Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Do' muyuh maya' ulunku, kudeng ui pana' maya' ulun Keristus
2 Ui ngubur nemuyuh ngaceku muyuh megéi ngerawé idi maya' bada' luk biréku nemuyuh.
3 Iamo' ui sikal nemuyuh kali', idi luk ngimet anid-anid burur deléi, Ieh ineh Keristus, idi luk ngimet decur, ieh ineh deléi, idi luk ngimet Keristus ineh, Ieh ineh Allah.
4 Idi anid-anid deléi luk sembayang idi luk mada' dengan ngebpu uluhneh ngigu' Keristus,
5 iamo' anid-anid decur luk sembayang idi mada' luk biré Allah dengan na ngebpu uluhneh ngigu' awanneh. Ieh mepad kudeng seburur decur luk kiniki.
6 Kudeng seburur decur na ngebpu uluhneh, nima' abpukneh uen muting teh. Iamo' ngaceku na petulu kuan decur ngiki uluhneh idi muting abpukneh, nima' neneh ngebpu uluhneh.
7 Na do' deléi ngebpu uluhneh, ngaceku ieh pinginud ayu idi rayeh Allah. Iamo' decur ineh pinginud rayeh lun deléi.
8 Ngaceku deléi ineh baken punneh ratnan decur, iamo' decur ineh ratnan deléi punneh.
9 Idi deléi ineh baken pinudut ngaceku decur, iamo' decur ineh pinudut ngaceku deléi.
10 Ngaceku ratnan amung-amung melaikat, do' decur nganau' luun uluhneh aceh tanu' ieh liang imet awanneh.
11 Iamo' bang ulun tau bang Tuhan, na luk idi decur dengan na deléi, idi na luk idi deléi dengan na decur.
12 Ngaceku mepad kudeng decur ineh ratnan deléi punneh, kudeng ineh teh deléi tinganak ratnan decur; iamo' amung-amung ineh ratnan Allah.
13 Do' muyuh ngerawé, petuluké seburur decur sembayang inan Allah arang lun mula', dengan na ebpu uluh?
14 Naké pekalai kudeng seburur deléi inan abpuk mekadang, ineh mangun ku igu' kuanneh?
15 Iamo' kudeng decur inan abpuk mekadang ineh mangun ku rayeh kuanneh. Ngaceku abpukneh ineh biré kuanneh mangun ku ebpuneh.
16 Kudeng inan lemulun pesaad ratnan ineh, idi kai pebala, "Ini adat bang sidang kai, idi amung-amung sidang Allah pana'."
17 Maya' kudeng bada' ini, ui na ngubur nemuyuh, ngaceku tebubpun muyuh na ngacing luk do', iamo' ngacing luk dat.
18 Pun-pun ui ninger, kareb muyuh tebubpun bang sidang, inan tuda'-tuda' kedaluh arang muyuh, idi lélé ui manu ku ineh.
19 Na miak na inan babpat arang muyuh, pad lemulun luk matu ineh megala' siren muyuh.
20 Kareb muyuh tebubpun, setuneh baken Irau Tuhan luk kenen muyuh.
21 Ngaceku bang irau ineh anid-anid burur singaro kuman luk kenenneh sebuleng, pad inan luk melau idi inan luk mabuk teh.
22 Naké ruma' luk inan muyuh kuman idi ngirup? Ngudehké muyuh ngedat sidang Allah idi ngigu' lemulun luk masi'? Anunké luk miak belénku nemuyuh? Miakké ui ngubur nemuyuh? Na tu-tu! Ui na ngubur nemuyuh.
23 Ngaceku ui nengalap ratnan Tuhan bada' luk biréku nemuyuh: ieh ineh kareb malem luk inan Tuhan Yésus pinasui, idi Ieh nengalap ruti,
24 idi pangeh Ieh nemaré ubur, idi Ieh nemuri' ruti, kebalaNeh, "Ini bururKu luk biré ngaceku muyuh. Nganau' kudeng ini mangun ku aceh terawé ratnan Ui."
25 Kudeng ineh teh kareb pangeh nekuman, idi Ieh nengalap sangkir, kebalaNeh, "Sangkir ini, ieh ineh pejani' Allah luk mebaruh luk itu ku dara'Ku. Anid-anid kareb muyuh ngirup, nganau' kudeng ineh mangun ku aceh terawé ratnan Ui."
26 Ngaceku tuda'-tuda' kua' muyuh kuman ruti ini idi ngirup ratnan sangkir ini, muyuh mada' até Tuhan pad Ieh macing.
27 Ngaceku ineh idé-idé luk kuman ruti ineh, idi ngirup ratnan sangkir Tuhan ineh dengan na mayu, idi ieh mesala' kuan burur Tuhan idi dara'Neh teh.
28 Iamo' do' lemulun ngerawé ulunneh sebuleng, idi pangeh ineh do' ieh kuman ruti idi ngirup ratnan sangkir ineh.
29 Ngaceku lemulun luk kuman idi ngirup dengan na ngerawé burur Tuhan, idi ieh kuman idi ngirup aceh ukum kuan bururneh sebuleng.
30 Idi ini punneh mula' rat arang muyuh luk melaya' idi mét, idi inan teh luk pangeh naté.
31 Kudeng tau ngerawé ulun tau sebuleng atun, na tau miak kumin Allah.
32 Iamo' kudeng tau kumin, idi tau badén Tuhan dengan ukum, pad tau na mekaneh ukum pad-pad dengan tana' ini.
33 Ngaceku ineh, O kinanak-kinanakku, kareb muyuh pamung kuman Irau Tuhan, do' muyuh nganét nelun baken.
34 Kudeng inan seburur luk melau, nima' neneh kuman bang ruma'neh, pad kareb muyuh tebubpun, muyuh na kumin Allah. Ratnan luk baken-baken ineh ui sikal ngegala' kareb ui macing.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA