Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai nini si Elias, halak Tisbi, na hun Tisbi, na i tanoh Gilead ai ma hu bani si Ahab, “Songon sintongni manggoluh Jahowa, Naibata ni Israel anjaha ahu jongjong i lobei-Ni, seng anjai roh namur barang udan ibagas piga-piga tahun on, anggo seng palobei ahu mangkatahon.”
2 Dob ai roh ma hata ni Jahowa hu bani,
3 “Laho ma ho hunjon dompak hapoltakan, marponop ma ho i lambung ni Bah Karit, na hampit hapoltakan ni Bah Jordan.
4 Hun bani bah ai ma ho minum, anjaha domma Huhatahon kawak marmuduhon ho ijai.”
5 Dob ai laho ma ia anjaha ibahen ma romban hu bani hata ni Jahowa; laho ma ia anjaha marianan ma ia i lambung ni Bah Karit, na hampit hapoltakan ni Bah Jordan.
6 Jadi manrohan ma bani kawak mamboan ruti pakon gulei sogod-sogod, sonai homa bodari, anjaha hun bani bah ai do ia minum.
7 Dob piga-piga dokah horah ma bah ai, halani seng roh be udan i tanoh ai.
8 Jadi nini Jahowa ma hu bani,
9 “Bingkat ma ho laho hu Sarpat, na i Tanoh Sidon, anjaha ijai ma ho marianan; tonggor ma, domma Huhatahon sada naboru na mabalu ijai marmuduhon ho.”
10 Jadi bingkat ma ia laho hu Sarpat; daskonsi ia hu horbangan ni huta ai, tonggor ma, adong ma sada ijai naboru na mabalu marsoban-soban. Idilohon ma hu bani mangkatahon, “Mahua alop ham ma bangku bah otik ibagas tatabu on, ase minum ahu.”
11 Sanggah na laho ai ia mangalop bah ai, idilohon ma use hu bani mangkatahon, “Mahua boan ham ma homa bangku santopik ruti.”
12 Jadi nini ma, “Songon sintongni manggoluh Jahowa, Naibatamu, seng dong ruti bangku age sada, sobalitak sampohul ibagas hudon on, ambahni ai minak otik ibagas guri-guri on; tonggor ham ma, na marsoban-soban do ahu, ase laho ahu patureihon nitak ai bangku pakon bani anakku, ase mangan hanami, dob ai matei.”
13 Tapi nini si Elias ma hu bani, “Ulang ham rusak, laho ma ham, bahen ham ma songon na hinatahonmu ai; tapi paturei ham lobei bangku sada ruti na etek, anjaha boan ham ma ai bangku, dob ai paturei ham ma bamu pakon bani anakmu.”
14 Ai sonon do hata ni Jahowa, Naibata ni Israel, “Nitak na ibagas hudon ai seng anjai bois, anjaha minak na ibagas guri-guri ai seng anjai hurang, das bani ari parohon ni Jahowa udan hu atas tanoh on.”
15 Dob ai laho ma naboru ai, ibahen ma songon na hinatahon ni si Elias, gabe adong ma sipanganon bani, bani si Elias pakon bani dakdanak ai ganup ari.
16 Ia itak na ibagas hudon ai seng ra bois, anjaha minak na ibagas guri-guri ai seng ra hurang, romban hu bani hata ni Jahowa, na hinatahon-Ni marhitei si Elias.
17 Dob salpu na masa ai, boritan ma anak ni naboru, tondokanni ai; parah tumang do naboritni ai lanjar rotap ma hosahni.
18 Nini naboru ai ma hu bani si Elias, “Aha do na binahenmu bangku, ham halak ni Naibata? Na roh do ham hape hu bangku laho pasingatkon dousangku pakon mamunuh anakku?”
19 Dob ai nini si Elias ma hu bani, “Boan ham ma bangku anakmu in.” Dob ai ibuat si Elias ma anakni ai hun bani abinganni, lanjar iboan ma ia hu babou, hu kamar iananni, anjaha itibalhon ma ia bani podomanni.
20 Dob ai dilo-dilo ma ia hu bani Jahowa, nini ma, “Ham Jahowa, Naibatangku! Dihut do hape naboru, tondokankon marhinamagou ibahen Ham marhitei na mamunuh anakni?”
21 Dob ai ipapodom ma dirini tolu hali i atas ni dakdanak ai lanjar dilo-dilo bani Jahowa, nini ma, “Mahua paulak Ham ma hosah ni dakdanak on hu bani.”
22 Jadi itangihon Jahowa ma sora ni si Elias, gabe mulak ma hosah ni dakdanak ai hu bani, lanjar manggoluh ma ia.
23 Dob ai ibuat si Elias ma dakdanak ai, anjaha iboan ma hun kamar pardatas hu toruh, anjaha ibere ma ia hu bani inangni, lanjar nini si Elias ma, “Tonggor ma, domma manggoluh anakmu on.”
24 Nini naboru ai ma hu bani si Elias, “Sonari pe hubotoh, halak ni Naibata do ham, anjaha sintong do hata ni Jahowa, na luar hun pamanganmu.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA