Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ammantannamo Daud ri balla’ kakaraenganna, ri se’reang allo nakio’mi Na’bi Natan nampa nakana ri ia, "Ciniki anne, ammantamma’ ri balla’ kakaraengang nipareka battu ri kayu camara battua ri Libanon, mingka Patti ParjanjianNa Batara poro lalanji bawang ri kemaya ammantang!"
2 Appialimi Natan angkana, "Kigaukammi apa niaka ri nyawata karaeng, nasaba’ Natulungki’ antu Allata’ala."
3 Mingka anjo bangngia Nakanamo Allata’ala mae ri Natan,
4 "A’lampako siagang pabattui anne pasangKu mae ri atangKu Daud, angkana, ‘Teai ikau lambangungi ballakKu.
5 Appakkaramula Kupasulu’na bansa Israel battu ri Mesir sa’genna kamma-kamma anne, tena le’bakapA’ ammantang lalang ri se’reang balla’. Tuli lalangKu ri kemaya ammantang.
6 Lalang a’lampaKu ri kere-keremae siagang bansa Israel, tena le’bakapA’ akkuta’nang mae ri pamimping-pamimping le’baka Kupile, apa saba’na natena napabangungangA’ ke’nanga se’re balla’ ia nipareka battu ri kayu camara battua ri Libanon.’
7 Lanri kammana, ikau Natan, pabattui mae ri atangKu Daud angkanaya iNakke, Batara Kaminang Makoasaya, angkana ri ia, ‘Le’ba’ mako Kualle battu ri jama-jamannu akkalawaki gimbala’ ri paranga, nampa Kupa’jariko karaeng mae ri ummakKu Israel.
8 Le’ba’ mako Kutulung manna kemae lampanu, siagang sikontu musunnu Kutumpasa’ ngasemmi ri wattunnu a’bundu’. LaKupa’jari masahoroki arennu sangkamma pamimping-pamimping kaminang lompoa ri lino.
9 Untu’ ummakKu Israel Kupasadiammi tampa’ untu’ a’jari butta passolongang cera’na ke’nanga, sollanna akkulle sannang tallasa’na ke’nanga siagang tena angganggui pole. Appakkaramula battuna ke’nanga anrinni ri buttaya riolo, siagang ri wattu tenanapa karaenna ke’nanga, nibunduki ke’nanga ri sikamma tau nangaia katerassanga. Mingka anne kammaya taKupa’biangami kajariang poleang. A’janjiA’ angkana laKubeta ngasengi sikontu musunnu, siagang laKusareko katurungang.
10 (17:9)
11 Sallang, punna narapi’ a’jala’nu nanitarawangko ri pa’jerakkanna boe-boenu, sitau ana’ bura’nenu laKuangka’ a’jari karaeng. Iami lampabangungangA’ balla’. LaKupakajarreki kakaraenganna, siagang nia’ turunganna lammarenta a’jari karaeng sa’genna satunggu-tungguna.
12 (17:11)
13 INakkemi la’jari Manggena, siagang iami la’jari ana’ bura’neKu. Tuli laKugaukangi bajika mae ri ia situru’ janjingKu. Tuli laKuta’gala’ jarreki janjingKu, tena nasangkamma mae ri Saul le’baka Kupalesso’ battu ri empoanna, sollannu akkulle a’jari karaeng.
14 Anjo ana’ bura’nenu Kupilea laKupa’jari karaengi mae ri ummakKu siagang lasa’genna satunggu-tungguna kakaraenganna; na ana’ cucunna lammarenta a’jari karaeng.’"
15 Napabattumi Natan mae ri Daud sikontu anjo le’baka Napau Allata’ala mae ri ia.
16 Antama’mi Karaeng Daud ri KemaNa Batara. Nampa ammempo nappala’ doang angkana, "O, Karaeng Allata’ala, inakke siagang kaluargaku tena kusiratang antarimai sikamma kabajikang Kipappicinikanga anne siapa sallona.
17 Ba’lalo nala’biangampa pole anjo apa Kigaukanga; le’ba’maKi’ a’janji ri passala’na turungangku sallang labattua. Ba’lalo Kipa’jarima’ se’re tau malompo.
18 Apapi pole akkulle kukana mae ri Katte, o Karaeng Allata’ala? Kiassengi sikontu katallassanna anne atanTa, mingka Kisarea’ kala’birang.
19 Lanri ero’ KalenTa siagang untu’ kaparalluangku naKigaukang anne sikamma gau’ malompo a’nyata-nyataya.
20 IKatteji bawang Allata’ala, tena sikali sangkammanTa. Naassengi ikambe anjo passalaka, lanri battu rioloji naKipaumo.
21 Ri sikontu linoa tena bansa sangkamma Israel. Tena ruanna bansa Israel Kilappassang battu ri nipare’ ataya untu’ a’jari umma’ KalenTa. Sikontu anjo gau’ malompoa siagang appakalanasaka mae ri ke’nanga sa’genna a’jari masahoro’mo arenTa malla’bang lino. Kilappassangi ummatTa battu ri Mesir, siagang Kipakabellai bansa-bansa maraenga ri wattunna maju ummatTa a’bundu’.
22 Kipa’jarimi bansa Israel ummatTa sa’genna satunggu-tungguna. Na iKatte, o Batara, a’jari Allata’alana ke’nanga.
23 Kamma-kamma anne o Karaeng Allata’ala, Kipakajarre’ lalomi janji le’baka Kipau ri kalengku siagang turungangku. Poro Kigaukang laloi anjo apa le’baka Kipa’janjiang.
24 Ri kere-keremae tuli napakala’biriki taua arenTa siagang angkana, ‘Batara Kaminang Koasaya Iami Allata’ala ri Israel.’ Sa’genna satunggu-tungguna sitau battu ri turungangku lammarenta salaku karaeng.
25 Kupa’baraniangi kalengku ampanaiki anne pappala’ doangangku ri Katte, O, Allata’ala, nasaba’ iKatte KalenTa le’ba’ ampauanga’ angkanaya ana’-cucungku turung-manurung laKipa’jari karaeng mae ri anne bansaya.
26 IKattemi Batara, Allata’ala, na anjo kabajikang kammaya le’ba’mi Kipa’janjiang mae ri nakke.
27 Lanri kammana minjo nakuappala’ tulummo ri Katte, poro Kibarakkaki turungangku sollanna tuli nakasia’ pangngamaseanTa satunggu-tungguna. Nasaba’ le’ba’mi Kibarakkaki umatTa, O, Batara, jari tuli lanibarakkakimi ke’nanga sa’genna satunggu-tungguna."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA