¹ Yesus kim kirekam gubiridaka, Zena ki zep ngli san kara gwe seka, ki zep Biansa gu soneblaka, “Bian, angkam yaklana mewe mes zaunun. Angkam dekam ere mo Tanena ano bosena tingare zi mo nwenak ap teip gulsublu– Ëe akakim hen ere mo bosesa zeno mae mo ngirinnik teip gulsuk gwek.
² Sap Em mese tingare zi aususa de bi gwibiridan hap dena abe hap golblaka. Hen zen de engaya gwen hap dena mensa Ena abe hap lup gulbluka, Ëe asa zebe mae en hap hendep de lowehen hap denaka gol gwizim.”
³ Ëe, Yohanis, in zebe hen Alapsa anakan gu soneblaꞌan, “Bian, an diki zen– hendep de lowehe gwen hap denaye: Eiwa de Zini Alap Emsa de tame tanna, hen ere mo zer sonen Zini Kristus Yesussu de tame tanna. Zen ee dekone engaya gweꞌan.” Yesus dekon anakan ayang gulku,
⁴ “Bian, Ëe mese eno bosena okamanak de zi mo nwenak teip gulsublunda gwek, sap Ëe zeno mae mo nwenak mese syala sul sonek– mensa Ena abe hap wei yul soneblakaye.
⁵ Zep Bian, angkam Emki etan abe hap golblan– Ëe dikim eno alp nakon teipsinkim nikirin hip, nonol men kirekame okamana ansa de yang gulsun sremnak teipsinkim inikin gwekake.
⁶ “Em mese okamana an kon abe hap zini hlilblinki, hwena zen bina ere tangan mo dena. Bian, Ëe mese ebe hap dena zebe mae hap goltrei gwizimk, hen zen angkam mes ere mo ol san ang tal.
⁷ Zen mes angkam anakan tame nul: Ano syala hen ola, zen kitak Ebon onakorena– mensa Ena abe hap golblakake.
⁸ Sap ola mensa Ena abe hap golblaka, Ëe mese desa ayang gulzimk, hen zen mes desa dokwak nuk, hen mes tame nuk. Zen mes Asa anakan daibliblak, ‘Zen eiwa Alap onakon hata zaka, hen Zen zer soneka.’
⁹ “Ëe tingare okamanak de zi hip home Emsa abe taꞌan. Hwena men desa en Ena abe hap lup gulblukake, zebe mae en habe Emsa abe taꞌan, sap zen zen– ere mo denaye.
¹⁰ Ano bi gwibiridan wenya, zen hen kitak ere mo dena. Hen ere mo bi gwibiridan wenya, desa hen kitak apdekame bi eibiridaꞌara. Zen zep sa hen ano sosonna aha zi hip noltrei gwizim, hendep zen hen sa ano bosena teip nulsublunda gwer.
¹¹ Angkam Ëe ama Ebon osan dep lwa haꞌanzal. Ëe home etan okamanak awe deban mae golelowe heꞌan, hwena neno nik mo bi eibiridan wenya nama sa zao lowehe gwer. Zep Lalak Zini, Bian, neno nik mo hlil irin zini insa emki tatetekam de Ebon en ezauk gwen hap denaka gol gwizimdin. Zen dekam sa eaha-en gwe-gwer– Nena men kirekame hen aha-en ekake.
¹² Ëe kime nama golelowehe gwek, Ëe ama Ebon dikim tatem ezauk gwen hap dena kim tatete ta gwibik. Hen Ëe ama dawemkam golezauk sone gwek, zep aha-en mae home syauk sun dep de ora san de gwe hannak kara ta sonek. Hwena aha-en tangan syal heka. Hwena zen insa kirekam gweka, zen ere mo olsa dikim sul sonen hap ki lwak.
¹³ “Bian, Ëe angkam ama Ebon osan dep lwa haꞌanzal, an zebe nama de okamanak gwen nakon zeno mae mo inik emsa gu soneblaꞌan– ano isrip-srisa dekakim zere mae mo enhonak sowe henkam neis gwibik.
¹⁴ Ola mensa Ena abe hap golblaka mese ayang gulzimk. Hwena auhu-kama enlala zini man Abon de ang ta gwen wenya ansa husus neibirida gwenan, sap zen okamana awe dep denaka hom. Zen ngatan zi mo lang san dep dena. Ënaka hen kirekam husus ne gweblanan, sap Ëe hen awe dep denaka hom.
¹⁵ Bian, Ëe Abon de ang ta gwen zini ansa, okamana an kon de lup gul inehan hap home Emsa abe taꞌan. Hwena diki mae habe Emsa abe taꞌan: Dowal mo kigi onakon Emki langa tasik gwibin.
¹⁶ Men kirekam Aena okamana awe dep denaka hom, zen hen kirekam. Zen zep auhu-kama enlala zi niban enlala siri tankam lowehe srem gwe-gwenan.
¹⁷ Bian, eno ola zen eiwa de enna. Ere mo eiwa de ola inkam emki Abon de ang ta gwen wenya ansa lalak tasibin– lalak nik dekakim ere en hon lowehe gwek.
¹⁸ Men kirekame Asa okamana an san dep zer soneka, Ëe hen kirekame desa tingare lang san dep lup gul soneꞌan.
¹⁹ Zen in zebe ere mo timni ebe hap sosok gulbluꞌan– desa dikim mas gwibiridan hap, zen dekakim tangan ere en hon etal gwesik.
²⁰ “Angkam an zen lowe heꞌan, zebe mae en hap home Emsa abe taꞌan. Hwena men zen de zeno mae mo ola kon Asa daibliblaꞌak, zebe mae habe hen Emsa abe taꞌan.
²¹ Dikire zen kitak eaha-en gwek. Dikire zen Nesa niaha-en gwek– Nena men kirekame enho aha-erekam e gwendake. Zen de kirekam eaha-en gwenkam, zen dekam tangan sa okamanak de zini Asa anakan daibliblal, ‘Zen eiwa Eme Asa zer soneka.’
²² Ëe mese ere mo ngatan zi mo lang nakore sosonna zebe mae hap golzimk– men desa Ena abe hap golblakaye. Zen zep sa hen eaha-en gwer– Nena men kirekame hen aha-en ekaye.
²³ Asa Eme enho nakon zergwe gwenda, hwena Ëe asa desa enho nakon golelowehe gwer. Zen zep sa tangan eaha-en gwer. Zen dekon zep sa hen okamanak de zini anakan tame nul gwer, ‘Zen eiwa, Eme Asa zer soneka.’ Zen zep sa hen anakan tame nul gwer, ‘Em eiwa ema Abon de ang ta gwen wenya ansa kwasang gwibirida gwenda– men kirekame hen Ena Asa kwasang gwe-gweblandake.’
²⁴ “Bian, zini men desa Ena abe hap lup gubluka, Ëe ama zen de Abon onak lowehe gwen hap dwam gweꞌan– men zaoe Aena gwe gweꞌakke. Zen dekam sa ano ngatan zi mo langnak de sosonna hla nul gwer– men desa Ena abe hap de kwasang hap okamana ansa de yang gulsun sremnak golblakaye.
²⁵ Bian, Em dam-dam enkam de klis gul gwen hap de Zini. Okamanak de zini hom Emsa tame daꞌan, hwena Ëe mese Emsa tame tak. Hen Abon de ang ta gwen wenya an mes hen anakan tame nuk, ‘Eme Asa zer soneka.’
²⁶ Ëe mese ebe hap dena zebe mae hap goltreizimk, hen nama asa kirekam goltrei gwizim. Zen zep sa Asa enna nola gweblal– men kirekam Ena hen Asa enna lwa gweblandaye. Ëe dekam asa deban mae apdekam goleaha-en gwer.”