Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ikuiklah conto taladan dari ambo, bakcando ambo pun ma ikuik-i conto taladan dari Isa Almasih.

² Ambo mamuji angku-angku, dek karano angku-angku tatap mangana ambo, angku-angku layi pulo mangarajokan pangajaran nan ambo ajakan.

³ Tapi ambo niyo angku-angku mangatawui pulo andaknyo, ado ciyek lai parkaro, iyolah, baraso, nan manjadi kapalo disatiyok urang laki-laki, adolah Isa Almasih; nan manjadi kapalo surang bini, adolah lakinyo, nan manjadi kapalo dari Isa Almasih, adolah Allah.

⁴ Jikok surang laki-laki, dikutiko inyo badowa, atau dikutiko inyo manyampaikan barito nan dari Allah, di adok-an urang nan banyak, tapi inyo mamakai sawok kapalo, ba arati inyo tu mahino Isa Almasih.

⁵ Jikok surang padusi, dikutiko inyo badowa, atau dikutiko inyo manyampaikan barito nan dari Allah, di adok-an urang nan banyak, tapi inyo indak batikuluak, ba arati inyo tu mahino lakinyo, nan manjadi kapalo ateh dirinyo. Itu samo jo sa olah-olah kapalonyo lah dicukua.

⁶ Dek karano, jikok padusi indak namuah mamakai tikuluak, mako labiah elok abuaknyo dicukua. Tapi, padusi nan dicukua kapalonyo, atau nan dikuduang abuaknyo, mako itu marupokan suatu kahinoan bagi dirinyo. Dek karano itu, labiah eloklah inyo mamakai tikuluak.

⁷ Laki-laki indak paralu doh mamakai sawok kapalo, dek karano inyo manggambarkan pribadi Allah, sarato jo kabasaran Allah. Tapi, padusi, manggambarkan kabasaran laki-laki,

⁸ dek karano laki-laki dijadikan, indak dari padusi doh, tapi padusilah nan dijadikan dari laki-laki.

⁹ Laki-laki dijadikan, indak untuak kaparaluan padusi doh, tapi padusi dijadikan untuak kaparaluan laki-laki.

¹⁰ Dek karano itu, untuak manyanangkan ati malekaik-malekaik, mako padusi mustilah mamakai tikuluak, sabagai tando baraso inyo di bawah kuwaso lakinyo.

¹¹ Biyapun baitu, dalam iduik kito sabagai urang Kristen, urang padusi indak tagak surang doh, lapeh dari laki-laki, baitu pulo laki-laki, indak tagak surang doh, lapeh dari padusi.

¹² Dek karano, biyapun padusi nan partamu, dijadikan dari laki-laki, tapi sasudah tu laki-laki layie dari padusi; sagalo sasuatu barasa dari Allah.

¹³ Cubolah sudaro-sudaro sandiri nan mampatimbangkan parkaro ko: Apokoh elok jikok urang padusi badowa kapado Allah, di adok-an urang nan banyak, tapi inyo indak batikuluak?

¹⁴ Dari pangalaman urang nan banyak, angku-angku lah di aja, baraso, jikok laki-laki ba abuak panjang, mako itu adolah sasuatu nan kurang patuik.

¹⁵ Tapi bagi padusi, abuak di agiahkan ka inyo untuak panyawok kapalonyo, abuak panjang tu adolah kamagahannyo.

¹⁶ Nah, jikok ado urang nan niyo batangka, tantang parkaro iko, hanyo ciyek nan dapek ambo katokan, iyolah, baraso, biya kito ataupun jamaat-jamaat Allah nan lainnyo, kabanyakkan punyo kabiasoan nan bakcando itu dalam jamaat; lain daripado itu indak ado.

¹⁷ Tantang parkaro nan ka ambo sabuikkan ko, ambo indak mamuji doh ka angku-angku. Patamuan ibadaik angku-angku indak ma asiekan nan elok, tapi nan buruak.

¹⁸ Nan partamu-tamu ambo mandanga, baraso di dalam patamuan-patamuan angku-angku, ado kalompok-kalompok nan balawan. Ambo raso banyak saketeknyo kaba tu batua.

¹⁹ Iyo lah sapatuiknyo timbua silang salisiah di antaro angku-angku, supayo buliah jaleh isuak, siya-siya bana nan urang Kristen nan sajati.

²⁰ Tapi, dikutiko angku-angku bi bakumpua, nan angku-angku adokan tu, indak Pajamuan Tuhan doh tu.

²¹ Dek karano dikutiko ka makan, angku-angku bi bacirabuik ma ambiak makanannyo surang-surang, sampai ado nan indak mandapek, sadangkan nan lainnyo bi mabuak kakanyangan.

²² Baa mangko dek baitu? Indakkoh sudaro punyo rumah? Sudaro bisa makan jo minun di rumah! Ataukoh sudaro sangajo nak mahino jamaat Allah, atau sangajo nak mamariangikkan urang-urang nan bansaik? Apokoh nan musti ambo katokan kabake angku-angku? Musti juwokoh ambo mamuji angku-angku? Indak! Ambo indak ka mamuji angku-angku doh.

²³ Dek karano, apo nan ambo ajakan kabake angku-angku tu, ambo tarimo dari Tuhan sandiri: nan baraso pado malam tu, kutiko Isa Almasih Tuhan kito dikiyanaik-i, Baliau ma ambiak roti,

²⁴ sudah tu Baliau badowa batarimo kasih kapado Allah, sabalun mamakan roti, mako Baliau balah-balahlah roti tu jo tangan Baliau, sudah tu Baliau bakato, "Ikolah tubuah Ambo nan disarahkan untuak angku-angku. Isuak karajokan pulolah nan bakcando iko, untuak mangana-ngana Ambo."

²⁵ Baitu pulo sasudah mamakan roti, Baliau ma ambiak cawan anggur, mako bakatolah Baliau, "Anggur ko adolah wasiyaik Allah nan baru, disahkan jo darah Ambo. Satiyok kali angku-angku maminun anggur nan bakcando iko, pabuweklah nan sarupo iko pulo, untuak mangana-ngana Ambo."

²⁶ Dek karano, satiyok kali angku-angku mamakan roti, sarato jo maminun anggur sarupo iko, angku-angku mambaritokan baliak kamatian Tuhan, sampai Baliau tibo isuak.

²⁷ Dek karano itu, urang nan mamakan roti Tuhan, atau nan maminun anggur Tuhan, jo caro nan indak patuik, mako urang tu badoso taradok ka Tuhan, nan lah mangarobankan tubuah sarato jo darah-Nyo.

²⁸ Jadi, satiyok urang musti mamareso dirinyo labiah dawulu, sudah tu, barulah inyo buliah mamakan roti, sarato jo maminun anggur.

²⁹ Dek karano, jikok urang mamakan roti jo maminun anggur, tapi inyo indak ma aragowi, baraso pajamuan tu ba ubuangan jo tubuah Tuhan, mako urang nan mamakan roti jo maminun anggur tu, ka manarimo ukunan dari Allah untuak dirinyo sorang.

³⁰ Itulah panyababnyo, mangko banyak di antaro angku-angku, nan sakik, nan lamah, malah ado nan mati bagai.

³¹ Tapi, jikok kito lah mamareso diri talabiah dawulu, mako kito indak ka di ukun Allah doh.

³² Tapi, jikok kito di ukun Allah, mako Baliau ka mancambuik kito, supayo kito jan kanai ukunan samo-samo jo dunia ko.

³³ Dek karano itu, oih sudaro-sudaro ambo, jikok angku-angku bakumpua untuak makan di pajamuan Tuhan, andaknyo angku-angku musti samo-samo manunggu.

³⁴ Jikok ado nan talampau litak paruiknyo, eloklah inyo makan dulu di rumahnyo. Jikok angku-angku layi mamparatikan nan ambo ajakan ko, mako patamuan-patamuan ibadaik angku-angku tu, indak ka mandatangkan ukunan dari Allah doh, ka diri angku-angku. Tantang parkaro-parkaro nan lain, isuak jikok ambo lah datang, ka ambo tarangkan kabake angku-angku.

1 Korintus

Video 1 Korintus 11

Ikuti Kami:

KONTAK | PARTISIPASI | DONASI