Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali, lulu lengko to si aku, ewa nikangku mangalulu lengko to si i Kerisitu.
2 Wali a’i-a’i, aku mangabarong komi apa ri rayanya samparia to mawali komi sangkani mangendo aku. Pasi komi sangkani mangaluluka kojo anu to roomo kuporata resi komi seore.
3 Pei re’e wo’u to aku rani mampaponsanika komi. Wali ewa si’i. Ane tau to langkai kepalanya i Kerisitu, pasi to we’a kepalanya to langkai, pasi i Kerisitu kepalaNya i Pue Allah.
4 Wali tempo komi siromu, i sema-sema tau langkai to mangantorung wo’onya tempo makaikai bara tempo mamporata tuntu i mPue Allah, tau langkai etu mangarunes kepalanya.
5 Pei i sema-sema tau we’a to taa mangantorung wo’onya tempo makaikai bara tempo mamporata tuntu i mPue Allah, tau we’a etu mangarunes kepalanya. Wali tau we’a to see sewaju ewa tau we’a to roomo rakosi yau wayuanya.
6 Wali ane bara re’e tau we’a to taa rani mangantorung wo’onya tempo makai-kai, to tao-tao ia ragunting yau wayuanya naka podo bara rakosi yau. Pei ane napokea ia rapu’aka yau wayuanya bara rakosi yau, to tao-tao ia mangantorung wo’onya.
7 Pei tau langkai taa masipato mangantorung wo’onya tempo makai-kai bara tempo mamporata tuntu i mPue Allah apa ia ewa gambar i Pue Allah pasi ia mampaporao anggaNya. Pei tau we’a, masipato ia mangantorung wo’onya tempo siromu apa ia mampaporao angga nto langkai.
8 Apa si’a tau langkai to raika yako to we’a. To we’a semo to raika yako to langkai.
9 Pasi si’a to langkai to rapapowali damangansawang to we’a. To we’a semo to rapapowali damangansawang to langkai.
10 Wali see naka tau we’a masipato matoru mangika tondong ia re’e ri ara ngkuasa ndongonya. Apa re’e pomakau i mPue Allah mangalo’alo’a palaong to nika ngkita.
11 Pei nempo ewa wetu, ane resi kita to samba’a pei i Pue, to we’a tare batuanginya ane tare to langkai pasi to langkai tare seja batuanginya ane tare to we’a.
12 Apa ri pamulanya tau we’a raika yako to langkai, pei yako etu tare to langkai to taa napoanaka nto we’a. Pei kamonsonya samparia anu to re’e, paka i Pue Allah semo pu’unya.
13 Wali komija mangabotus. Bara masipato tau we’a makai-kai resi i Pue Allah ane taa mangantorung wo’onya, bara taa masipato?
14 Rapanya ane yako ri pampobuuka nto lino semo komi mangansani ane tau langkai to marade wayuanya, masipato rapokea.
15 Pei ane tau we’a to marade wayuanya, wayuanya etu mawali karoronya. Apa wayua to marade nawaika i mPue Allah tau we’a mangantorung iaja.
16 Wali ane bara re’e tau to rani mangabanta gombongku mangkonong tau we’a mangantorung wo’o nsira tempo siromu damampue mampakabae i Pue Allah, to’oka tau etu kami pasi tau to mangaya i Pue pasi to i Pue Allah Puenya to siromu nja’u lipu-lipu to yusa, kami tare ada to yusa to nalulu mami.
17 Wali re’e wo’u paposia to aku damanganto’oka komi. Pei ane mangkonong anu to si’i aku taa mangabarong komi. Apa tempo komi siromu, palaong to nuika ngkomi taa mampakaroso pangaya ngkomi. To nuika ngkomi etu ojo mampakayu’u pangayamu.
18 Wali to uyunya aku rani manganto’o re’e tau to mampakarebaka resi aku mangkonong komi. Kareba etu manganto’o komi to mangaya ane siromu biasa wungka yusa pampobuuka ngkomi. Pasi aku mampobuuka kareba etu re’e to monso,
19 apa ane to lino biasa kojo mawali ewa wetu. Pei nempo ewa see, tiroo bae batuanginya resi komi apa yako palaong to etu see naka daransani to imba komi to pampobuukanya singkonong pei i Pue Allah.
20 Wali apa saba palaong to mawali resi komi etu, see naka tempo komi siromu damangkoni sindarandara damangendo kapate i mPue, tempo etu taa masipato lengko ngkomi.
21 Apa tempo komi mangkoni etu komi ojo mansaka mangkoni pangkoni to keni ngkomi samba’a pei samba’a. Tare to mangampea yununya. Wali see naka re’e to moro apa taa gana pangkoninya pasi re’e seja to kayangu apa bae manginu tule.
22 Gete komi, maka pei taa mangampake banua ngkomi ane damangika palaong to ewa wetu? Komi bara taa manga’angga yunu ngkomi to mangaya pasi to i Pue Allah Puenya, apa komi ojo mampakamea yunu ngkomi to masiasi, to taa gana pangkoninya. Wali kesaa to dakuto’oka komi? Bara masipato aku mangabarong palaong ngkomi etu? Gete taa!
23 Apa anu to kuporata resi komi seore, i Pue semo to manganto’oka aku. Etu semo mangkonong kesaa to naika i mPue Yesu ri wuri to pangamposora i Yudas Ia. Ri wuri etu, re’e katawanya Ia raposora, Ia mangoko roti
24 panewa Ia makai-kai manganto’oka i Pue Allah tarima matao. Roo see Ia mangampesu-mpesutimo roti pei manganto’oka anaguruNya, “Si’i korongKu anu to Kuwaika komi. Konimo see taa nukalingan ngkomi Aku.
25 Pasi ewa see seja, tempo sira room mangkoni, i Yesu mangoko wo’u sangkir to la’u anu to danainu nsira. Panewa Ia manganto’o, “Anu to re’e ri raya nsangkir si’i, si’i semo tondong parajanji i mPue Allah anu to bou. Parajanji etu raangKu semo to mangabanang. Wali inumo apa ponto tempo komi manginu anu si’i, komi taa mangkalingan Aku.”
26 Wali batuanginya gombo i Yesu etu yako tempo si’i sampe rata temponya Ia dama’i muni, ponto tempo kita mangkoni roti etu pasi manginu anu to re’e ri sangkir, batuanginya kita mampakarebaka mangkonong kapate i mPue.
27 Wali anu kita mampobuuka kojo tempo kita mangkoni roti etu pasi manginu anu to re’e ri sangkir etu. Apa tau to taa mampobuuka bae batuanginya, ia sewaju pei mampobuuka taa bae batuanginya koro pasi raa i mPue. Wali palaong etu mawali dosa resi ia.
28 Wali see naka to tao-tao kita mangamparesa kojo ri raya ngkita samba’a pei samba’a panewa mangkoni roti etu pasi manginu anu to re’e ri sangkir etu.
29 Apa ane kita mangkoni pasi manginu pei taa mampobuuka kojo koro i mPue, kita danahuku i mPue Allah.
30 Wali see naka re’e tau to ri oyo ngkita to taa maroso koronya, pasi re’e seja to masaki pasi re’e seja to mate yau.
31 Pei ane kita mangabotus koro ngkita ngkalio samba’a pei samba’a, kita taa danabotus i mPue Allah.
32 Pei tempo i Pue Allah mangabotus kita Ia mangika ewa pa’a to mangantidas ananya. Naka pei Ia mangika ewa wetu see kita taa darahuku sindarandara pei to lino to taa mangaya i Pue.
33 Wali a’i-a’i, ane temponya komi siromu damangkoni mangendo kapate i mPue Yesu, tempo etu peas yunu ngkomi samba’a pei samba’a panewa mangkoni sindara-ndara.
34 Ane bara re’e tau to moro komponya, to tao-tao ia mangkoni ri banuanya ruyu naka ne’e komi siromu ojo danahuku i mPue Allah saba mangika palaong to taa masipato. Wali ane mangkonong palaong to yusa, tempo aku rata resi komi panewa aku damampakanasaka komi.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA