Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Jadi pasialamo pokaingguku nasimbayu mpo yaku mboto nompasiala pokainggu i Kristus.
2 Sampesuvu-sampesuvu, yaku nantoiya komiu sabana komiu batena nantora yaku riara mpengaya-ngaya, bo komiu naroo nangoseaka pepatuduki nipatudukiku ka komiu.
3 Tapi hitu paraluu rasanimiu: langgai pakeni nu bereina mombine, i Kristus pakeni nu langgai, bo Alatala pakeni i Kristus.
4 Jadi ane riara kasiromumiu naria langgai nosambaya atau nompasimbayu tesa nitarimana lako nte Alatala bo nibonggona balenggana, ia ledo nombabila i Kristus, pakenina.
5 Bo ane riara kasiromumiu naria mombine nosambaya atau nompasimbayu tesa nitarimana lako nte Alatala bo ledo nibonggona balenggana, ledo nabelo. Apa nangoseaka kabiasata, mombine ledo nombabonggo balenggana ledo nombabila bereina langgai pakenina. Ledo ria posisalana mombine haitu ante mombine nigau buluana tandana ledo ria eya nu matana.
6 Ane mombine ledo madota mombabonggo balenggana, aginamo ragunji sanggani buluana. Tapi ane maeya matana buluana ragunji atau ragau ivesia, agina rabonggona balenggana.
7 Ledo masipato langgai mombabonggo balenggana tempo nosambaya atau nompasimbayu tesa nu Alatala, sabana ia nipajadi mpo polenje nu Alatala mboto ala kaoge nu Alatala rakita. Tapi mombine nipajadi ala kaoge nu langgai rakita.
8 Apa ri pamulana langgai ledo nipajadi lako ri mombine, tapi mombine nipajadi lako ri langgai.
9 Bo ivesia muni mombine nipajadi nu Alatala ala maria roa nu langgai, ledo langgai nipajadi ala maria roa nu mombine.
10 Haitu sampe mombine masipato mombabonggo balenggana tandana ia nekou nte bereina langgai, bo muni sabana pokaingguna haitu rakita nu *malaeka-malaeka nTupu.
11 Tapi toramo! Riara nggatuvuta topomparasaya i Pue Yesus, langgai bo mombine nosiparaluu.
12 Naupa ri pamulana mombine nipajadi lako ri karo langgai, hitupa pura-pura langgai nipoanaka nu mombine. Bo pura-pura langgai bo mombine nopuna lako nte Alatala.
13 Pekirimiu mbotomo. Masipato mombine mosambaya ka Alatala riara kasiromumiu ante balengga ledo nibonggo? Natantu ledo.
14 Nangoseaka kabiasa naria nte kita mboto, nisanita ane langgai nandoe buluana, haitu nepakaeya.
15 Tapi ane mombine nandoe buluana, haitu nompakagaya ia. Apa mombine nipopobulua rapotutui balenggana.
16 Ane maria tona madota mosinjanaika pepatuduki hitu, aga sangaya kuuli ka ira: Ledo ria kabiasa ntanina nioseaka kami bo pura-pura todea topomparasaya Alatala, haitumo mombine kana mombabonggo balenggana riara kasiromumiu.
17 Kapolana, naria bara sako-ngaya kuuli ka komiu. Tapi ledo mpuu kutoiya pokainggumiu. Sabana, ane komiu nasiromu nosanggani-nggani mombasomba Alatala, kasiromumiu haitu ledo nanggeni belo ka komiu, tapi aga nanggeni daa.
18 Paratama, niepeku ane komiu nasiromu, komiu natebagi-bagi bo nosinjanai. Bo tantu nakana sanu kareba haitu.
19 Komiu kana matebagi-bagi mami ala rasani isema komiu mpuu-mpuu nangoseaka i Yesus!
20 Tempo komiu nasiromu mosanggani-nggani, pokainggumiu ledo masipato ka tona masiromu mangande *roti bo manginu uve anggur mantora kamate i Pue Yesus.
21 Apa ane komiu nangande, komiu aga nompago mangala kandeamiu bo panginumiu mboto bo ledo nompopea roa sampe naria tona ledo nanggava kandea nuapa-nuapa, bo naria ntanina aga nanginu sampe nalangu.
22 Nakuya ivesia? Ledo ria banuamiu mboto rapangandemiu bo rapanginumiu? Nakuya komiu nompandaente kasiromu ntodea topomparasaya Alatala? Nakuya komiu nompakaeya tona ledo nompakule manggeni kandea ri kasiromu haitu? Nuapa masipato kuuli ka komiu? Masipato kutoiya pokainggumiu haitu? Natantu ledo! Ledo ntoto masipato kutoiya pokainggumiu tutu!
23 Nipatudukikumo ka komiu bara ipia batuana nangande bo nanginu nosanggani-nggani mantora kamate i Yesus. Pepatuduki haitu nitarimaku lako nte i Pue Yesus mboto. Bongi i Pue Yesus nipobalu ka baliNa, nialaNa roti,
24 bo niuliNa tarima kasi ka Alatala. Naupu haitu nitubi-tubiNa roti haitu bo niuliNa, "Roti hitu karoKu Kudekei mombatolosi komiu. Kandemo roti hitu mantora Yaku."
25 Bo ivesia muni naupu ira nangande, nialaNa saboda uve anggur bo niuliNa, "Panginu hitu tandana Pojanji nu Alatala nabaru rapakaasa ante raaKu. Nggani-nggani komiu manginu panginu ada hitu, inumo rapombatora Yaku."
26 Apa nggani-nggani komiu mangande roti bo manginu uve anggur hitu, komiu mompatolele kareba kamate i Pue Yesus sampe Ia makava mpanjili ri dunia hitu.
27 Jadi, isema-sema nangande roti atau nanginu uve anggur i Pue Yesus ante pekiri ledo masipato, ia novia dosa nte i Pue Yesus sabana nipandaentena karoNa bo raaNa.
28 Jadi pura-pura tona kana raparesana ntani ruru rara ntaina mboto. Bo maupu haitu pade mamala ia mangande roti bo manginu uve anggur haitu.
29 Apa tona anu mangande roti bo manginu uve anggur haitu bo ledo nipekirina posidaina ada haitu ante karo i Kristus, natantumo rahuku nu Alatala, sabana ia aga nompongeika kamate i Pue Yesus.
30 Haitu sampe nadeamo komiu ri situ nalente bo nadua, bo bara sako-nduamo komiu namate.
31 Tapi ane raparesata rara ntaita ntani ruru dopame mangande roti bo manginu uve anggur haitu, kita ledo rapambela pehuku.
32 Tapi ane rapana kita rapambela pehuku nu Alatala sii-sii, patujuNa kita rapatuduki ala nee sampe kita rapakaropu mosanggani-nggani ante tona ri dunia anu ledo natundu nte Alatala.
33 Jadi sampesuvu-sampesuvuku, ane komiu masiromu mangande roti bo manginu uve anggur mantora kamate i Pue Yesus, komiu kana mosipopea pura bo mangande mosanggani-nggani.
34 Ane maria tona naara taina, agina ia mangande ntani ruru ri banuana mboto. Nee sampe masiromu mosanggani-nggani bo aga rapambela pehuku nu Alatala. Bo ane yaku tou nte komiu ngena, damo kupakasiayu parakara-parakara ntanina.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA