Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Nia’ sitau na’bi niareng Elia. Assala’na tubattu ri Tisbe, iamintu se’reang kota ri daera Gilead. Ri se’reang allo battui mae ri Karaeng Ahab na nakana, "Lanri Batara, Allata’ala mattallasaka, Ia nasombaya tu Israel siagang Ia kulayania, kupabattuangki’ angkanaya lalang ruampulo yareka tallumpulo taung labattua anne latena saliu’ yareka bosi manna sike’de’, pantaranganna punna kukanangi."

² Le’baki anjo Nakanamo Batara ri Elia,

³ "Bokoi anne tampaka, nampa a’lampako anrai’ ri ba’leanna Binanga Yordan nampa accokkoko anjoreng rampi’na pangka Binanga Kerit.

⁴ Langgappako je’ne’ inung battu ri anjo pangka binangaya, siagang nia’ jangang-jangang kalaa’ laKusuro ampangngerangngangko kanre."

⁵ Naturuki Elia anjo parentaNa Batara, siagang a’lampami mange ri pangka Binanga Kerit nampa ammantang anjoreng.

⁶ Angnginummi battu ri anjo pangka binangaya, siagang angnganre roti siagang dageng naerang jangang-jangang kalaa’ bari’basa’-bari’basa’ siagang karueng-karueng.

⁷ Siapa are sallona le’ba’na, kalotoro’mi anjo pangka binangaya lanri tenana bosi.

⁸ Nampa Nakanamo Batara ri Elia,

⁹ "Kamma-kamma anne musti a’lampako mange ri kota Sarfat, ri ampi’na Sidon, siagang ammantangko anjoreng. Nia’mo sitau janda le’ba’ Kusuro anjoreng untu’ assareko kanre."

¹⁰ Jari a’lampami Elia mange ri Sarfat. Ri wattunna battu mange ri pakke’bu’na anjo kotaya, nia’mo nacini’ sitau janda sitabang appasse’re kayu tunuang. Nakanamo Elia ri anjo jandaya, "Kitulunga’ nakisaresa’ je’ne’ inung."

¹¹ Ri wattu a’jappana anjo jandaya untu’ angngalle je’ne’ inung, akkio’mi Elia angkana, "Bu’, kipangngerangngang tonga’ sike’de’ roti."

¹² Appialimi anjo jandaya angkana, "Lanri Batara, Allata’ala mattallasaka, Ia kisombaya, assumpa’ angkanaya tena rotiku. Ia niaka poro sikangkang mami tarigu lalang mangko’, siagang sike’de’ minynya’ zaitun lalang ri botolo’. Appasse’rea’ anne kayu tunuang untu’ ampallui anjo bahang sike’deka, sollangku akkulle siagang anakku angnganre. Iaminjo kanre kala’busanna ikambe; le’baki anjo attayang mami ikambe untu’ mate."

¹³ Nakanamo Elia ri ia, "Teaki’ bata-batai bu’! Kipare’mi anjo kanre untu’ kanreta siagang anatta. Mingka la’bi riolo appare’ maki’ rolong sibatu roti ca’di battu ri anjo labuka siagang minynyaka, nampa kierang mae anrinni.

¹⁴ Nasaba’ Batara, Allata’ala Nasombaya Israel, angkanai anjo mangkoka tuli lania’na labu’ lalang, siagang anjo botoloka tuli lania’na minynya’ bonena sa’genna Napabattu Batara bosia ri linoa."

¹⁵ A’lampami anjo jandaya nampa nagaukang anjo apa napaua Elia. Jari nia’mi parsadiaanna ke’nanga sipattallu ia gannaka untu’ siapa are allo sallona.

¹⁶ Siagang sangkamma apa le’bakamo Napau Karaeng Allata’ala tete ri Na’bi Elia, anjo mangkoka tuli nia’na labu’ bonena, siagang anjo pole botoloka tuli nia’na minynya’ bonena.

¹⁷ Siapa are wattu ribokoanganna, tu’guru’ garrimmi anjo ana’na jandaya. Pila’ sallo pila’ sanna’mi garrinna sa’genna mate.

¹⁸ Nakanamo anjo jandaya ri Elia, "AtanNa Allata’ala, angngapa nakigaukang anne kammaya mae ri nakke? Apaka battuki’ mae untu’ a’jari saba’ naNau’rangi Allata’ala dosaku, sa’genna musti mate anakku?"

¹⁹ Appialimi Elia angkana, "Erangi anjo anaka mae." Nampa naallemo Elia anjo ana’ bura’nea battu ri amma’na, nampa naerang nai’ ri kamara’ ratea, iamintu kamara’ napannumpangia Elia. Napatinromi Elia anjo anaka rate ri katinroanga,

²⁰ nampa akkio’ lompo appala’ doang angkana, "O Batara, Allata’alaku, angngapa naKipabattu anne balaya mae ri anne jandaya? Nasarema’ tampa’ untu’ annompang, nampa kamma-kamma anne Kibunoi ana’na!"

²¹ Le’baki pintallung napaopang kalenna naung ri anjo anaka, siagang appala’ doang angkana, "O Batara, Allata’alaku, poro Kipattallasaki anne anaka!"

²² Napilangngerimi Batara pappala’na Elia; appakkaramulami a’mai’ siagang attallasa’ poleang anjo anaka.

²³ Nampa naung Elia battu ri anjo kamaraka na naerang anjo anaka mae ri amma’na siagang nakana, "Bu’, anne anatta! Attallasa’ poleammi ammotere’!"

²⁴ Appialimi anjo jandaya nakana, "Kamma-kamma anne kuassemmi angkanaya ikatte atanNaki’ Allata’ala, siagang kana-kananta kammatojengi angkana kana-kana battu ri Batara!"

1 Raja-raja

Video 1 Raja-raja 17

Ikuti Kami:

KONTAK | PARTISIPASI | DONASI