen srem wenya, nen kitak mese zere mo timnik biti gwek– Alap kim zere mo Enhokam nesa hle ta sonebiridakake. Zen aha-ere Enho ki kirekam nesa aha-en tabirki, sap nen mese kitak Alap mo Enho nakore hona ulink.
¹⁴ Sap timni bejen aha-ere hli naban sam gwesin. Zen diki hli-hlina zen beya gwen.
¹⁵ Tanana bejen anakan neran, “Ëe ama taha hap de jo ken hap dwam eꞌan. Timni an mo tana en hap, ee ama bae.” Zen de kirekam nerankam, hwena tanana in bejen taha hap jo nen, hen bejen timni insa hli kun.
¹⁶ Hen ingalana bejen anakan neran, “Ëe ama nwe hap de jo ken hap dwam eꞌan. Timni an mo ingala en hap, ee ama bae.” Zen de kirekam nerankam, zen hwena bejen timni in kon nwe san dep li kehen, hen bejen timni insa hli kun.
¹⁷ Tingare hli-hli nik de nwe en hap ejowenkam, ki hwena bakam de esane gwe-gwen hap? Ahaksa ing ala hap de ejowenkam, ki hwena bakam de ba maena alebin hip?
¹⁸ Zen Alap Zen mes-am ki timni insa sren-srenkam de hli-hli naban yang gulsuku– men kirekam de yang gulsun hup Zena dwam gwekake.
¹⁹ Aha-ere hlina bejen anakan gun, “Ëe en asa tingare timni an mo syala sul sone gwer.”
²⁰ Zep man sam gwesinin– hli-hlina sap beyana, hwena timni aha-en.
²¹ Zen in zep, nwe bejen tahasa anakan enzimdin, “Ëe home emsa dwam eizimꞌin.” Hen nola bejen tanana guzimdin, “Ëe home emsa dwam gwizimꞌin.”
²² Nen de tim nikore aha hli naka enlala gwibinkim, “Zen soson tangan naka hom,” zen hwena desa ema tangan dwam ei gwibirin– dekam de gwen hapye.
²³ Hli-hlina mensa enlala eblanda gwenan, “Zen dawem tangan naka hom,” zen hwena desa tangane dawemkam oleinik gwe-gwenan. Hen hli-hlina men desa saher ei gwibirin, zen desa tangane dawemkam aning ul gwenan.
²⁴ Hwena hli-hlina men zen nwekam de hlaunkum edawem gwek, desa hwena home aning gun hup enlala ei gwibirin. Zen Alap mes ki kirekam de enlala naban timni ansa yang gulsuku, “Dikire soson srem hli-hlina dawemkam noleinik gwe-gwek.”
²⁵ Zep timnik de hli-hlina in bejen sren-srenkam hlik-hlik gwen. Zen hwena hwe-hwekam zenaka mas neibirida gwenan.
²⁶ Zen in zep, aha hli nik de sang-sang gwenkam, dekam tingare hli-hlina in sang-sangna insa man neis gwibirin. Hen em de dawemsa tahakam gul irinni ahaksa nwekam hlaunnu, tingare hli-hlina dekam man eisrip-sri gwe-gwenan.
²⁷ Zep em in kitak Kristus mo timni, hen zeno hli-hlina.
²⁸ Alap zep sren-srenkam de syal hap Kristen zini nesa dam tasik gwibirida: Mam tangan wenya, zen Kristus hup de ol dawemsa de aha lang san gol halada gwen hap de wenya. Zao de wenya, zen Alap mo Enhokam de hamal hap de olsa ayang gul gwizimdin hip de wenya. Hen etan zao de wenya, zen Alap mo olkam de tawa ta gwibin hip de wenya. Hwena ahakon owas-owassa de syal gwe-gwibin hip de wenya, ahakon zi sang-sangsa de dawem ta gwibin hip de wenya, hen ahakon aha zisi de mas gwibirida gwen hap de wenya, hen ahakon jemat mo syalsa de nol gwibin hip de wenya, hen ahakon owas olkam de ton gwibin hip de wenya.
²⁹ Zen a dekon mo sren-sren gwekye: Sap nen home Kristus hup de olsa dikim gol halada gwen hap de sosonna kitak ulink. Hen nen ahakon home Alap mo Enho nakore sosonna ulink– hamal hap de olsa dikim ayang gul gwizimdin hip denaye. Hen Alap mo olkam dikim ahasa tawa ta gwibin hip de sosonna nen home kitak ulink. Hen nebon mae kitak sosonna hom– owas-owassa dikim syal gwe-gwibin hip denaye,
³⁰ hen zi sang-sangsa dikim dawem ta gwibin hip dena, hen owas olkam dikim ton gwibin hip dena, hen kire olsa dikim srip gulsuk gwizimdin hip denaye.
³¹ Zen in zep, em dawemkam enho nakon dwam gwe-gwibin– dekakim Alap mam tangan wenya insa ebe mae hap aha-en aha-enkam kap ta gwizimki. Alap mo Enho nakore soson kae gwe-gwibir-zimdinni, zen hen airis. Hwena dekam de tangan sowehen hap, anik ebe mae hap ora dawemna ansa zertreizimk: