Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Salingou niamoteke 'isoka kokia naga ngoi tadi-diai, 'isoka ngoi mita tamoteke kokia naga ma Kristus wadi-diai.

² Ngoi tinisiarene sababu ngini kaitaurika nisi-singina, de niodomoteke 'o do-dotoko gee tinisidoto-dotoika.

³ Ma ngoi tomau ngini nianako 'o ngai moioli ge'ena la, 'o nau-nauru ge'ena ma Kristus wakipareta; 'o ngeweka yonga-ngaamokokau ge'ena manga rokata yakipareta, de ma Kristus ge'ena ma Jo'oungu ma Dutu wipareta.

⁴ Ge'enau so nako wimoi wolahidoa bolo wositotara 'o Habari ma Jo'oungu ma Dutuno 'o nyawa yoku-kudai manga bionoka la wi saeke waluunuku, ge'ena ma Kristus wisiti-tingoono.

⁵ De nako mimoi gee molahidoa bolo mositotara 'o Habari ma Jo'oungu ma Dutuno 'o nyawa yoku-kudai manga bionoka de mi saeke ko ma luunukuwa, 'o ngeweka gumuna mosimae-maeke mi rokata gee womiparetano. Ge'ena kaimatero de 'o ngeweka gumuna mipololokau.

⁶ Sababu nako 'o ngeweka mimoi la mooluku mopake 'o saeke ma lu-luunu, ge'ena 'ifoloi yaowa 'ami utu yakuluoka. Ma nako 'o ngeweka moi manga utu yakuluoka bolo yagutioka, ge'ena 'idadi ka 'o se-sela. Ge'enau so yaowa 'o saeke ma lu-luunu yopake.

⁷ 'O nauru koiparaluuwa yopake 'o saeke ma lu-luunu, sababu 'ona ge'ena yosidumutu ma Jo'oungu ma Dutu 'awi jako de 'awi kumati. Ma 'o ngeweka 'ona yosidumutu 'o nauru-nauru manga kumati,

⁸ Sababu ma Jo'oungu ma Dutu wosidadi 'o nauru ge'ena ko 'o ngewekanowa, ma 'ena 'o ngeweka wosidadi 'o naurino.

⁹ De mita 'o nauru wosidadi ge'ena sababu ko 'o ngewekawa manga paraluu ma 'ena 'o ngeweka yakisidadiku ma ngale 'o nauru manga paraluu.

¹⁰ Sababu ge'ena, 'o ngeweka mimoi salingou mopake 'o saeke ma lu-luunu ma ngale ma no-nako 'ato muna ge'ena mi rokata mikuasano, la 'o sagala mala'ekati 'asa 'imorene.

¹¹ Ngaro koge'ena ma ngone pongaku-ngaku nanga 'ahu ma sigoronaka, 'o ngeweka de 'o nauru ge'ena kapomakamoteke.

¹² Sababu ngaro 'o ngeweka ma di-disiraka ge'ena misidadi 'o naurino, ma ge'enaka de 'o ngeweka yosilahiri 'o nauru, de 'o sagala moi-moi ge'ena ma Jo'oungu ma Dutuno.

¹³ Bika 'Esa moi ngini ma sirete niatibangi naneda: 'O ngeweka mimoi molahidoa ma Jo'oungu ma Dutuka 'o nyawa gudai manga bionoka de komomasinoakuwa 'o saeke ma lu-luunu, ge'ena yadaene?

¹⁴ Ngini nianakokau 'ato nako 'o nauru manga utu 'ikurutuku ge'ena 'iso koyadaenuwa.

¹⁵ Ma 'o ngeweka 'ona ma Jo'oungu ma Dutu wakikula manga utu ma ngale manga saeke yosiluunu, de manga utu 'ikuru-kurutuku ge'ena 'imadadi manga kumati.

¹⁶ Ma nako naga yomau yomakaributuosi ma ngale ne'ena, ngoi tosidemo duga ka 'o ngai moi ge'ena la, ngone ne'ena bolo ma Jo'oungu ma Dutu 'awi jamati 'iregu, to ngone nanga 'adati ge'ena ka 'o ngai moioka. Ge'ena la 'o ngeweka yolahidoa ge'ena salingou manga saeke yaluunuku de 'o nauru salingou manga utu 'uwa 'ikurutuku.

¹⁷ Ma ngale nanedali, ngoi kotinisiarenuwa. Nia lo-lomu ge'ena ma duanguku koisure-surewa so 'ena kaito-torou.

¹⁸ Ma di-disiraka to'isene 'ato 'ania lo-lomuoka naga 'o kaributu de 'o kadi-dingaka. De ngoi tamaoku ge'ena ma goungu.

¹⁹ Ma goungu koge'ena 'idadi, la 'iwaiti dua nago'ona ma gou-goungu yongaku ma Jouka.

²⁰ Gee ngini nimalomu, ngini niadiai ko ma Jouwa 'awi Ngodomo 'Itebi-tebini.

²¹ Sababu gee nio'odomo, de ma 'inomo ka moi-moi nimarorebe nimadegese sigado munuka kokiawa yodaene, 'ena munuka yosigeto-geto.

²² Koya'akunuwa koge'ena! To ngini ma de nia woa, so ngini 'idadi nio'odomo de nio'okere ge'enaka! Bolo ngini niomau niakisiti-tingoono ma Jo'oungu ma Dutu 'awi jamati de niakisimae-maeke 'o nyawa yosusa-susa? 'Okia salingou tongose nginika? Salingou tinisiarene? Ko'uwa! Ma gou-goungu ngoi 'asa kotinisiarenuwa.

²³ Sababu gee tosidoto-dotoko nginika, ge'ena tadawongino ma Jouoka, ge'ena la ma obiri ge'ena gee 'o Yesus to ngone nanga Jou wisisarakaniou la wito'oma, 'una 'o roti wa'ese,

²⁴ de gee wosi'amalahaka ma roti ge'ena ma Jo'oungu ma Dutude, de waeta-eta de wi giama, de kawongosekau, "Ne'ena ge'ena to ngoi 'ai roese gee tosisarakani ma ngale nia sowono tatuusu. Niadiai kone'ena, ma ngale nisi-singina ngoi."

²⁵ Koge'enali mita gee 'o roti ya'odomoka de wa'ese 'o 'anggur ma sawokoka de kawongosekau, "'O 'anggur ne'ena ge'ena ma Jo'oungu ma Dutu 'awi jaji ma sungi gee 'isitatapu de 'ai 'aunu. Niadiai kone'ena ma ngale nisi-singina ngoi gee nia'okere 'isinoimi."

²⁶ Sababu gee ngini nia'odomo de nia'okere 'isinoimi ma roti de ma 'anggur ne'ena, ge'ena ngini niosihabari ma Jou wosongene sigado 'una woboali.

²⁷ Sababu ge'ena nago'ona gee ya'odomo de ya'okere 'o roti de 'o 'anggur gee 'isi'ade-'ade ma Jou 'awi roese de 'awi 'aunu, 'ena manga di-diai koyadaenuwa, 'ona yosowono ma Jouka gee wosisubakau 'awi roese de 'awi 'aunu.

²⁸ So 'o nyawa 'isinoimi salingou 'isira yalega ma diaiokasi manga singina ma dodaka, 'asa de 'idadi ya'odomo de ya'okere 'o roti de 'o 'anggur ge'ena.

²⁹ Sababu nako 'o roti ya'odomo de 'o 'anggur ya'okere 'ena koyongakuwa 'ato ge'ena matero ka ma Jou 'awi roese, 'ona 'asa ma Jo'oungu ma Dutu wakihukumu.

³⁰ Ge'enau so naga nginioka manga gudai yopanyake de yolamahani, de mita yosongene.

³¹ Ma nako 'isira palega ma diaiokasi nanga singina ma dodaka, ngone 'asa ma Jo'oungu ma Dutu kowonahukumuwa.

³² Ma nako ngone pamake 'o hukumani ma Jo'oungu ma Dutuno, ge'ena ma ngale wonadotoko la ngone 'uwa 'inasiduhukumu de 'o dunia ne'ena.

³³ Sababu ge'ena 'Esa moi riaka dodoto ka 'o ngo-ngaku moi, nako ngini nimalomuno ma ngale nio'odomo ma Jou 'awi Ngodomo 'Itebi-tebinoka, ngini salingou nimakadamaa moi de moi.

³⁴ Nako munuka yakisawinokau, ge'ena yo'odomokasi manga woaka. Nako ngini niosimoteke kone'ena 'ania lo-lomu ma sigoronaka, ge'ena koniamakewa 'o hukumani ma Jo'oungu ma Dutuno. Gee 'iregu-regu 'asa tosiwaiti nginika, nako dua toboali.

1 Korintus

Video 1 Korintus 11

Ikuti Kami:

KONTAK | PARTISIPASI | DONASI