Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ 'Esa moi riaka dodoto, 'uwa niakingaku 'o nyawa kaiodumou gee yongose 'ato 'onaka naga 'o Ngomasa 'Itebi-tebini. Ma niakilega ma diaikasi la niosikanako 'onaka ge'ena 'o Ngomasa 'Itebi-tebini bolo ko'uwa. Sababu 'o nabii ma ngeluku naga yomasibiakorikau 'o duniaka.

² Ma ngekomo ne'enau ngone posikanako 'o Ngomasa 'Itebi-tebini bolo ko'uwa: 'O nyawa gee yongose 'ato ma Yesus Kristus woboa 'o duniano ge'ena ma gou-goungu wodadi 'o nyawa, 'onaka 'o Ngomasa 'Itebi-tebini.

³ Ma 'o nyawa gee koyongakuwa 'ato 'o Yesus woboakau 'o duniano ge'ena ma gou-goungu wodadi 'o nyawa, 'onaka koi'iwa 'o Ngomasa 'Itebi-tebini. 'Onaka ge'ena ka 'o ngomasa gee ka ma Kristus wimusu-musuno. De ge'ena niogi'isenokau 'ato dua yoboa de ne'ena naga yoboanou 'o dunia ma dodaka.

⁴ Ma ngini 'ai ngowa-ngowaka, ngini ge'ena ma Jo'oungu ma Dutuno. Ngini niaki'akunokau niakiginiiki 'o nabii ma ngeluku go'ona sababu 'o Ngomasa 'Itebi-tebini gee naga nginioka 'ifoloi 'ikuata de 'o ngomasa gee naga 'o dunia ma nyawa-nyawaka gee kowimote-motekuwa ma Jo'oungu ma Dutu.

⁵ 'Ona ge'ena 'o duniano. Ge'enau so 'ona yobi-bicara ka 'o dunia ma hali de 'o dunia ma nyawa gee kowimote-motekuwa ma Jo'oungu ma Dutu yaki'isene.

⁶ Ma ngone ne'ena ma Jo'oungu ma Dutu wi ngowa-ngowaka. Nago'ona ma Jo'oungu ma Dutu winako, 'ona yosigisene nanga demo. Nago'ona ko ma Jo'oungu ma Dutunowa, 'ona koyosigisenuwa nanga demo-demo. Ge'enau 'idadi posikanako 'o Ngomasa gee 'isidotoko 'o do-dotoko ma gou-goungu de 'o ngomasa gee 'inasiliba-liba.

⁷ 'Esa moi riaka dodoto, nou ngone pomakadora, sababu 'o dora ge'ena ma Jo'oungu ma Dutuno. 'O nyawa gee manga 'esa moika yakidora-dora, 'ona ge'ena ma Jo'oungu ma Dutu wi ngowa-ngowaka, de 'ona winako ma Jo'oungu ma Dutu.

⁸ Nago'ona manga dora koi'iwa, 'ona kowinakowa ma Jo'oungu ma Dutu, sababu ma Jo'oungu ma Dutu ge'ena la 'o dora.

⁹ Ma Jo'oungu ma Dutu 'awi dora wosidumutu ngoneno ge'ena la wisiguti 'awi Ngowaka 'o duniaku, la ngone pamake 'o 'ahu sababu 'o Ngowaka gu'una.

¹⁰ Ko ngonewa powidorakau ma Jo'oungu ma Dutu, ma 'ena ma Jo'oungu ma Dutu wonadora ngone de wosiguti 'awi Ngowaka, la ma ngekomo 'una to ngone nanga so-sowono ma Jo'oungu ma Dutu kowosi-singinawau. Ne'enau 'o dora.

¹¹ 'Esa moi riaka dodoto tinisiboso-bosono, nako ma Jo'oungu ma Dutu wonasibosono koge'ena ma rupa, ngone mita salingou pomasikabosono.

¹² Komoiwasi ma Jo'oungu ma Dutu wimakekau. Ma nako ngone pomasikabosono, ma Jo'oungu ma Dutu wo'ahu de de ngone de 'awi dora 'itotomo nanga 'ahu ma sigoronaka.

¹³ Sababu ma Jo'oungu ma Dutu wonakulakau 'awi Ngomasa, so ngone panako 'ato ngone po'ahu de ma Jo'oungu ma Dutu, de ma Jo'oungu ma Dutu wo'ahu de de ngone.

¹⁴ Ngomi ma sirete mimakekau ma Jo'oungu ma Dutu wi Ngowaka, de ngomi miosihabari 'ato 'una ma Dea wisuloko ma ngale wodadi nanga Ro-riwo Wonasilaha-laha 'o duniaka ne'ena.

¹⁵ Nago'ona yongaku 'o Yesus ge'ena ma Jo'oungu ma Dutu wi Ngowaka, ma Jo'oungu ma Dutu wo'ahu de de 'ona, de 'ona yo'ahu de ma Jo'oungu ma Dutu.

¹⁶ Ngone panakokau de pongakuokau ma Jo'oungu ma Dutu 'awi dora ngoneno. Ma Jo'oungu ma Dutu ge'ena la 'o dora. Nago'ona yo'ahu 'o dora yakiparetano, 'ona yo'ahu de ma Jo'oungu ma Dutu, de ma Jo'oungu ma Dutu wo'ahu de de 'ona.

¹⁷ 'O dora 'idadi 'isitotomo nanga 'ahu ma sigoronaka, la ngone pomo-moroini gee 'o Nyawa Yahakimi ma Wangeka. Ngone 'asa kapomo-moroini sababu to ngone nanga 'ahu 'o duniaka ne'ena 'isoka de ma Kristus 'awi 'ahu.

¹⁸ 'O nyawa gee yamaokau ma Jo'oungu ma Dutu 'awi dora, 'ona koyakimodo-modonguwa; sababu 'o dora 'itoto-totomo yaisanga 'o sagala modongo. So 'o nyawa gee yakimodongo yodaari gee dua ma 'orasi 'inahakimi, ge'ena 'iwaitokau 'ato 'ona ge'ena koyamaowasi ma Jo'oungu ma Dutu 'awi dora 'itoto-totomo.

¹⁹ Ngone pomasikabosono, sababu ma Jo'oungu ma Dutu 'isira wonasibosono.

²⁰ Nako moi yongose 'ato, "Ngoi towisibosono ma Jo'oungu ma Dutu", ma nako koyakisibosonuwa manga 'esa moika, 'ona ge'ena yoelu-eluku. Sababu 'o nyawa gee koyakidorawa manga 'esa moi gee yakida-damakeka, ge'ena kokia 'idadi widora ma Jo'oungu ma Dutu gee kowimake-makewa.

²¹ Sababu ge'ena nanedau 'o besesongo ma Kristus wonakulano: Nago'ona wisibosono ma Jo'oungu ma Dutu, salingou yosibosono manga 'esa moika mita.

1 Yohanes

Video 1 Yohanes 4

Ikuti Kami:

KONTAK | PARTISIPASI | DONASI