Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Kenca piga-piga paksa, kelegon e menam telu tahun dekahna nina TUHAN man Elia, "To cidahken bandu man Raja Ahap, maka Kupesusur udan."

² Emaka berkat Elia. Paksa si e kelihen i Samaria nggo seh kal sangatna,

³ emaka idilo Ahap si Obaja. (Obaja kalak si ertugas ngurus istana. Ia kalak tutus nembah man TUHAN.

⁴ Asum Isebel munuhi nabi-nabi TUHAN, idilo Obaja seratus kalak, jenari ibunikenna i bas gua-gua, lima puluh kalak sada inganen. Ia si nikapken pangan ras inemen man kalak e.)

⁵ Nina Ahap man Obaja, "Ota, sinehen kerina sumbul ras baluren i bas negeri e ntah banci dat kita gagaten si cukup guna kerina kuda ras kaldenta. Adi cukuplah gagatenna tentu la perlu si bunuh deba asuh-asuhennta."

⁶ Ibagina perdalanna, ku daerah si man siarenna jenari berkat sekalak-sekalak kempak baginna.

⁷ Sangana Obaja niari baginna, rempet ia jumpa ras Elia. Itandaina Elia, emaka mungkuk ia i lebe-lebena janahna nungkun, "Ma kam nge e bapa?" nina.

⁸ "Payo aku ngenda. To kataken man tuanndu raja, maka aku sangana i jenda," nina Elia.

⁹ Ngaloi Obaja, "Kai kin salahku maka itamakenndu aku ku bas tan raja? Ugapa pe ibunuh Raja Ahap aku.

¹⁰ Ersumpah aku i bas gelar TUHAN, Dibatandu, maka tuhu nggo idarami raja kam i bas kerina negeri i doni enda. Adi lit sekalak raja ngatakenca maka kam la i negeri e, emaka isuruhna ia ersumpah tandana tuhu-tuhu kam la i je.

¹¹ Genduari lawes atendu aku ngata man raja maka kam sangana i jenda?

¹² Uga kari jadina adi aku lawes minter kam ibabaken Kesah TUHAN ku ingan si la kueteh? Janah kenca kukataken man Ahap maka kam i jenda, tapi la kam idapetina i jenda, ugapa pe ibunuhna aku. Ingetlah maka kitik-kitikku nari aku kalak tutus nembah man TUHAN.

¹³ Ma nggo kin ibegindu maka tupung Isebel munuhi nabi-nabi TUHAN, kubuniken seratus kalak i bas dua gua, lima puluh kalak sada inganen, janah aku mereken pangan ras inemen man kalak e?

¹⁴ Dage kuga maka isuruhndu aku ngata man raja maka kam sangana i jenda? Ibunuhna aku kari!"

¹⁵ Nina Elia erjabap, "I bas gelar TUHAN si Mada Kuasa si kusembah, erpadan aku maka kujumpai sendah raja."

¹⁶ Emaka lawes Obaja ngadap Raja Ahap, iturikenna man bana, emaka berkat minter Ahap njumpai Elia.

¹⁷ Kenca idah Ahap si Elia nina man bana, "Kam nge, o si ngguluti Israel?"

¹⁸ "Labo aku si ngguluti e," nina Elia ngaloi. "Tapi kam nge, kam ras bapandu. Sabap ilanggarndu perentah TUHAN janah isembahndu dibata-dibata Baal.

¹⁹ Genduari perentahkenlah man kerina bangsa Israel njumpai aku i Deleng Karmel. Baba pe nabi-nabi Baal si empat ratus lima puluh e ras nabi-nabi Dewi Asera si empat ratus kalak e, si ibere-bere man Isebel."

²⁰ Emaka iperentahken Raja Ahap maka pulung kerina kalak Israel ras nabi-nabi Baal i Deleng Karmel.

²¹ Tedis Elia i lebe-lebe kalak ndai nina, "Asa kai nari dekahna maka banci ipetetapndu ukurndu? Adi TUHAN kin Dibata, sembahlah Ia; tapi adi Baal kin Dibata, sembahlah ia!" Tapi sengkebabah pe la lit kalak ndai ngaloi.

²² Kenca bage nina Elia, "Aku nari ngenca sisada nabi TUHAN si tading, tapi nabi Baal lit 450 kalak.

²³ Genduari buatlah dua jenggi lembu, bereken ipilih nabi-nabi Baal sada, maka igelehna janah ilapahina, jenari itamakenna i babo ranting, tapi ula pegara apina. Aku pe bage ka kubahan nandangi jenggi lembu si sada nari.

²⁴ Kenca bage bere maka nabi-nabi Baal e ertoto man dibatana, janah aku ertoto man TUHAN. Apai kari si ngaloi pertoton e alu pesusur api, Ia kap Dibata." "Cocok!" nina kalak ndai kerina ngaloi.

²⁵ Jenari nina Elia man nabi-nabi Baal. "Erkiteken nterem kal kam, emaka kam lebe muat jenggi lembu ras nikapkenca. Ertotolah kam man dibatandu, tapi ula pegara api i bas ranting e."

²⁶ Ibuat kalak ndai jenggi lembu si iendesken man bana, emaka isikapkenna, jenari ertoto ia man Baal, mulai erpagi-pagi nari seh ciger. Erlebuh kalak ndai! "Aloi kami, o Baal!" nina. Landek-landek ia ngkeleweti batar-batar si nibahanna, tapi sora kai pe la lit terbegi.

²⁷ Kenca wari nggo pantek ciger mulai me iuru-uru Elia kalak e nina, "Tergangen ban sorandu! Ma dibata kin ia? Banci jadi sangana ia lolah, ntah sangana kuduru, ntah sangana ia i bas perdalanen si ndauh! Banci ka pe sangana tunduh, emaka terpaksa ingetindu ia!"

²⁸ Reh gangna ibahan kalak ndai sorana, janah igarisina dagingna alu rawit bagi acara agamana, seh maleren darehna.

²⁹ Kalak ndai terus-terusen erlebuh-lebuh dingen serko-serko seh kira-kira pukul telu karaben. Tapi la lit si ngaloi, la lit sora kai pe terbegi.

³⁰ Kenca bage nina Elia man jelma si nterem, "Mari terdeheren ku jenda." Emaka pulung kalak ndai ngkeleweti Elia. Ipesikapna batar-batar TUHAN si nggo iruntuhken mbarenda.

³¹ Ibuatna sepulu dua batu, sada guna tiap suku si sepulu dua, si igelari rikutken gelar anak-anak Jakup, si kedungenna isambari TUHAN gelarna jadi Israel.

³² Alu batu e Elia majekken batar-batar e mulihken, man ingan persembahen man TUHAN. Ikalina parik sekelewet batar-batar e; parik e banci i isi lau kira-kira sepulu empat liter.

³³ Kenca bage iamparkenna ranting i babo batar-batar e, ilapahina jenggi lembu ndai, jenari icibalkenna i babo ranting. Nina Elia, "Demi empat guci lau, jenari curcuri persembahen ras ranting alu lau e." Ilakoken kalak ndai bage,

³⁴ jenari nina, "Bahan sekali nari bage." Ilakoken kalak ndai bage, emaka nina ka, "Bahan sekali nari kal bage." Ilakoken kalak ndai bage petelu kaliken.

³⁵ Maler lau ndai ku sekelewet batar-batar e, piah dem ibahanna parik ndai.

³⁶ Kenca seh paksana erbahan persembahen si karaben, ideheri Nabi Elia batar-batar e, jenari ertoto ia, "O TUHAN, Dibata Abraham, Isak, ras Jakup; cidahkenlah genduari maka Kam kap Dibata Israel, janah aku kap suruh-SuruhenNdu. Pebetehkenlah maka kerina kubahan e arah PerentahNdu.

³⁷ Aloi aku, TUHAN, aloilah, gelah ieteh bangsa enda maka Kam TUHAN Dibata kap, maka Kam nge si mabai bangsa enda mulihken man BaNdu."

³⁸ Emaka ipesusur TUHAN api; meseng ibahanna persembahen, ras ranting ndai, bage pe kerina batu ras taneh, janah lau si lit i bas parik ndai pe kerah.

³⁹ Asum idah kalak ndai kejadin e, langkem ia minter kerina i babo taneh, janah nina, "TUHAN kap Dibata; TUHAN ngenca Dibata si man sembahen!"

⁴⁰ Iperentahken Elia man kalak ndai nina, "Tangkap kerina nabi-nabi Baal, sekalak pe ula pulah!" Kenca itangkap kerina nabi-nabi e ibaba Elia ku Lau Kison, i je ibunuhna.

⁴¹ Kenca bage nina Elia man Raja Ahap, "To manlah kam genduari. Sabap kubegi sora udan reh erdeso."

⁴² Sanga Ahap lawes man, Elia nangkih ku das Deleng Karmel. I je mungkuk Elia ku taneh, takalna seh ku kelang-kelang tiwenna.

⁴³ Nina Elia man suruh-suruhenna, "To ku das kam tatap kempak lawit." Mulihken suruh-suruhen ndai nina, "Kai pe la lit kuidah." Pitu kali ia isuruh Elia ku das janah natap kempak lawit.

⁴⁴ Asum ia reh pepitu kaliken nina, "Kuidah embun si kitik asa tapak-tapak tan e belinna nangkih i lawit nari." Emaka iperentahken Elia man suruh-suruhenna, "To dahi Raja Ahap, suruh inangkihina geretana gelah mulih ku rumah maka ula tertahan ia iban udan e."

⁴⁵ La ndekahsa nari, langit nggo gelap ibahan embun mbiring, janah angin mulai rembus. Emaka nusur udan meder. Inangkihi Ahap geretana, mulih ia ku Jisreel.

⁴⁶ Gegeh TUHAN reh mengketi Elia, ipekeskesina gendit jubahna, emaka kiam ia arah lebe Ahap terus ku Jisreel.

1 Raja-raja

Video 1 Raja-raja 18

Ikuti Kami:

KONTAK | PARTISIPASI | DONASI