Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ya'ami ira talifusõ ni'omasi'õ! Bõi dozi faduhu dõdõmi ba niha sanguma'õ so Geheha Lowalangi khõnia, mitandraigõ ua ira ba wangi'ila hadia eheha si so khõra andrõ si otarai Lowalangi ba ma tenga. Bõrõ me ato zama'ele'õ sofaya si no muzawili gofu heza.
2 Si mane lala nitõrõ ba wangi'ila hadia eheha da'õ Eheha Lowalangi ba ma tenga: Niha samaduhu'õ wa Yesu Keriso mõi ba gulidanõ si mane niha, ba niha andrõ so khõnia Geheha si otarai khõ Lowalangi.
3 Ba niha si lõ mamaduhu'õ da'e sanandrõsa khõ Yesu, lõ khõnia Eheha Lowalangi. Eheha si so ba niha si manõ no moroi ba zi fa'udu khõ Keriso. Sanandrõsa ba geheha da'õ no te'ombakha'õ khõmi wa so ia dania. Ba no so ia ba gulidanõ iada'e.
4 Ba ya'ami iraonogu, no Ono Lowalangi ami. Ba no mi'alani ndra sama'ele'õ sofaya andrõ, bõrõ me abõlõ Geheha si so khõmi moroi ba geheha si so ba niha si otarai moroi ba gulidanõ si lõ sõkhi andre.
5 Ira sama'ele'õ sofaya andrõ fahuhuo ira sanandrõsa ba ngawalõ gulidanõ andre, ba larongo wehedera ulidanõ andre, bõrõ me ya'ira no si otarai ba gulidanõ.
6 Ba ya'ita no ono Lowalangi; ba niha saboto ba dõdõ Lowalangi, ba lafondrondrongo niw̃a'õda. Ba niha si tenga okhõta Lowalangi, lõ lafondrondrongo niw̃a'õda. Si manõ wolauda ba wangi'ila amaehuta Geheha sondrõnia'õ niha ba wa'aboto ba dõdõ Lowalangi ba eheha samaelungu niha.
7 Ya'ami ira talifusõ ni'omasi'õ! Da ta'omasi'õ nawõda, bõrõ me fa'omasi andrõ no moroi khõ Lowalangi. Niha samalua fa'omasi, no ono Lowalangi ba aboto ba dõdõnia Lowalangi.
8 Ba niha si lõ mamalua fa'omasi, lõ saboto ba dõdõnia Lowalangi; bõrõ me Lowalangi andrõ ba no fa'omasi.
9 Ba no i'oroma'õ wa'omasi-Nia Lowalangi bakha ba dõdõda, ba wamatenge Ono-Nia khõda, si ha sambua andrõ ba gulidanõ ena'õ tasõndra wa'auri ba khõ Nono-Nia andrõ.
10 Da'e wa'omasi andrõ: Tenga ya'ita zi no mangomasi'õ Lowalangi, no Lowalangi zangomasi'õ ya'ita ba si no mamatenge Ono-Nia ba gulidanõ, ena'õ bõrõ Ia tasõndra wangefa'õ horõda.
11 Ya'ami ira talifusõ ni'omasi'õ, na no si manõ wangomasi'õ Lowalangi ya'ita, andrõ gõi lõ tola lõ ta'omasi'õ nawõda.
12 Samõsa lõ niha si no irai mangila Lowalangi, ba na faoma ta'omasi'õ nawõda, ha sambua ita khõ Lowalangi ba tobali mo'ahonoa wa'omasi-Nia ba dõdõda.
13 Ba bõrõ me no Ibe'e khõda Geheha-Nia Lowalangi, andrõ aboto ba dõdõda wa no ha sambua ita khõ Lowalangi, ba ha sambua Lowalangi ba khõda.
14 No ma'ila samõsa Nono Lowalangi ba ma'ombakha'õ ba niha bõ'õ iada'e, wa no Ifatenge Ia Ama ba gulidanõ tobali Razo Sangorifi ulidanõ andre.
15 Haniha zamaduhu'õ wa Yesu andrõ Ono Lowalangi, ha sambua Lowalangi khõ niha da'õ, ba niha da'õ gõi auri ha sambua khõ Lowalangi.
16 Ba no aboto ba dõdõda ba faduhu dõdõda wa'omasi Lowalangi khõda. Lowalangi andrõ ba no fa'omasi. Niha sango'aurifagõ fa'omasi, niha andrõ ha sambua khõ Lowalangi, ba ha sambua Lowalangi khõnia.
17 Ba fa'omasi andrõ tefo'ahonoa bakha ba dõdõda, ena'õ lõ ata'u ita wangondrasi Lowalangi ba Luo Wanguhuku. Ba lõ ata'u ita, bõrõ me fa'aurida ba gulidanõ andre, no si mane fa'auri Keriso.
18 Niha sangomasi'õ Lowalangi, lõ falukha wa'ata'u; bõrõ me fa'omasi si no mo'ahonoa itayaigõ fefu wa'ata'u. Niha si lõ so'ahonoa ba wanandra fa'omasi Lowalangi, oroma da'õ ya'ia na ata'u wamaondragõ Luo Wanguhuku.
19 Ta'omasi'õ Lowalangi bõrõ me no ofõna I'omasi'õ ita.
20 Na so samõsa zanguma'õ, "U'omasi'õ Lowalangi," ba na fatuwu khõnia dalifusõnia, ba no sofaya ia. Bõrõ me niha si lõ mangomasi'õ talifusõnia si tola i'ila hõrõnia, lõ wa tola gõi i'omasi'õ Lowalangi zi lõ irai i'ila hõrõnia.
21 Bõrõ da'õ, da'e goroisa nibe'e Keriso khõda: Dozi niha sangomasi'õ Lowalangi, lõ tola lõ gõi i'omasi'õ dalifusõnia.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA