¹ Suratna an tingare Alap mo hlil irin wenya ebe mae hap. Em Bian Alap mo kwasang gwibiridan wenya, hen Kristus Yesus man emsa kara ta gwibiꞌira. Kristus hon de babu gwen zini, Yakobus Bak mo osona Yudas onakon:
² Dawem! Diki Alap Zen sa kae-kaena hen kwasang-kwasang zemka mamkam ebe mae hap gol gwizimdi. Hen nen zeno taha terenak esa lowehe gwer.
³ Ano dang tininak de aya-wal oso-wal, ee sap dawemkame akasik gweꞌak– sangankam de ebe mae hap ale gulzimdin hip. Hwena dekon zebe sak: Emsa de yasik tabin hip de zini mes ebon mae onak biti gwezak. Ëe ama sap menkam kalang gwek– hendep de lowehe gwen hap denaka de ebe mae hap ale gulzimdin hip, men desa Kristus nebe mae hap syal gwibir-zimkike. Hwena angkam nabakame suratkam emsa titi tabiꞌin– dekam de nere mae mo Kristussu de taibliblan hap dena insa golluwe gwen hap. Sap Alap sren-srenkam hom engaya gwen hap de ola gol gwizimnira, hwena Zen mes aha-en zere mo hlil irin zini nebe mae hap golzimki– nen dikim karek-karek nakon wet so gwen hap denaye.
⁴ Hwena emsa de yasik tabin hip de zini in mes aningkim ebon mae onak biti gwezak. Zere mae mo karek-karek nakon, zep dam gwesik gweꞌan: Zen Alapsa de tame tan sremna. Zen man anakan titi da gwibirin, “Alap Zen kwasang-kwasang enna, zep Zen molya nesa kahalo en hap karek tabirki.” Zen ek enkam man egu gwenan, “Ëe an Kristen zi,” hwena zeno mae mo tawa tabinni in, dekon zep nwe-mase gweꞌan– san de nere mae mo Teipsin Zini Bian Yesussu de anakan gublunna kiye, “Zen aban apdenak.” Zep Alap orep mes kire zini zere mo ol ale gunnuk karek tabin hip gu-gubiridaka.
⁵ Em sap ansa orep mese etawa gwek, hwena ee ama etan emsa enlala sobiridaꞌan: Bian orep mes Israel mo auyan-azana Mesir kon gwiswe soneka. Hwena men zen Zenaka daiblibla srem gwek, desa hwena man timbwas tabirki.
⁶ Alap zere mo dam taha nakore zini hen kirekam gweibiridaka: Men zen zere mae mo syala kon de wet so gwen hap esoson gwek, zep hendep zere mo lowehe gwenna hli nuk, Alap zep desa okama otdenak de bwi kawesinnik kang gul neka. Zen zewe besi dokotkam de tahalebin nik lowehe gwenan. Alap mo klis gun hup de yakla yalak kim de hataꞌak, Zen dekam sa desa serkam karek tabir zira.
⁷ Ë yala Sodom hen Gomorak de zini, hen zeno golek de e-e san de zini, zen hen zeno mae mo kim ekarek gwek. Zen man ekahalo soson gwek hen totore-totore swisa nulin halasen gwek. Zep Alap in kim syaukkum timbwas gulku, Zen dekam tingare zi hip de erak hap kang gulku– dekam de anakan tame gun hup, “An kirekam sa hen karek gol gwen zini tinsik gwen srem syauknuk hendep denaban lowehe gwer.”
⁸ Emsa de yasik tabin hip de zini in, zen hen kirekam zere mae mo eisirkim de hlaun sun ang ta gwenan. Zen dekam zep zere mae mo timni ekahalo gwe-gwenkam kun da gwibirin. Zen hen teipsin tangan Zini Alapsa man enlala ne gweblanan, “Zen soson tangan naka hom.” Hen ngatan zi mo langnak de teipsin-teipsin wenya man lamang da gwibirin.
⁹ Alap mo dam taha nakore zini Mikayel, zen sap wal bose wal zem onakon hen teipsinni, hwena sap kirekam zen hwena hom dowal mo kigisa lamang taka. Zen kim dowal mo kigi naban Musa mo tokna naman-man eblaka, mae hap, “Diki ee asa zerhal,” dekam Mikayel Bak kim jalse gweblaka, zen hom zenaka boltere taka. Hwena zen man sapꞌnen gubluka, “Zen diki Bian Zen sa emsa karek tala.”
¹⁰ Hwena yasik ta gwibin zini in, zena mensa tame nul srem gwe-gwenan, desa man lamang nul gwenan. Zeno mae mo enlalana totore-totore hole-hle en– gwe mo kim. Zep desan de ang tankam, zep sa hendep etimbwas gwer.
¹¹ Kwasang tol, kire zini zen engalap gwe-gwen, sap zen zen sa Alap mo serkam de jala hla nul. Zen Kaen Bak mo gwen karek san ang ta gwenan. Men kirekam hen Bileyam Bak te-ala en hap Israel mo auyan-azana kahalo san dep yasik tabirkike, zen hen zeno kim de lowehen hap mes esam gwesik. Yasik tabin hip de zini in hen Kora Bak han apdenak, sap zen Alap mo gubiridan nakon de wet so gwen hap goleilman gweka. Desa hen sa Alap timbwas tabiri– men kirekam hen Kora Baksa timbwas takake.
¹² Kristen zini em kime apdekam tembane ta gwenan, dekam hwena yasik tabin hip de zini in man tangan eban mae de esiri gwenkam esam gwesik gwenan. Hwena dekam eno mae mo tagal gwenna in molya sam gwesik gwek, sap zen in enlala kwae naban. Zen saher sremkam tembane ngalap-ngalap naban biti gwe-gwenan. Zen zena en naka de taizi gwibin hip edwam gwe-gweꞌan. Zen in boton hap de o kawenna kiye. Nglinak de hla tankam, sap de o hap eheꞌho gwen. Hwena asesena kim de taiꞌinka, dekam sa sren san dep ata tala, zep hendep bejen il tin. Zen san de ten tamlenak de te gwen srem tenya kiye. Tamle gwennak sap de eini kip duwebin, hwena eini hom. Zen men kiye– san de te de sa naban hendep zir gwenna. Zen toton bejen danna ten.
¹³ Yasik tabin hip de zini in, zen hen men kiye– hi de serkam ngep-ngep gwenna. Dekam desyana man alpnak yaing ta gwenanzal. Zini in hen kirekam: Totore kirekam-kirekamsa de gulin hala serankam saherak zenaka kang nul gwenan. Zen hen, keisni men zen Alap mo irik gin nikon eilman gwekke, zeno mae mo kim lowehe gwenan. Keisni in zep nglinak totoresa ora srem san ete nasen gwenan. Hwena Alap mes zebe mae hap bwina serkam de kawesin tangan naka hamal gulzimki– zao de lamkam kang gulnen hap denaye.
¹⁴ Orep de bongna Hanok Bak, Adam onakon de auyansa aitbinni, zen tujuna zen. Zen man ngein sin dep denaka hamal hap gu-gubiridaka– nesa de yasik ta gwibin zisi de Alap karek tabin hip denaka. Zep anakan hamal hap gu-gubiridaka, “Bira, Bian man zere mo dam taha nakore zi niban goleyaing gwen hap golek de gweꞌan zala. Zen beya en tangankam goleyaing gweꞌan zala– ribu-ribukam,
¹⁵ dekam de tingare zisi klis gun hup. Alap Zenaka de tame tan srem wenya, desa sa karek tabiri. Sap zen kirekam-kirekamsa Alap mo dwam gwibin srem san nol gwenan, hen man donsuk gweblanan.”
¹⁶ Kirekam de yasik ta gwibin zini in, zen man etonsuk tine gwenan, hen aha zi en mo kareksa donbirisen gwenan. Hwena zena ki zere mae mo hole-hle san ang ta gwenan. Zen hen zere en mo bosesa boltere nul gwenan, hen aha zisi botonkam anakan ben-jana da gwibirin, “Em in airis”– dekam de beyakam zebon mae osan de ang tan hap esyal-syal gwen hap.
¹⁷ Hwena ano dang tininak de wenya, hamal hap de ola mensa Yesus mo dam tasibin zini ebe mae hap ayang nul gwizimk, desa bahem tangan eititi gwibin.
¹⁸ Zen ol tan-tanna an desa ebe mae hap nol gwizimk: “Aumwa hap denak, dekam zini sa Kristen zisi swre da gwibir. Zen zere mae mo auhu-kama hole-hle en san sa ang ta gwer– Alap mo dwam gwibin srem san.”
¹⁹ Zen in zep hendep kire zi mo syala kon ema ehliwe gwenan. Zeno mae mo enlalana auhu-kamana awe en dep dena. Sap zebon mae onak Alap mo Enhona hom.
²⁰ Hwena ano dang tininak de wenya, ebe mae hap men kire enkam Alap taiblibin hip de ola golzimki, em zao en etal gwesik, hen zao en etatete gwek. Hen Alapsa em gu sonebla tine gwen— zere mo Enho nakore sosonkam.
²¹ Alap mo kwasang-kwasang ennak lowehe gwek. Dekon bahem wet so gwe-gwen. Anakare enlala naban em Bian Yesussu es gweblan, “Zen aumwa hap denak sa nesa kwasang gwibiridala, hen hendep de lowehen hap dena dekam sa nebe mae hap golzimdi.”
²² Men zen Kristussu de taibliblannak etatete gwe srem gweꞌan, desa emki enlala kwasang-kwasang naban etatete gwen hap titi ta gwibin.
²³ Men zen syauk sun dep de ora san ang taꞌan, emki ora dawem san dep alal gul gwen. Hen emki kwasangsa tingare zi hip goltrei gwizimdin, hwena deban hen emki anakan eairi gwen, “Zeno mae mo kwaena bap zen abon mae onak hlimirin.” Sap zeno mae mo auhu-kama en hap de hole-hlena in, zen san de kwaena kiye.
²⁴ Nesa de ngaya tabin hip de Zini Alap, Zen sosonna, hen Zen man zere mo taha terenak nesa kara ta gwibirida. Zen molya syauk sun de ora san dep nesa kara ta sonebirki. Hendep aumwa hap denak Zen sa nesa zere mo ngatannak dep kwang guluda hala. Nen dekam enho kles gwesin sremkam esa isrip-sri tangan naban zewe lowehe gwer. Zep neno mae mo Teipsin Zini Kristus Yesus onakon dikire Alapsa boltere da gwek hen zeno bosena teip nulsublunda gwek. Sap tingare dawemna hen sosonna zen Zebon en lwaꞌan– sap nonol lonesen nakon, angkam, hen hendep denaban. In eiwa tangan.
²⁵ (1:24)