Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dan indagunerij, dara dan indamouwerij gedig dan indoc gororougb yen, gembala einyana lagunya debin yen naugb len lebedbed ara ara dou yen bagaha se cinogo augwanohob. Doba areg len ledidib dou yen gin, kaba, dag mer areibahau dous. Dangga hang, yen yemebin areg lusud lebedbed dou yen se yen meigdoc mes augwougb touwero. Doba yen yainyen len dag areg len lebedbed dou yen gin, kaba, en dau Mena gedig Allah esa se len merdoc mesohob, era en dau mena gus dousei?
2 Dara yen yecinaga dau sug Mena gen dau Allah en eigtou se sud hom medoc mes augwan dag misen touohob. Anai men gansins dag gini: Gembala areg en os badi Yesus Krisdus dag en ouwaden dau bogo, hanoba en edag lusud misen se cinogo gin toua, kaba, yen yecinaga dag sud hom gin, kaba, Mena gen dau Allah eigtou se en medoc mesohob.
3 Doba gembala areg en aideido dougwo Yesus dag en emouwaden dau bogo, hanoba en emedag lusud misen se cinogo gin touwero, kaba, sud hom gin, kaba, Mena gen dau Allah emeigtou se en medoc mes touwero. Doba Sud Hom Eic Geic Mos dougwo Yesus en mena dous eng eigtou se en medoc mes. Dara en mena gin, kaba, agaha se cinogo augwan naugb eigtou se lusud leinyana merdoc mesohob. Augwan gini aimo dau areg emen emesulou yen sug nosa touohob. Anai emen emenara dou yen dag lona hom, kaba, merna dag gini emen aud lusud toues.
4 Dangga areg gembala areibahau len lebedbed gin, kaba, augwan aimo dau areg lusud gedig Bilis oiharaga len se cinogo gini len lauwam an dous. Anai gembala areibahau gin, kaba, len len dau lusud gedig Bilis oiharaga len se cinogo gin touohob. Hang areg len ledidib gin, kaba, lusud se cinogo gini len loc merums naugb toua terimda. Doba dan indihirija, yen, kaba, Allah en moho aiga yen. Hang yen yemaimo areg gembala areibahau len ledidib dou yen gin touwero. Doba yen yaiyan len an gin namcir. Anai Mena areg en eigtou se yen meigdoc mes, kaba, en mobisamougb edreg dau sud hom goiharaga lusud se cinogo ginohob.
5 (4:4)
6 Dangga hang, gareg en ecinaga areg asesa Allah enin medoc mes augwanohob, kaba, en emotogoto areg maman masai dou en touwero. Doba en ei moms naugb augwan gini deigeigouhw namcir. Anai maman, kaba, maman madag Allah mogwihi mogo maman dag misenohob. Doba sud hom areg Allah en moho emaiga enero, kaba, en emei moms naugb areg maman masai dou en gin touwero. Doba en otogoto maman mamir an gin terimda. Dau gini, hang maman mamecinaga sud hom areg Mena Geica dara mena gaugwohosa eigtou se medoc dag misen toua. Anai sud hom areg en os badi Yesus en ouwaden dau bogo dag lusud misen, kaba, Mena Geica eigtou se medoc mesohob. Doba sud hom areg en emos bemadi Yesus dag en emouwaden dau bogo, hanoba en emedag lusud misen touwero, kaba, Sud Hom Eic Geic Mos dougwo Krisdus en mena eigtou se en medoc mes dous.
7 Dan indagunerij, dara dan indamouwerij gedig dan indoc gororougb yen, sug Allah medoc gororougb maman dag ginohob, kaba, eigouhw naugb maman mamarges dau sug maman mamdoc gororougwim touwero. Doba maman maicara maimo dangga esesa anim terimda. Anai aremer medoc gororougwim, kaba, augwan en dau Allah enin dous. Dangga gareg en medoc gororougb lusud, kaba, en edag Allah mogwihi mogo en dag misen. Hanoba en medoc dag hom dara en touohob.
8 Doba gareg en medoc gororougb lusudero, kaba, en emecinaga areg asesa Allah enin medoc mes touebma. Anai Allah, kaba, men geicara augwan dag en medoc gororougb lusud namcir.
9 Hanoba en ens dau en medoc gororougb eb ainyes dou mamanohob. Anai en esa en Meisi mohora hom se cinogo gini, dauntoba maman maic maireseb menau geb huhugb ogdoc en Meisi men geicara naugb maman toua.
10 Dangga aremer medoc gororougb gin, kaba, maman mamens dou Allah touwero. Doba enin eng ens dou maman. Hang en emesa en Meisi se cinogo gini naugb en eic en mogwihi bauwaharo dou Allah naugb maman sesar augwan toua. Dauntoba sesar men gogom emeb naugb maman toua deitero. Doba en aigdougwo maman sesar augwan dau maman ogdoc en Meisi men geicara gin toua namcir.
11 Dangga dan indagunerij, dara dan indamouwerij gedig dan indoc gororougb yen, sug Allah medoc gororougb maman dag ginohob, kaba, eigouhw naugb maman toua mamdoc gororougwim terimda.
12 Anai sud hom ingma, kaba, en emeiya Allah mougwa hom touebma. Doba sug maman mamdoc gororougwim, kaba, gini ansins dag Allah eni moongga se maman mamdoc mes dag misenohob. Hang men medoc gororougb gin, kaba, emousa maman naugb sug maman mamdoc gororougwim dara maman mamdoc augwan toua terimda.
13 Dara maman macinaga dag Allah eni moongga se maman mamdoc mes. Hanoba maman mamdoc dag hom dara en toua. Anai en esa Mena Gogoufu bansins se maman mamdoc mes naugb ginohob.
14 Dara emen, kaba, emen toua emouma debin Krisdus en Mena gini, dag en esa en Meisi se cinogo ginohob naugb en eigdoc lusud se cinogo gin augwan dau sesar men gogom augwan toua. Anai emen emeiya en Meisi gini dara emen emiresohob.
15 Dangga gareg en ouma debin Yesus dag eni Allah Meisi misen, kaba, eni dara Allah lan mardoc edagasem toua namcirohob.
16 Hang maman mameija mamuwesa Allah toua deitero. Doba sug maman maiya dau en medoc gororougb maman dag ginohob, kaba, maman maod mamina debsa en an gin toua terimda. Anai maman macinaga dag se men geicara augwan, kaba, en medoc gororougb lusud dous. Dangga gareg en medoc gororougb lusud, kaba, eni dara Allah lan mardoc edagasem namcir touohob.
17 Dara sug maman mamdoc dag hom dara en dag ginohob, kaba, ousa maman naugb sug maman mamdoc gororougb lusud dara maman mamdoc augwan toua terimda. Hang maman mamahau dau Lona Sug Yesus Ogod Aremer Aga Lusud gin toua deitero. Doba maman maic mamus naugb magasen namcir. Anai sug maman mamdoc gororougb lusud dara maman mamdoc augwan terimda, kaba, maman geicara aninim dag Krisdus men geicara augwan an lusud sug nosa touohob.
18 Dangga gareg en medoc eijesa, hanoba en ahau dau Allah dag en ogod aremer gogom deinaugb en se Lona ingga, kaba, gini ens ainyes dou maman dag en medoc gororougb lusud dara medoc augwan touebma. Anai gareg en medoc gororougb lusud dara medoc augwanohob, kaba, en emahau dau sug Allah eic gogom dou en toua deitero. Doba men geicara gedag beim gin, kaba, erba gahau augwan dau en namcir. Hang gareg en medoc gororougb lusud dara medoc augwanohob, kaba, emedeinyum naugb sug en ahau dau Allah touwero, doba en medoc ebtou toua terimda.
19 Dara maman mamdoc gororougb lusud dau mamanin touwero. Doba Allah medoc gororougb maman sug aimougtut. Hang emousa maman naugb sug maman mamdoc gororougb len gus toua.
20 Dangga gareg en eigdoumesa en moho deseino lusud dag en medoc gororougb Allah enohob, doba en medoc mog mog an en maguner dara en medamouwer terimda, kaba, en medoc gororougb Allah touwero. Doba en ereiyara dous. Anai sug sud hom medoc gororougb en maguner dara en medamouwer ginero, kaba, dagiro, naugwe hang, en medoc gororougb Allah gin toua? Anai en maguner dara en medamouwer gin, kaba, en emeiya len laugwan se en mairesohob. Hang emedeinyum naugb sug en eicara geigouhw toua terimda. Doba Allah, kaba, en emeiya en se en maires mougwa hom touebma.
21 Dangga gareg en medoc gororougb Allah, kaba, esloulougb naugb en medoc gororougb en maguner dara medamouwer gin toua terimda. Anai gini aimo dau areg Krisdus en arougb maman an gin sug nosa touohob.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA